Dvadasharanayacakra 5.50

5.50

gativiśeṣaṇasāmarthyāditi cet . syānmatam--yadi sarvathā sthānaṃ nivṛttirabhāvaḥ ityaviśeṣya brūyāṃ khapuṣpavad nirupākhyaṃ syāt, kiṃ tarhi ? gatyā viśiṣṭaṃ sthānaṃ gatinivṛttiḥ iti brūmaḥ . tasmād gatyabhāvaḥ iti sopākhyamiti . atrocyate --tadevedamasmadiṣṭaṃ sthānasya sattvaṃ gatyabhāvasya sthityabhāvasya gamanasya sattvavad gativiśeṣaṇayogād bhavanmataviruddhaṃ siddham, tasmiṃśca siddhe sthāne tadvad gatisthityādi sarvakriyāpadābhidheyaṃ bhāvaḥ satyameva nāsaditi siddham . tasmācca gativiśeṣaṇasāmarthyāpāditasthityādyuttarabhāvasatyatvāt ata eva ca sarvātmaketyādi yāvad bhavanaṃ bhāva iti . yeyaṃ niruktiḥ bhavanaṃ bhāvaḥ iti sāpyetasmādeva kāraṇād gatisthityādisarvātmakameva bhavanasvatattvamālambya tadaparityāgena tatsvābhāvyāt tattadbhavanānubhavasvabhāvatvāt pūrvasya gatibhāvasya uttarasya ca sthitibhāvasya athavā pūrvasya sthitibhāvasya uttarasya ca gatibhāvasya yathāvivakṣākramaṃ yathāpariṇatikramaṃ ca yathāsambhavamekasyābhivyaktyā itarasyānabhivyaktyā ca bhavanaṃ bhāva iti nirucyate .