Dvadasharanayacakra 4.57

4.57

atrāha --nanvevamityādi yāvat kuto'sya rūpādyātmakatā ? iti . nanu bhoḥ ! tvaduktena vidhinā etenaiva pudgala evātmā prāptaḥ tasyopayogātmanaḥ pudgalatvāt, yo'yaṃ pudgalopayogaḥ rūpaṃ rasaḥ ityādijñānātmanaḥ sa cātmopayoga eva upayogavyatiriktasya rūpāderabhāvādupayogasya rūpādyātmakatvādupayogarūpatvācca rūpādīnām . tasmāt kuto'sya ātmano rūpādyātmakatā ? iti prastutasyopayogasya matyādeḥ pudgalātmatvamuparuṇaddhi eṣa vicāra iti . atrocyate--etanna, upayogātmakatvādeva rūpādīnāmapyuktavat . naiṣa doṣaḥ, rūpādyātmakatā ātmanaḥ, rūpādīnāṃ copayogātmakatā . yasmādupayogātmakatvaṃ rūpādīnāmapyanantaramevoktam . tasmād rūpādīnāmapyupayogātmakatvāduktavat pudgalo'pyātmā ātmāpi pudgala eveti rūpādyātmakatvamātmano na doṣāya .