Yashastilaka 7.113

7.113

punaḥ kathaṃbhūtaṃ dūtam | nijaprajñātiśayāvahelitapulahapulomapulastipālakāpyakātyāyanamatijātam nijaprajñātiśayena ātmamatiprakarṣeṇa avahelitaṃ pulahasya ṛṣiviśeṣasya tathā pulomasya tathā pulasteḥ tathā pālakāpyasya kāvyasya vā | dvayaṃ bhinnam | kātyāyanasya vararucermatīnāṃ jātaḥ samūho yena sa tathoktastam |
tathā hi tamevālekhyārthe ākṣapaṭaliko brūte—garvamityādi | re barbara sapādalakṣaparvatādhīśa, tvaṃ garvaṃ muñca madaṃ parihara mithyābhimānaṃ tyaja | re paścālakāḥ paścāladeśodbhavāḥ kṣatriyāḥ, cāpalaṃ capalatvaṃ mā naiva carata kuruta yūyam | re kerala malayācalanikaṭavartin, tvaṃ keliṃ krīḍāṃ saṃhara saṃkocaya | re madreśa madradeśādhīśa, tvaṃ deśāntaraṃ aparadeśaṃ praviśa praveśaṃ kuru | sa jagatprasiddho devo yaśodharamahārājaḥ itthamanena prakāreṇa vo yuṣmākaṃ ṭiriṭiliṭaṃ ātmano'nucitaṃ vyavahāraṃ na sahate na mṛṣyati na kṣamate | kathaṃbhūtānāṃ vaḥ | mithyaiśvaryabalāvaleparabhasabhraśyadvivekātmanām mithyā nirarthakaṃ yadaiśvaryaṃ balāvalepaśca sainyagarvaḥ tena rabhasena vegena bhraśyan vigalan viveko heyopādeyacāturyaṃ ātmanāṃ yeṣāṃ tathoktāsteṣām | kathaṃbhūto devaḥ | daivāśrayaḥ | puṇyenādhikatara ityarthaḥ | samuccayālaṃkāraḥ ||
śauṇḍīryaśālinītyādi | yo bhūpaḥ deve yaśodharamahārāje praṇatibhāvaṃ namratvaṃ na upaiti na gacchati tasya bhūpasya āhaveṣu saṃgrāmeṣu śirasi mastakopari vayasāṃ kākagṛdhrādīnāṃ pakṣiṇāṃ prabandho melāpako bhavati | tasya mastakaṃ bhidhata ityarthaḥ | yadvā athavā āśrameṣu gaṅgādinadītaṭeṣu paralokadhiyā svargādibudhyā (jaṭānāṃ lambakacānāṃ) prabandho bhavati | kathaṃbhūte deve | śauṇḍīryaśālini tyāgavikramābhyāṃ viśrutaḥ śauṇḍīrastasya bhāvaḥ karma vā śauṇḍīryaṃ tena śālate śobhate ityevaṃśīlaḥ śauṇḍīryaśālī tasmin śauṇḍīryaśālini | 'śaḍa śobhāyām' iti dhātoḥ prayogāt | punaḥ kathaṃbhūte deve |