Dvadasharanayacakra 3.106

3.106

athavā muktvāpi vā . lakṣaṇabhedahetūnāṃ sukhaṃ mohād guroranyallaghutvād mahālohapiṇḍārkatūlavat ityādiviśeṣaṇamantareṇa bhedo na śakyaḥ sādhayitumiti tadracanākusṛtiryathā tvayā kriyate tathaiva mayā kṛtā, kintu tāṃ muktvāpi lakṣaṇabhedavailakṣaṇyaviśeṣaṇapakṣaviracanāṃ sattvādibhedalakṣaṇābhimatebhya eva tvaduktebhyo laghvādihetubhyo'bhedasiddhiḥ śakyā āpādayituṃ sphuṭenaiva nyāyādhvanā bhrāntijananena vinetyarthaḥ . tadyathā --sukhaṃ mohādananyat, apuruṣatve'calatvāt, mohasvātmavat, apuruṣatvaviśeṣitaḥ acalatvāt iti hetuḥ puruṣādacalād vyāvartyate mā bhūdanaikāntika iti . duḥkhādananyat sukhamiti vartate, aniyamaśīlatvāt, atrāpi apuruṣatvaviśeṣaṇaṃ draṣṭavyamadhikārāt, duḥkhasvātmavaditi . tathā duḥkhaṃ sukhādityādi sādhanacatuṣṭayaṃ sukhādananyatvasādhanadvayavadapuruṣatvaviśiṣṭaṃ duḥkhamohayoḥ saṃyoganiṣpannamiti sādhanaṣaṭkaṃ gatārthaṃ yāvad duḥkhasvātmavaditi .