Dvadasharanayacakra 7.77

7.77

kiñcānyat, api ca tvayāpītyādi, tvatkalpanayaiva sadasat ityetat pradarśayitumidamucyate, prāgvyākhyātārtha evaiṣa grantho yāvad viśeṣaṇasambandhaḥ kalpya iti, iha tu prāg viśeṣaṇasambandhād vidyamānameva nirupākhyamitīṣṭaṃ tvayaiva ityetasyārthasya pradarśanārthamupanyastaḥ, ata āha --atha ca na tadasad nirupākhyatvāditi nirupākhyatvasya sati dṛṣṭatvād vyabhicara uktaḥ . asacca tat sambandhāsattvāt tasyāmavasthāyām, sopākhyaṃ ca taduttarakālaṃ sattāsambandhopākhyatvāt . evaṃ sopākhyanirupākhyatvāvirodhamāpādya prastutakāryasadasattvāvirodhe sādhanamāhācāryaḥ --sadasadeva tu sopākhyanirupākhyatvāt sāmānyavaditi . athavā sopākhyaṃ nirupākhyaṃ ca sadasattvāt sāmānyavaditi sadasattvaikātmye sādhye sopākhyanirupākhyatvaṃ hetuḥ sopākhyanirupākhyatve ca sadasattvaṃ proktanyāyena tvayaivābhyupagatatvāt .