Kalpah 2.6.9.23

2.6.9.23

āyāmata uparāṇi samānāni syustiryakto madhyāni raśanāśca prathimnaścaṣālāni . upaśayamaṅtvāmā dvābhyāṃ raśanābhyāṃ parivīyāgreṇa dakṣiṇārdhyaṃ yūpaṃ nidadhyāt .
yadyabhicaredidamahamamumāmuṣyāyaṇamindrasya vajreṇābhinidadhāmīti prāñcamupaśayaṃ nidadhyāt . paśukāla āgneyamasitaśīrṣamagniṣṭha upākaroti sārasvatīṃ meṣīmuttarataḥ saumyaṃ babhruṃ dakṣiṇata evaṃ vyatyāsaṃ dakṣiṇāpargānpauṣṇam̐ śyāmam̐ śitipṛṣṭhaṃ bārhaspatyam̐ śilpaṃ vaiśvadevamaindramaruṇaṃ mārutaṃ kalmāṣamaindrāgnam̐ sam̐hitamadhorāmam̐ sāvitraṃ vāruṇaṃ petvamuttamam .
yadi kāmayeta yo'vagataḥ so'parudhyatāṃ yo'paruddhaḥ so'vagacchatvityaindrasya loke vāruṇamālabheta vāruṇasya loka aindraṃ ya evāvagataḥ so'parudhyate yo'paruddhaḥ so'vagacchati .
yadi kāmayeta prajā muhyeyuriti paśūnvyatiṣajediti prajā eva mohayati .
yadabhi vā hato'pāṃ vāruṇamālabheta prajā varuṇo gṛhṇīyāddakṣiṇata udañcamālabhate'pa vā hataḥ .
āraṇyaṃ paśumākhuṃ vopaśaye nirdiśatyasau te paśuriti .. nirdiśedyaṃ dviṣyādyadi na dviṣyādākhuste paśuriti brūyāt .
sarveṣāṃ pratipaśu barhīm̐ṣi vapāśrapaṇyaḥ kumbhyo hṛdayaśūlāḥ plakṣaśākhāśca .
tantramagnerharaṇamadhriguruttamaḥ prayājastathā pūrvaḥ parivapyo'ntataḥ saṃjñaptahomo raśanānāmudasanamuttaraḥ parivapyo vapāśrapaṇīnāmanupraharaṇamabhihomo mārjanaṃ varadānaṃ ca .. 23 ..