Dvadasharanayacakra 3.141

3.141

sthitvāpravṛttacetanānadhiṣṭhiteśvaravadanekānta iti cet . syānmatam--yatheśvaraḥ svayaṃ prāgapravṛttān sthitvā pravartayannapi cetanāntareṇānadhiṣṭhitaḥ pravṛttaśca tathā tanvādīni sthitvā pravṛttāni syurityanekāntaḥ . īśvarasya vā cetanādhiṣṭhitatetyādi, evamanaikāntikatvānicchāyāṃ vā cetanādhiṣṭhito'sāvīśvaraḥ prāptaḥ sthitvā pravṛtteradṛṣṭāṇupradhānādivat, ato'nyeśvaratā grahādhiṣṭhitastrīpuruṣādivat . tasyāpi cādhiṣṭhāturanyādhiṣṭhitatetyanavasthā syāditi . etacca na, cetanādhiṣṭhitapravṛttitvasādhyadharmatvāt, naiṣa doṣaḥ, cetanādhiṣṭhitapravṛttitvaṃ hi sādhyate dharmaḥ, sa cācetanānāmeva taddharmiviṣayatvāt, cetanānāṃ siddhatvāt prayojanābhāvācca . tanukaraṇabhuvanasādhanapravṛttādṛṣṭāṇupradhānādīni hyacetanāni dharmīṇi cetanādhiṣṭhitatvadharmeṇa viśiṣṭāni sādhyanta iti pratijñāviṣayājñānādadoṣa iti .