Yashastilaka 7.107

7.107

kevalamityādi | he rājan, kevalaṃ niṣkevalamidaṃ vakṣyamāṇaṃ subhāṣitatrayaṃ pratyahaṃ nirantaramavadhātavyaṃ avadhāraṇīyam | kathaṃbhūtaṃ subhāṣitatrayam | aśeṣārthaśāsropāttasārasamuccayam aśeṣāṇi samagrāṇi yānyarthaśāsrāṇi tebhyaḥ upātto gṛhītaḥ sārasamuccayo yatra subhāṣitatraye tattathoktam | kimiva avadhātavyam | śarīraṃ karmeva bhojanādikamiva ||
svasmādityādi | he rājan, jigīṣuṇā narendreṇa svasmāt nijaḥ svakīyaḥ pumān rakṣyaḥ rakṣaṇīyaḥ | paro'nyo'nyasmāt rakṣaṇīyaḥ | svaḥ svakīyaḥ parasmāt rakṣaṇīyaḥ | kenāpi pīḍitaḥ san svabhṛtena rakṣaṇīyaḥ | parapīḍitaḥ san pareṇa rakṣaṇīyaḥ | kadācit parasmādapi svaḥ rakṣyaḥ | svasmādapi paro rakṣyaḥ | nijātmā tu svasmāt parasmāt sarvaiḥ prakāraiḥ rakṣaṇīya ityarthaḥ | katham | nityaṃ sarvakālam | jāyalaṃkāraḥ ||
vṛkṣānityādi | he rājan, mahīṃ pālaya rakṣā ka iva mālākāra iva puṣpopajīvīva | kathaṃbhūtastvam | prayoganipuṇaḥ yathāyogyavyāpāracaturaḥ | yathā mālākāraḥ nijavanaṃ pratipālayati | kiṃ kurvan | kaṇṭakinaḥ khadirabadarīkiṃdarpādīn vṛkṣān tarūn bahirbāhye vṛtisthāne niyamayan badhnan vanaṃ pālayati | tathā rājāpi kṣudraśatrūn maṇḍalādbahiḥ kurvan mahīṃ pālayati | mālākāraḥ punaḥ kiṃ kurvan | saṃhitān militān vṛkṣān viśleṣayan viralān kurvan | tathā rājāpi militān nṛpān pṛthakkurvan mahīṃ pālayati | mālākāraḥ punaḥ kiṃ kurvan | utkhātān vātādinā unmūlitān vṛkṣān pratiropayan punarvāpayan vanaṃ pālayati | tathā rājāpi utkhātān gṛhītadaṇḍān pratiropayan punarmaitryādipadaṃ dadat mahīṃ pālayati | mālākāraḥ punaḥ kiṃ kurvan | kusumitān puṣpitān vṛkṣān cinvan puṣpāṇi lunan avacuṇṭayan | tathā rājāpi vardhitadhanān ṣaṣṭhāṃśaṃ gṛhṇan mahīṃ pālayati | mālākāraḥ punaḥ kiṃ kurvan | laghūn bālatarūn vardhayan gurūn kurvan | tathā rājāpi kṛtakāryamṛtasevakaputrān vardhayan pitṛsadaśān kurvan mahīṃ pālayati | mālākāraḥ punaḥ kiṃ kurvan | uccān unnatān vṛkṣān samyakprakāreṇa namayan, tacchādhā-pātena anye vṛkṣā na vardhante yataḥ, tathā rājāpi uccān garvitān saṃnamayan pādayoḥ