Dvadasharanayacakra 7.162

7.162

yat punaridaṃ pratyucyate tasyāśaṅkitasyottaraṃ vaiśeṣikeṇa --na, āśrayaviśeṣād bhāvavadityādi, dravyādisadbhāvatrayaṃ dṛṣṭāntaḥ, pratidṛṣṭāntaśca jalacandraḥ, tathā samavāyaikatve'pītyādi dārṣṭāntikaṃ gatārthaṃ yāvad bhaviṣyatīti . asyottaramāhācāryaḥ --idaṃ nirmūlameva, vyaṅgyasyādhārasya vā'niyamāt pūrvoktādāśraya evāsiddho vyañjako vyaṅgyo vā tvadiṣṭaḥ, kutastadvyaṅgyo vyañjako vādheyo'rthaḥ ? kuto vāśrayāṇāṃ vaicitryam, samavāyaikatve ṣaṭpadārthanivṛtteḥ subhāvitatvāt ? ajalacandravad vyomacandravadekatvāt samavāyasya bhāvasya ca sattākhyasya jalacandreṇa saha sādharmyābhāvāt kuto nānātvopacāraḥ, chāyāmātratvācca jalacandrasyābahutvādvā ? bhāvo vā kutaḥ, bhāvo'pi dravyādivyatirikto nāstyevaikaḥ tanmūlatvādvivādasya ityalamativikāśinyā saṅkathayā .