Dvadasharanayacakra 7.190

7.190

apara āha --kathaṃ tarhi so'kriyamāṇaḥ kumbho jātaḥ, kriyāyā abhāvādakriyamāṇo'kriya- māṇatvāt kumbho jāyate khapuṣpavaditi prāptam, aniṣṭaṃ caitat, lokaprasiddhyuparodhitvāditi . atrocyate — ko vā bravīti jātaḥ iti ? ahaṃ tu lokamevāyuktavādinaṃ manye, dravyādito janmavināśasamatvāt, ya eva jātaḥ sa eva vinaṣṭo yatraiva tatraiva yadaiva tadaiva yathaiva tathaiveti bhāvābhāvayorbhāvo bhavanam, sa eva bhāvābhāvabhāvo vastu sadasadātmakabhavanam, vastutvāt pūrvābhāva eva bhāvo'sya piṇḍādeḥ, pūrvabhāvasyābhāvo vināśaḥ, sa eva uttarottaro bhāvo janma iti janmavināśayorlakṣaṇam, tayostulyatvād dravyāditaḥ . sa bhāvābhāvātmako'rtho na jāyata iti kiṃ śakyo vaktum ? iti . omityucyate, sa na jāyate iti vinaśyattvāt, pūrvavat . na vinaśyati ityapi śakyaṃ vaktuṃ jāyamānatvāduttaravat . etadudāharaṇaṃ nirvartyakarmaviṣayāsu vikāryakarmaviṣayāsu ca kriyāsu, sarvāsvapi tāsveṣaiva vārtā . prāpyakarmakriyāsvapi ca kāsucit . evaṃ tāvadutpannaśabdānāṃ nirviṣayatā . dravyaśabdeṣvapi bhāvābhāvātmakatvāt sarvabhāvānāṃ kutaḥ tattvopanipāti vacanam ? bhrūkṣepādivattu svābhiprāyasūcanaṃ kṛtasaṅketānāṃ kriyate . śakyo vaktumiti . kasmāt ? vinaśyattvāt, ghaṭāvasthā hi janma, sā vinaśyadavasthaiva uktanyāyāt, pūrvavaditi tvadiṣṭānantarāghaṭāvasthāvat . na vinaśyati ityapi śakyaṃ vaktuṃ jāyamānatvāduttaravat ghaṭāvasthāvaditi .