Dvadasharanayacakra 7.98

7.98

na hi ghaṭatāyāmityādi, śivakādivad mṛttattvasya ghaṭasya mṛttattvasyābhāve yadyavasthānaṃ syādasan ghaṭaḥ prāk paścājjāyata iti syāt, tattu nāsti, yasmād mṛda ātmaiva ghaṭātmā . kasmāt ? tattyāge tatsvarūpānupapatteḥ, yattyāge yatsvarūpānupapattiḥ sa tasyaivātmā . atītānāgatetyādi yāvad mṛttvavat, yathā mṛtpiṇḍasyātītānāgatavartamāneṣu kāleṣu ye viśeṣāḥ śītoṣṇatvādayaḥ sārdraśuṣkakhaṇḍitaśakalādayaśca vicitrāstānadhyāste svabhāvo yasya mṛttvasya tat tatsvabhāvam, sa eva sadbhāvaḥ paramārthaḥ, sa eva paramārtho bhūtaṃ mṛttattvaṃ tān viśeṣān vihāya na pravartate te'pi ca taditi sa evātmā viśeṣāṇāṃ mṛttvasya ca tathā ghaṭātmā mṛda evātmā . athavā atītānāgatavartamānavicitraviśeṣādhyāsisvabhāvasadbhūtaghaṭavaditi dvitīyamudāharaṇam, saiva vyākhyā . mṛda ātmā ghaṭasyātmā ghaṭasyātmā mṛda ātmeti dvidhāpi pratijñāyate tenaiva hetunā anenāpi dṛṣṭānteneti .