Yashastilaka 7.274

7.274

haragirayantītyādi | he rājan, tava yaśasi visarati prasarati mahīdhrāḥ parvatāḥ haragirayanti kṛṣṇā api parvatā kailāsagirivadācaranti ujjvalā bhavanti | sarve'pi vārdhayaḥ lavaṇodakādayaḥ samudrāḥ kṣīrodadhayanti kṣīrodadhiriva ācaranti | kṛṣṇā api śuklā jāyanta ityarthaḥ | trīṇi jaganti ca trīṇi bhuvanāni ca saudhanti sudhāvalitānivācaranti | kriyopamālaṃkāraḥ || giriṣuityādi | he nṛpa he rājan, bhuvane jagati sāṃpratamidānīṃ balena tvayā samaḥ ko nāma vartate | api tu na ko'pi | yena tvayā bhūmibhṛtaḥ parvatāḥ pakṣe rājānaḥ giriṣu parvateṣu dhṛtā āropitāḥ, pṛthvībhāraśca bhūmibhāro nijabhuje svakīyadakṣiṇakare nihita āropitaḥ śleṣākṣepālaṃkāraḥ || paṇḍitavaitaṇḍikasya kiṃ kurvataḥ | iti idṛśaṃ kathaṃcinmahatā kaṣṭena kadvadaṃ kaṭuvacanaṃ vadato vyaktaṃ jalpataḥ | itīti kim | sakaletyādi | he rājan, iha asyāṃ sabhāyāṃ saṃpratīdānīṃ samāgataḥ saṃprāsaḥ bhavatā tvayā ahaṃ kathaṃ kena prakāreṇa nāvabudhye kathaṃ na jānīyāṃ | kathaṃbhūto'ham | asmin bhuvane pṛthvīmaṇḍale khyāta eva | punaḥ kathaṃbhūto'ham | sakalakavilokacakrapramardanaḥ sakalāśca te kavilokāḥ kavisamūhāsteṣāṃ cakraṃ samūhastatpramardayāmi cūrṇīkaromi iti sakalakavilokacakrapramardanaḥ | upamārūpakamidam || kena kṛtvā akharvaṃgarvaparvatabhāramavāruruham akharvaṃgarvaparvatabhāramavāritavān | iti idṛśasya asya pratyakṣībhūtasya lokasya arthakathanānunāthanāśayaśayena arthasya vācyasya kathanaṃ vyāvṛtirvyākhyānaṃ tasya ānunāthanaṃ yācanam | praśna ityarthaḥ | tasyāśayo'bhiprāyaḥ sa eva śayo hastaḥ arthakathanānunāthanāśayaśayastena | itīti kim | trimūlakamityādi | yaḥ pumān agaṃ vṛkṣaṃ vetti jānāti sa pumān