Pramanamimamsa 2.1.114

2.1.114

yaccedamadoṣodbhāvanamityasya vyākhyānam--prasajyapratiṣedhe doṣodbhāvanābhāvamātram-adoṣodbhāvanam, paryudāse tu doṣābhāsānāmanyadoṣāṇāṃ codbhāvanaṃ prativādino nigrahasthānamiti--tat vādinā'doṣavati sādhane prayukte satyanumatameva yadi vādī svapakṣaṃ sādhayennānyathā . vacanādhikyaṃ tu doṣaḥ prāgeva prativihitaḥ . yathaiva hi pañcāvayavaprayoge vacanādhikyaṃ nigrahasthānaṃ tathā tryavayavaprayoge nyūnatāpi syādviśeṣābhāvāt . pratijñādīni hi pañcāpyanumānāṅgam--pratijñāhetūdāharaṇopanayanigamanānyavayavāḥ nyāyasū॰ 1. 1. 32 ityabhidhānāt . teṣāṃ madhye'nyatamasyāpyanabhidhāne nyūnatākhyo doṣo'nuṣajyata eva hīnamanyatamenāpi nyūnam nyāyasū॰ 5. 2. 12 iti vacanāt . tato jayetaravyavasthāyāṃ nānyannimittamuktānnimittādityalaṃ prasaṅgena .. 35 ..