Kalpah 2.6.8.16

2.6.8.16

viṣṇavurukrametyapidadhāti .
mayi vasuḥ puro vasurityadhvaryurhotre bhakṣaṃ prayacchati .
tenaiva hotā pratigṛhṇāti .
evamuttarābhyāṃ yathādaivataṃ pracarataḥ.
nottarayordroṇakalaśādgṛhṇāti nottarayorāghāro vidyate .
uttareṇottareṇa mantreṇa sakṛdgṛhṇāti sakṛjjuhutaḥ .
uttareṇottareṇā''dityasthālyāṃ pratiprasthātā saṃpātamavanayati tenaiva sarvatrāpidadhāti . uttareṇottareṇādhvaryurhotre bhakṣaṃ prayacchatyetenaiva hotā pratigṛhṇāti .
diteḥ putrāṇāmaditerakāriṣamuruśarmaṇāṃ bṛhatāṃ varūthinām . yeṣāṃ dhāmāni nihitāni dhāmaśaścitrairyajanti bhuvanāni viśveti vā sarvatrāpidadhāti .
yadi kāmayeta pāpamasya sam̐syāditi pratiprasthānena pūrvo gṛhītvā pūrvastiṣṭhañjuhuyātpūrvo hutvā sādayet .
yadi kāmayeta samāvadvīryo bhrātṛvyeṇa syāditi
yugapadgṛhṇīto yugapajjuhuto yugapatsādayataḥ .
dhārāgrahakāle gṛhṇātītyekeṣām .
atra pātrāṇyutsādayati .
yadi kāmayeta yo grāme taṃ grāmānirū(ru)hya yo bahirgrāmāttaṃ grāme kuryāditīdamahamamumāmuṣyāyaṇamamuṣya putramamuṣyai viśo nirūhāmītyadhvaryuḥ pātraṃ nirū(ru)hyedamahamamumāmuṣyāyaṇamamuṣya putramamuṣyāṃ viśi sādayāmīti pratiprasthānam̐ sādayedayajñasaṃyuktaḥ kalpaḥ.
ādhavanīyaṃ pūtabhṛtyavanīya daśābhiḥ kalaśaṃ mṛṣṭvā nyuñjati .
hotā brahmodgātā yajamānaḥ sadasyaśceti madhyataḥ kāriṇo maitrāvaruṇo brāhmaṇācchaṃsī
potā neṣṭā'cchāvāka ānīdhraśca hotrakāḥ.
ubhaye camasino bhavanti sarveṣāṃ pratipuruṣaṃ camasādhvaryavaḥ .. 16 ..