Yashastilaka 7.383

7.383

eva kokā yāsu tāḥ | punaḥ kathaṃbhūtāḥ | atanujaghanakūlāḥ atanūni mahānti jaghanānyeva kūlāni taṭāni yāsāṃ tāḥ | punaḥ kathaṃbhūtāḥ | cārulāvaṇyavāraḥ cārūṇi lāvaṇyāni kāntayo vārīṇi jalāni yāsu tāḥ | rūpakālaṃkāraḥ || ūruvyāsavaśenetyādi | he rājan, kheladabalā khelantī ramamāṇā abalā jaṅghādaghnajalā | jaṅghādaghnajalā sā kūlaṃkaṣā vāhinī kathamiti viruddhaṃ parihiyate | yataḥ kūlakaṣā smaramandirapīḍāvatī tata eva jaṅghādaghnajalā jānuparyantaprāptaśukā iti sustham | kathaṃbhūtā kheladabalā | ūruvyāsavaśena manditarayā ūrvoḥ sakthinoḥ vyāsaḥ parasparasaṃmelanaṃ tasya vaśena paravaśatvena manditarayā mandavegā | punaśca kathaṃbhūtā nitambasthalai ruddhā nitambā eva sthalāni uccatayā tai ruddhā avaṣṭabdhā | punaḥ kathaṃbhūtā | nābhīkandaradeśavārivalanavyālolaphenāvaliḥ nābhyeva kandaradeśo guhāsthānaṃ tatra vārivalanena prakhedajalavyāptyā vyālolā viśeṣeṇa capalā phenāvaliḥ śuklaḍiṇḍīrapiṇḍarājiryasyāṃ sā | punaḥ kathaṃbhūtā | bāhūtpīḍanasaṃgalalharikā bāhvorbhujayorutpīḍanena gāḍhamāliṅganena saṃgalantyaḥ saṃmukhamāgacchantyo laharikāstvaksaṃkocekṣaṇavīcayo yasyāṃ sā | punaḥ kathaṃbhūtā | pīnastanottambhitā pīnau pūrvoktalakṣaṇau yau stanau tābhyāmuttambhitā avaṣṭabdhā sā tathoktā | rūpakavirodhālaṃkāraḥ || gambhīranābhītyādi | yā strīṇāṃ taṭinī trivalīlakṣaṇā nadī gambhīranābhīvalabhipraveśāt agādhatundikātalādhāravaṃśapañjarasaṃcārāt alpodakā abhūt | prasvedajalarahitā babhūvetyarthaḥ | sā taṭinī priyāparādhasravadaśrupūraiḥ priyasya aparādhaḥ priyāparādhaḥ bhartṛdoṣaḥ tasmāt sravanti kṣaranti yāni aśrūṇi teṣāṃ pūraiḥ nikāmaṃ punaḥ paścāt atibhūtā abhūt | rūpakālaṃkāraḥ ||