Yashastilaka 4.388.1

4.388.1

ca vidyānandena—'calane calati preṅkhati vikṣampate vepate ca vellati ca lalati rallati valgati dolayati sandatte sphurati ||' kathaṃbhūtāḥ śramāmbhaḥkaṇāḥ | kucastambeṣu stanaprakāṇḍeṣu mandāspadā mandaspandāḥ | punaśca kiṃ kurvanti śramāmbhaḥkaṇāḥ | valivāhinīṣu trivalīnadīṣu sphāyante sphārībhavanti vṛddhiṃ gacchanti | kathaṃbhūtāḥ | nābhīdaraśreṇiṣu nābhivivarasamūheṣu pṛthavaḥ | punaḥ kathaṃbhūtāḥ | nīvīlatollāsinaḥ nīvī kaṭīvastrabandhanaṃ saiva latā vallī tāmullāsayantītyevaṃśīlāḥ | ullasanaṃ kurvantītyarthaḥ | rūpakopamalaṃkāraḥ || mandānileṣvityādi | he rājan, sa kālo grīṣmakālo nanvaho kathaṃ kena prakāreṇa narān dunoti saṃtāpayati | kathaṃbhūtān narān | baddhaspṛhān sākāṅkṣān | keṣu satsu dunoti | mandānileṣu atīghravāteṣu satsu | tathā kadalīdala maṇḍapeṣu aṃśumatphalaparṇagṛheṣu satsu | tathā hāreṣu tathā yantragṛhakeliṣu yantradhārāmandirakrīḍāsu satīṣu | tathā candaneṣu haricandanadraveṣu satsu | tathā kāntāsu satīṣu | kathaṃbhūtāsu kāntāsu | arpitapayodharamaṇḍalāsu | na kathamapi dunotītyarthaḥ | samuccayālaṃkāraḥ || kathaṃbhūteṣu gharmadineṣu | sakalalokalocanaghūrṇaneṣu sarvalokalocananidrotpādakeṣu | kathaṃbhūtān madhyāhnasamayān | madirāsamāgamāniva yathā madirāsamāgamāḥ sakalalokalocanānāṃ ghūrṇanaṃ kurvanti || akurvannityādi | yaḥ pumān strīṣu vanitāsu viṣaye manasaḥ prītiṃ harṣamakurvan strīṣu vihitādaro na bhavati kṛtādaro na syāt | saḥ pumān paraṃ kevalaṃ kleśabhājano bhavati | ka iva |