Yashastilaka 3.190.3

3.190.3

uktaṃ ca- 'anekavarṇā susnigdhā gambhīrā mahatī sthirā | praśastā pārthivīcchāyā manodṛṣṭiprasādinī ||' he deva he rājan, balena bhārāgamanasāmarthyena varīyāṃsaṃ atiśayena gurutaram | kamiva | devamiva bhavantamiva | yathā bhavān balena varīyān bhavati | he deva he rājan, ānūkena anvayena balena yo kaṇṭhīravaṃ siṃhaṃ vijñāpayati | kamiva | devamiva bhavantamiva | yathā bhavān ānūkena kaṇṭhoravo bhavati| he deva, svareṇa dhvaninā samudraghoṣaṃ vijñāpayati | kamiva | bhavantamiva yathā bhavān svareṇa samudraghoṣo bhavati | he deva, kulena jātyā kāmbojaṃ vāhīkadeśodbhavaṃ vijñāpayati | kamiva | devamiva bhavantamiva | yathā deveti pūrvoktameva saṃbodhanapadaṃ grāhyam | he deva, javena vegena vājirājaṃ garuḍaṃ vijñāpayati | he deva, varṇena śvetamānaṃ śvetīkurvāṇaṃ vijñāpayati | kamiva | devasya yaśorāśimiva | yathā devasya yaśorāśiḥ śvetamāno vartate | 'śvetaḥ pradhāno varṇānām' iti vacanād yata indrasya aśva uccaiḥśravāḥ śvetavarṇo bhavati | he deva, tanūruheṣu romasu sūkṣmadarśanaṃ sūkṣmāvalokanam | kamiva | devasya cittamiva | yathā devasya citta tava manaḥ sūkṣmadarśanaṃ bhavati | he deva pṛṣṭhapradeśe āsanapradeśe bhagnavaṃśaṃ adṛṣṭapṛṣṭhasthalam | kamiva | devasyārivargamiva | yathā devasya arivargaḥ śatruvargo magnavaṃśaḥ kṣayagatakulo bhavati| he deva, bāladhau pucchaviṣaye ramaṇīyaṃ manoharam|kamiva | devasya vīradhrīvilāsacāmaramiva | yathā devasya vīraśriyo vīrakṣmyāḥ saṃbandhi śvetavilāsacāmaraṃ krīḍāprakīrṇakaṃ ramaṇīyaṃ bhavati |