Dvadasharanayacakra 7.184

7.184

kālato'pi cetyādi, vināśotpādayorekakālatvāt piṇḍaśivakādīnāṃ piṇḍo na bhūtaḥ śivako bhūta ityekameva bhūtamabhūtaṃ ca kālabhedāt . atītānāgatābhyāṃ vṛttibhyāmasaṃsṛṣṭatattvā śivakāditā vartamānaikakālā . na yathā lokavāda iti avijñātārthatattvo loko mithyā brūta iti vaidharmyodāharaṇaṃ palālamagnirdahatīti, etat svavacanānumānapratyakṣaviruddhaṃ vacanamiti . tad bhāvayati --yadi tad dahyata evetyādi yāvad bhasmīkaraṇānupapatteḥ pūrvavat palālakālavat, kālasya bhinnatvābhyupagamāt . paraḥ parihāraṃ manyeta --deśaḥ palālasya dahyate sa ca palālameveti . tasyottaram --tathāpītyādi gatārthaṃ yāvad deśasyāpi bhasmīkaraṇānupapatteriti . athākāśavyatireketyādi, syānmatam--dravyārthikanayamate'bhedāt palālādimūrtadravyeṣveva sambhavādākāśādyamūrtidravyavyatirekeṇa palālameva dahyate nākāśādīti . tadapi netyādi, abhūtatadbhāve'rthe cvipratyayaḥ, tadantena bhasmīkaraṇaśabdenānyo dāho vartate anyacca palālamiti bhinnārthatvādaparihāraḥ . athāpyekatvaṃ palālasyeṣyate dravyārthābhedāt tatastasya dāhyatā nāsti bhasmatvābhūteriti .