Dvadasharanayacakra 3.69

3.69

atrocyate --yadyaniyato'sāvasaṃstarhi yadi svayamevāniyataḥ prakāśo'saṃstarhyasau aniyatatvād vāndhyeyavat . evaṃ hītyādi etasyaiva vyākhyānamaniṣṭāpādanadvāreṇa . kāryaṃ kāraṇe'sti ityetad darśanamevameva ghaṭate yadi tat tatra niyatamiti, kimuktaṃ bhavati ? ananyathāvṛttītyuktaṃ bhavati, yathā vartitavyaṃ tathaiva vartate nānyathā, svātmanaiva ca vartate nānyena kenacid vartyate . tacca ananyathā vṛttirasya tadidamananyathāvṛtti kāryaṃ kāraṇe saditi śakyamabhyupagantum . kiṃ kāraṇam ? tatra sannidhivartateḥ sattārthatvāt, tatra kāraṇe sannidhyartho vartatiḥ sattārthaḥ sannihito vartate iti, asti-bhavati-padyati-vidyativartatayaḥ sannipātaṣaṣṭhāḥ sattārthāḥ ityatra vartateḥ sannidhibhavanārthavācitvād vartate niyataḥ sannihito'stītyarthaḥ .