Yashastilaka 7.360

7.360

akathitamityādi | akathitamanutkālitaṃ dugdhaṃ daśa ghaṭikā yāvat tāvat pathyaṃ adhikakāle apathyam | kathitamutkālitaṃ yaddugdhaṃ tā ghaṭikā dviguṇāśca viṃśatighaṭikāparyantaṃ pathyaṃ paścādapathyamityarthaḥ | rūpāmodarasāḍhyaṃ yāvat ujjvalatvaṃ sugandhatvaṃ anamlaguṇasahitaṃ yāvattāvatkālaṃ dadhi grāhyamāsvādanīyam | jātyalaṃkāraḥ || tāvadityādi | atra asmin saṃsāre bhakṣyāṇāṃ pakkānāṃ vargaḥ samūhastāvatkālaṃ khadate śrāghyate'pi ca praśasyate ca | tāvatkiyat | yāvatkālaṃ aṅgārapācitāḥ sthūlābhyūrṇāḥ uṣṇoṣṇā aśītalāḥ sarpiṣi snātā ghṛtaplutā yāvannāyānti yāvanna bhakṣyante ityarthaḥ | atiśayālaṃkāraḥ || yadityādi | he rājan, taddhṛtaṃ te tava mude harṣāya svādvavatu | yatkim | yaddhṛtaṃ vedāgamavedibhiḥ vedaśāstrajñāpakaiḥ iha asmin saṃsāre sākṣāt pratyakṣeṇa nṛṇāṃ manuṣyāṇāṃ āyuḥ jīvitaṃ nigaditaṃ pratipāditam | 'āyurvai ghṛtam' iti vacanāt | yaddhṛtaṃ vaidyeṣu āyurvedavijñāpakeṣu āyurvedapratipādakeṣu śāstreṣu vā rasāyanāya paṭhitaṃ mṛgāṅkādirasāyananimittaṃ kathitam | kasmāt | sadyastatkālaṃ jarānāśanāt ghṛtapānāt | 'vṛddho'pi taruṇāyate' iti vacanāt | yaddhṛtaṃ sārasvatakalpakāntamatibhiḥ sārasvato nāma sarasvatīmantrastanmahimaprakāśāṅkaṃ śāstraṃ sārasvatakalpa ucyate tena kāntā atimanoharā matiryeṣāṃ mantravādināṃ te tathā taiḥ dhiyo buddhyāḥ siddhaye prāptyarthaṃ proktaṃ pratipāditam | kathaṃbhūtaṃ ghṛtam | kāñcanaketakadyutirasacchāyaṃ kāñcanaṃ ca ketakaṃ ca suvarṇaketakīpuṣpaṃ tayordyutiraso dravasya chāyā varṇo yasya ghṛtasya tattathoktam | upamālaṃkāraḥ || sthaulyamityādi | taddhi sevyaṃ āsvādanīyam | tatkim | yat dadhi | kiṃ karoti | sthaulyaṃ pīvaraṃ karoti | anilaṃ vātaṃ harate | etadekameva anyāni auṣadhānāṃ sahasrā-