Dvadasharanayacakra 7.68

7.68

kiñcānyat, tiṣṭhatu tāvat prāk sattayā sambandhāt kāryasya sadasattvam yadāpi sattayā sambaddhaṃ tadāpi sadasat tvanmatenaiva, tadyathā --yat tat kāryaṃ sattayā sambaddhaṃ sadityabhidhīyate sattayā viśeṣaṇabhūtayā viśeṣyate daṇḍeneva daṇḍī viśeṣyatvāt nanu tat svasattayaiva sat labdhātmalābhameva daṇḍaviśiṣṭadevadattavat, na sattāsattayā, na hi daṇḍasambandhād devadatto'san san kriyate, kiṃ tarhi ? sanneva daṇḍitvavyapadeśabhāg bhavati svasattayā san daṇḍisattayā cāsaṃstadeti sadasan . tathā satkāryaṃ sattāsambandhakāle sadeva svasattayā khapuṣpādyavastuvaidharmyāt . tathā sattāpi na vastusattayā asatī satī kriyate, kiṃ tarhi ? āśrayapratilambhāt satyevābhivyajyate . tadubhayaṃ vastusattayā sadeva sattādi dravyādi ca sambandhisattayā nāstītyarthaḥ . kutaḥ ? kāraṇakāryetyādihetoryāvad bhedāditi . dravyādi vastu kāryaṃ kāraṇaṃ ca, sattā tvakāryamakāraṇaṃ ca, nityā sattā, dravyādyanityam, sambandhi dravyādi, sattā asambandhinī, jātimad dravyādi, ajātiḥ sattā ityebhyo bhedebhyo bhinnatvāt . tantusamavāyavat, yathā tantavaḥ kāraṇādidharmāṇastathā dravyādayaḥ, yathā samavāyo'kāraṇādidharmā tathā satteti . dṛṣṭāntadārṣṭāntikayośca sadasattvayojanā svabhāvasambandhasattābhyāṃ kartavyā . tasmāt sadasattvaikātmyopapattireva .