Dvadasharanayacakra 3.119

3.119

tadupasaṃhārārthamāha --iti sphuṭamevetyādi yāvad viyadādivaditi, itiśabdopasaṃhārārthatvāt . yadabhilaṣyate tvayā pradhānaṃ nāma guṇasāmyāvasthānaṃ kiñcidastīti tannābhilaṣaṇīyam . sukhaṃ sadā vyaktaśabdasparśarūparasagandhamevetyabhyupagamyatāṃ sphuṭameva, kimanyāpadeśena paradoṣābhidhānena vā ? tattvavādinaiva bhavitavyamṛjunā . tebhya eva laghvādibhyo hetubhyo viyadādivat, yathā ākāśavāyyagnyabbhuvaḥ pañca mahābhūtāni vyaktaśabdādibhāvāni tathā sukhamiti laghvādibhya eva hetubhyaḥ pṛthivyāmiva śabdādayaḥ pañcāpi śeṣeṣvapi caturṣu bhūteṣu vyaktā ityabhyupagamyatām . pariṇativiśeṣāttu hiṅgugandhavat sūpe lavaṇarasavaccāpsu kasyacideva pratyakṣatā śabdāderna śeṣasyābhibhavādibhiriti . paramatenaivaitaduktam . svamatena tu vyaktaśabdasparśarūparasagandhavatpratijñāyāṃ viyadvarjānyudāharaṇānīti, sparśarasagandhavarṇavantaḥ pudgalāḥ trayaviṣayasamanvaya... ... ...vītānāṃ vyavahārasamprasiddha... ... ...hetutvāvadhāraṇārthānāṃ cāvītānāmatathārthatvāt samastatantrārthavighaṭanameva . tatvārtha॰ 5 . 23 iti sāmānyena aṇavaḥ skandhāśca tattvārtha॰ 5 . 25 mūrtatvāt pṛthivīvad vāyvādayo'pi . śabdabandhasaukṣmyasthaulyādayastu skandheṣveva pudgaleṣviti . ākāśasyāvagāhopakārasya naite dharmāḥ santīti vādaparameśvaramatam, ato viyadvarjānyudāharaṇāni ityuktam .