Dvadasharanayacakra 3.56

3.56

pravṛttisvātmaiva vā trīṇīti puruṣāvasthāvaditi . yathaiva hi yadi puruṣasvātmā avasthāḥ na tarhi nā anavasthatvāt khapuṣpavaditi tathaiva yadi pradhānasvātmā guṇā na tarhi pradhānam, aguṇatvāt, khapuṣpavat . abhyupagame'pi tu pradhānasya guṇānāṃ trayāṇāmapyaikyaṃ pradhānasvātmatvāt pradhānavaditi sarvatvasambhāvyābhāvādeva sarvāvyāpitā . pravṛttiguṇa eva hi prakāśaguṇaḥ pravṛttisvātmatvāt pravṛttivat, evamitaro'pi . prakāśa eva pravṛttiḥ prakāśasvātmatvāt prakāśavat, evamitaro'pi . niyama eva ca pravṛttiḥ niyamasvātmatvād niyamavat, evamitaro'pi . ya eva cānyo guṇaḥ sa evetaro'pi ekasvātmatvāt sa iva iti prakṛtirevedaṃ sarvam ityatideśābhāvo bhedābhāvāt .