Dvadasharanayacakra 7.82

7.82

asatkāryapakṣe'pītyādi, vaiśeṣikaṃ pratyasatkāryavādinamupādānaniyamābhāvadoṣa ukto yo'yaṃ sa kiṃ virudhyate ? iti pūrvavat praśnopakramaṃ bhāṇayati . yadasāvekāntenetyādi, yadasau vaiśeṣikaḥ paryāyārthāśrayeṇa kriyāguṇavyapadeśābhāvādasadeva kāryam iti dravyārthato hetuṣu turyādiṣūpādāneṣu ca tantuṣu sannihitasyāvyaktasya kriyāmantareṇa kriyayābhivyaṅgyasya paṭākhyasyārthasya upari avajñayā anapekṣya taṃ brūyāt tasya paṭarthitāyāṃ tantūpādānaniyamo na yujyate tatrāsattvāt tṛṇādivat, yathā tṛṇādyupādānaṃ paṭārthitāyāṃ na yuktaṃ tatra tasyāsattvādevaṃ tantūpādānamapītītthamasatkāryaikāntavāde'pyupādānaniyamābhāvadoṣaḥ, so'nekāntavāde syādādiviśiṣṭe nāsti syādasat kāryam iti dattasattāvakāśamapi vadataḥ . tathā yadi vaiśeṣiko'pi viśeṣya brūyāt ka enaṃ kiñcidapi brūyāt ? na tadā tasya vādino viśeṣitānvayavyatirekadharmadharmivyavasthasya tilatuṣaśatabhāgamātramapi vācyamastīti . uktaṃ ca--