Yashastilaka 7.270

7.270

āsādyetyādi | yeṣāṃ puruṣāṇāṃ rājñāṃ bharataprayogāḥ gītanṛtyavāditrodāharaṇāni śrutidṛṣṭibhājaḥ karṇendriyalocanendriyagocarāḥ santi na bhavanti | kiṃ kṛtvā | pūrvaṃ lakṣmīmāsādya śriyaṃ prāpya | teṣāṃ rājñāṃ dhanavatāṃ puruṣāṇāṃ ca iyaṃ pratyakṣībhūtā śrīrlakṣmīrmṛtakāṅgaśobhāsamānavṛttirbhavati mṛtakasya jīvarahitakalevarasyāṅgaṃ śarīraṃ tasya śobhā puṣpacandanābharaṇādiracanā tasyāḥ samānavṛttirbhavati | na kevalaṃ mṛtakāṅgaśobhāsamānavṛttiḥ śrīrbhavati, kiṃtu nirarthakā niṣphalā ca bhavati | upamālaṃkāraḥ ||
kadācit kasmiṃścidavasare mahākavikāvyakathākāṇḍeṣu mahākavīnāṃ kāvyakathākāṇḍeṣu kāvyānāṃ kathāprastāveṣu paṇḍitavaitaṇḍikasya kaveḥ paṇḍitavaitaṇḍikanāmaviduṣaḥ akharvagarvaiparvatabhāraṃ akharvo mahān yo'sau garvo'haṃkāraḥ sa eva parvataḥ kāṭhinyaprakṛtitvāt tasya bhāro bharataṃ akharvagarvaiparvatabhāraṃ avāruhaṃ avarohitavān | ahaṃ uttāritavānityarthaḥ | paṇḍitavaitaṇḍikagarvaṃ bhañjitavānahamityarthaḥ | kathaṃbhūteṣu mahākavikāvyakathākāṇḍeṣu | udghāṭitasarasvatīrahasyamudrākaraṇḍeṣu udghāṭita unmudritaḥ sarasvatyāḥ saṃbandhī rahasyamudropalakṣitaḥ gopyatattvacihnasahitaḥ karaṇḍaḥ peṭikā yeṣu te tathā teṣu | kiṃ kurvataḥ paṇḍitavaitaṇḍikasya | prastāvamavijñāya avasaramajñātvā iti īdṛśāni kāvyāni paṭhataḥ uccārayataḥ kṛtāvahelasya vihitānādarasya ||
itīti kim brahmāṇḍetyādi | he rājan, yattava bhavato lakṣmīḥ śrīḥ svayaṃvaravidhau svayaṃvaravidhāne svayamevāgatya varaṇe vihitādarā kṛtādarā vartate taccitraṃ āścaryaṃ na vartate | kathaṃbhūtasya tava | brahmāṇḍamaṇḍapamahotsavapauruṣasya brahmāṇḍamaṇḍapaṃ pariṇayanaśālā | jano'rtha iti yāvat | tasya mahotsave maharddheṃ pauruṣaṃ varatvaṃ yasya sa tathā tasya | taccitraṃ na bhavati, tarhi kiṃ citram | yat tava kīrtipriyā bhramati paryaṭati | nu iti vitarke | taccitraṃ tadāścaryaṃ vartate | kathaṃbhūtasya tava | kṛtajagattrayarakṣaṇasya kṛtaṃ vihitaṃ jagattrayasya trailokyasya rakṣaṇaṃ pratipālanaṃ yena sa tathā tasya | ityalaṃkāraḥ ||