Dvadasharanayacakra 3.114

3.114

atha tvityādi yāvat sukhamiti . atha mataṃ tava yad vibhaktasvatattvaṃ duḥkhamohābhyāṃ tat sukhaṃ sukhādanyanna bhavati tat prasādādyanātmakamapi na bhavatīti viviktasvarūpasya sukhasya duḥkhādanyatvāt prasādādyātmakatvācca tadeva śakyate vaidharmyeṇa nidarśayitum . ata eva ca tamaḥ sukhādanyad viviktasvarūpamaprasādātmakamapuruṣaṃ ceti sādharmyadṛṣṭāntaśca syāditi . evamitarasādhaneṣvapi ubhayadoṣaparihāra iti . atrocyate— tathā satītyādi yāvat ko vādārtha ubhayorapi ? iti . evaṃ sati tena prakāreṇa niyamo'yaṃ yat sukhādanyanna bhavati tat prasādādyanātmakamapi na bhavatyeveti etena prakāreṇa niyamavat sukhamevānanyat prasādādyātmakaṃ bhavati ceti tathā tasya vastunaḥ pravartanāt tathāvyakteśca niyamapravṛttiprakāśātmakaṃ sukhameveti tadabhyupagamenaivaikyaṃ mohādīnāmāpannamasmin sādhane, etadabhyupagamavacca śeṣasādhaneṣvapi duḥkhādanyat sukhaṃ mohaśca ityevamādiṣu yad yadanātmatve duḥkhādanyanna bhavati tacchoṣādivaraṇādyanātmakamapi na bhavati ityevaṃ niyamād vyakteḥ pravṛtteścaikyaṃ mohādīnāmabhyupagataṃ tvayaivetītaretaraikatvābhyupagamaḥ . itiśabdo hetvarthe, ityataḥ ko vādārthaḥ vādaprayojanamubhayorāvayoḥ ? tvayaivaikyābhyupagamānna vādārthastava mamāpi pratipannārthapratipādanavaiphalyāditi . evaṃ tāvadavaraṇādyātmakatvādihetavaḥ prathamoktānanyatvapakṣasyaiva sādhakā anātmatvaviśeṣaṇā api nānyatvapakṣasyeti pratipāditāḥ .