Yashastilaka 6.241.2

6.241.2

patākitabhrūrityādi | eṣā purī yāgāvaneryāgabhūmeḥ lakṣmīṃ śobhāṃ saṃvadatīva kathayatīva | eṣā kathaṃbhūtā | patākitabhrūḥ patākā saṃjātā yasyāḥ sā patākitā | patākīkṛtāḥ strīṇāṃ bhuvo yasyāḥ sā patākitabhrūḥ | yathā yāgabhūmiḥ patākitā bhavati | punaḥ kathaṃbhūtā eṣā nagarī | smitasaudhakāntiḥ smitamīṣaddhāsaḥ saudhakāntiryasyāṅgamaṇḍapaśobhā yasyāḥ sā smitasaudhakāntiḥ | yathā yāgamaṇḍapabhūmiḥ cūrṇadhavalitā bhavati | punaḥ kathaṃbhūtā | ālolanetrāmburuhopahārā ālolāni capalāni netrāṇi strīṇāṃ locanāni tānyeva amburuhāṇi kamalāni teṣāṃ upahāraḥ pūjā yasyāṃ sā ālolanetrāmburuhopahārā | yathā yāgabhūmiḥ kamalasahitā bhavati | punaḥ kathaṃbhūtā eṣā aṅganāviśramadarbhitāṅgī aṅganānāṃ strīṇāṃ viśramā bhrūkṣepāstairdarbhitaṃ saṃyuktamaṅgaṃ śarīraṃ yasyā nagaryāḥ sā tathoktā yathā yāgabhūmirdarbhasaṃyuktā bhavati | upamālaṃkāraḥ || iyamityādi | iyaṃ nagarī mama yaśodharamahārājasya dvitīyamaparaṃ saubhāgyasāmrājyaṃ ādadhātīva dharatīva | kathaṃbhūtā iyam | vilolālakacāmaraśrīḥ vilolāścapalā ye alakāśrṇakuntalāsta eva cāmaraśrīryasyāḥ sā tathoktā sāmrājye'pi capalabālacāmaraśobhā bhavanti | punaḥ kathaṃbhūtā iyam | nitambasiṃhāsanamaṇḍitā strīṇāṃ nitambānyeva siṃhāsanāni siṃhaviṣṭarāṇi tairmaṇḍitā śobhitā | sāmrājyamapi siṃhāsanamaṇḍitaṃ bhavati | punaḥ kathaṃbhūtā iyam | kucakumbhaśobhā kucakumbhānāṃ kucakalaśānāṃ śobhā yasyāḥ sā kucakumbhaśobhā | sāmrājyamapi pūrṇakumbhaśobhitaṃ bhavati | upamālaṃkāraḥ ||