Pramāṇa · Search · About · API

Thanamga 3.3.10

Ṭhāṇaṃga 3.3.10

Language
Ardhamāgadhī Prakrit

3.3.10.1

tihiṁ ṭhāṇēhiṁ ahuṇōvavaṇṇē dēvē dēvalōgēsu icchejja māṇusaṁ lōgaṁ havvamāgacchittaē, nō cēva ṇaṁ sañcāēti havvamāgacchittaē taṁ jahā — ahuṇōvavaṇṇē dēvē dēvalōgēsu divvēsu kāmabhōgēsu mucchitē giddhē gaḍhitē ajjhōvavaṇṇē sē na māṇussaē kāmabhōgē nō āḍhāti nō pariyāṇāti nō aṭṭhaṁ bandhati nō niyāṇaṁ pagarēti nō ṭhiipakappaṁ pagarēti, ahuṇōvavaṇṇē dēvē dēvalōgēsu divvēsu kāmabhōgēsu mucchitē giddhē gaḍhitē ajjhōvavaṇṇē tassa ṇaṁ māṇussaē pemmē vocchiṇṇē divvē saṅkantē bhavati.

3.3.10.2

ahuṇōvavaṇṇē dēvē dēvalōgēsu divvēsu kāmabhōgēsu mucchitē giddhē gaḍhitē ajjhōvavaṇṇē tassa ṇaṁ ēvaṁ bhavati-iṇhiṁ gacchaṁ muhuttaṁ gacchaṁ, tēṇaṁ kālēṇamappāuyā maṇussā kāladhammuṇā sañjuttā bhavanti, iccētēhiṁ tihiṁ ṭhāṇēhiṁ ahuṇōvavaṇṇē dēvē dēvalōgēsu icchejja māṇusaṁ lōgaṁ havvamāgacchittaē nō cēva ṇaṁ sañcāēti havvamāgacchittaē.

3.3.10.3

tihiṁ ṭhāṇēhiṁ ahuṇōvavaṇṇē dēvē dēvalōgēsu icchejja māṇusaṁ lōgaṁ havvamāgacchittaē sañcāēi havvamāgacchittaē-ahuṇōvavaṇṇē dēvē dēvalōgēsu divvēsu kāmabhōgēsu amucchitē agiddhē agaḍhitē aṇajjhōvavaṇṇē tassa ṇamēva bhavati-atthi ṇaṁ mama māṇussaē bhavē āyariēti vā uvajjhāēti vā pavattīti vā thērēti vā gaṇīti vā gaṇadharēti vā gaṇāvacchēdēti vā jēsiṁ pabhāvēṇaṁ maē imā ētārūvā divvā dēviḍḍhī divvā dēvajutī divē dēvāṇubhāvē laddhē pattē abhisamaṇṇāgatē taṁ gacchāmi ṇaṁ taṁ bhagavantē vandāmi namaṁsāmi sakkārēmi sammāṇēmi kallāṇaṁ maṅgalaṁ dēvayaṁ cēiyaṁ pajjuvāsāmi.

3.3.10.4

ahuṇōvavaṇṇē dēvē dēvalōgēsu divvēsu kāmabhōgēsu amucchiē agiddhē agaḍhittē aṇajjhōvavaṇṇē tassa ṇaṁ ēvaṁ bhavati- ēsa ṇaṁ māṇussaē bhavē nāṇīti vā tavassīti vā atidukkara-dukkarakāragē taṁ gacchāmi ṇaṁ tē bhagavantē vandāmi namaṁsāmi jāva pajjuvāsāmi, ahuṇōvavaṇṇē dēvē dēvalōgēsu divvēsu kāmabhōgēsu amucchiē agiddhē agaḍhitē aṇajjhōvavaṇṇē tassa ṇamēvaṁ bhavati-atthi ṇaṁ mama māṇussaē bhavē mātāti vā jāva suṇhāti vā taṁ gacchāmi ṇaṁ tēsimantiyaṁ pāubbhavāmi pāsantu tā mē imaṁ ētārūvaṁ divvaṁ dēviḍḍhiṁ divvaṁ dēvajutiṁ divvaṁ dēvāṇubhāvaṁ laddhaṁ pattaṁ abhisamaṇṇāgayaṁ iccētēhiṁ tihiṁ ṭhāṇēhiṁ ahuṇōvavaṇṇē dēvē dēvalōgēsu icchejja māṇusaṁ lōgaṁ havvamāgacchittaē sañcāēti havvamāgacchittaē.

Translations (2)

Commentaries (2)