Dvadasharanayacakra 3.145

3.145

evaṃ tāvat sāmānyena viśiṣṭabuddhipūrvakatoktā, prastutakāpilamatāpekṣayā caivaṃ pratijñāyate --laghuprakāśetyādi yāvat pācakādhiṣṭhitānalodakaudanasādhanavaditi . yathā parasparapratyanīkayoragnyudakayorapratyanīkatvavidhāyinā viśiṣṭabuddhinā pācakenādhiṣṭhitayoḥ satyapi mithaḥ pratyanīkatve tadbuddhivaśavartinoḥ saṃhatyakāritvādodanasādhanaṃ dṛṣṭaṃ tathā laghuguruṇoḥ prakāśavaraṇayoḥ pravṛttiniyamayośca mitho viruddhayorapi saṃhatya mahadādibhāvenaikārthakāritvād viśiṣṭabuddhipūrvakateti . anyonyābhibhavanamithunavṛttitvavipariṇāmāditi cet . syānmatam--sattvarajastamasāmevāṅgāṅgibhāvaḥ puruṣārthamuddiśya pravṛttānāṃ vaiṣamyavipariṇāmād mahadādi anvāha ca-- eko vaśī niṣkriyāṇāṃ bahūnāmekaṃ bījaṃ bahudhā yaḥ karoti . tamātmasthaṃ ye'nupaśyanti dhīrāsteṣāṃ śāntiḥ śāśvatī netareṣām .. śvetāśva॰ 6 . 12 sādhanam, nānyaḥ prayokteti . etacca na, pariṇāmasyāpi kāryatvāt . tadvyācaṣṭe --dharmāntaraikyādi, pariṇāmo hi dharmāntaraniṣedho dharmāntarāvirbhavanaṃ ca, taddvayabhūtaṃ kāryam, sa tu pariṇāmaḥ kāryatvāt pūrvavat pratijñārthāvyatirekād rathādivat so'pi viśiṣṭabuddhimadvihitaḥ . tasmādayuktam--svata eva pariṇamante sattvādaya iti .