Dvadasharanayacakra 3.149

3.149

ārṣoktānāṃ nayānāṃ kasminnantarbhāvaḥ ? ityata āha --saṅgrahadeśatvād dravyārthaḥ, saṅgrahanayasyāpi śatadhā bhedāt taddeśastadekadeśo dravyaśabdārthaḥ . katamasmin vigrahe iti cet, ucyate --dravyamapi guṇasandrāvaḥ . tadvyākhyā--sam ekībhāve, dru gatau pā॰ dhā॰ 945, tasmād guṇānāmekībhāvena dravaṇam, kāraṇe kāryasya sattvāt satāmeva sukhādīnāṃ rūpādīnāṃ pṛthak pṛthak sannihitānāmaikyagamanājjīvapudgalapariṇāmaḥ saṅgamanam . āha--vidhyubhayanayatvāt sannihitatadvidhaśaktīśvarapṛthaktvādaṇvādīnāṃ tadekaikasarvātmakatvācca teṣāṃ bhavatu ekībhāvaḥ, mā bhūdīśvarasyeti . netyucyate, tenāpi tadvaśitvāt sannihitatacchaktināpi saheśvareṇaikībhāve tacchaktivyakternānyatheti . ata eva cāsya nayasyādvaitavādād bhedaḥ .