Pramāṇa · Search · About · API

Nayadhammakahao 1.13

Nāyādhammakahāo 1.13

Language
Ardhamāgadhī Prakrit

Contents

1.13.1.1

jaï ṇaṁ bhantē! samaṇēṇaṁ bhagavayā mahāvīrēṇaṁ bārasamassa nāyajjhayaṇassa ayamaṭṭhē pannattē tērasamassa ṇaṁ bhantē! nāyajjhayaṇassa kē aṭṭhē pannattē? ēvaṁ khalu jambū tēṇaṁ kālēṇaṁ tēṇaṁ samaēṇaṁ rāyagihē nayarē, guṇasilaē cēiē, samōsaraṇaṁ, parisā niggayā.

1.13.1.2

tēṇaṁ kālēṇaṁ tēṇaṁ samaēṇaṁ sōhammē kappē dadduravaḍiṁsaē vimāṇē sabhāē suhammāē dadduraṁsi sīhāsaṇaṁsi daddurē dēvē caühiṁ sāmāṇiyasāhassīhiṁ caühiṁ aggamahisīhiṁ saparisāhiṁ ēvaṁ jahā sūriyābhō jāva divvāiṁ bhōgabhōgāiṁ bhuñjamāṇē viharaï, imaṁ ca ṇaṁ kēvalakappaṁ jambuddīvē dīvaṁ viulēṇaṁ ōhiṇā ābhōēmāṇē jāva naṭṭavihiṁ uvadaṁsittā paḍigaē jahā- sūriyābhē.

1.13.1.3

bhantēti bhagavaṁ gōyamē samaṇaṁ bhagavaṁ mahāvīraṁ vandaï namaṁsaï vandittā namaṁsittā ēvaṁ vayāsī — ahō ṇaṁ bhantē! daddurē dēvē mahiḍḍhiē mahajjuīē mahabbalē mahāyasē mahāsōkkhē mahāṇubhāgē, daddurassa ṇaṁ bhantē! dēvassa sā divvā dēviḍḍhī divvā dēvajjuttī divē dēvāṇubhāvē kahiṁ gaē kahiṁ anupaviṭṭhē? gōyamā! sarīraṁ gaē sarīraṁ anupaviṭṭhē, kūḍāgāradiṭṭhantō.

1.13.1.4

daddurēṇaṁ bhantē! dēvēṇaṁ sā divvā dēviḍḍhī divvā dēvajjutī divvē dēvāṇubhāvē kiṇṇā laddhē jāva abhisamaṇṇāgaē? ēvaṁ khalu gōyamā! ihēva jambuddīvē dīvē bhārahē vāsē rāyagihē nayarē, guṇasilaē cēiē, sēṇiē rāyā, tattha ṇaṁ rāyagihē nandē nāmaṁ maṇiyārasēṭṭhī-aḍḍhē dittē.

1.13.1.5

tēṇaṁ kālēṇaṁ tēṇaṁ samaēṇaṁ ahaṁ gōyamā! samōsaḍhē, parisā niggayā, sēṇiē vi niggaē, taē ṇaṁ sē nandē maṇiyārasēṭṭhī imīsē kahāē laddhaṭṭhē samāṇē pāyavihāracārēṇaṁ jāva pajjuvāsāi, nandē dhammaṁ sōccā samaṇōvāsaē jāē, taē ṇaṁ'haṁ rāyagihāō paḍinikkhantē bahiyā jaṇavayavihārēṇaṁ viharāmi.

1.13.1.6

taē ṇaṁ sē nandē maṇiyārasēṭṭhī annayā kayāi asāhudaṁsaṇēṇaṁ ya apajjuvāsaṇāē ya aṇaṇusāsaṇāē ya asussūsaṇāē ya sammattapajjavēhiṁ parihāyamāṇēhiṁ-parihāyamāṇēhiṁ micchattapajjavēhiṁ parivaḍḍhamāṇēhiṁ-parivaḍḍhamāṇēhiṁ micchattaṁ vippaḍivaṇṇē jāē yāvi hōtthā, taē ṇaṁ nandē maṇiyārasēṭṭhī aṇṇayā gimhakālasayaṁsi jēṭṭhāmūlaṁsi māsaṁsi aṭṭhamabhattaṁ parigēṇhaï parigēṇhittā pōsahasālāē jāva viharaï.

1.13.1.7

taē ṇaṁ nandassa aṭṭhamabhattaṁsi pariṇamamāṇaṁsi taṇhāē chuhāē ya abhibhūyassa samāṇassa imēyārūvē ajjhatthiē cintiē patthiē maṇōgaē saṅkappē samuppajjitthā — dhaṇṇā ṇaṁ tē jāva īsarapabhiyaō sampuṇṇā ṇaṁ tē īsarapabhiyaō kayatthā ṇaṁ tē īsarapabhiyaō kayapunnā ṇaṁ tē īsarapabhiyaō kayalakkhāṇā ṇaṁ jēsiṁ ṇaṁ rāyagihassa bahiyā bahūō vāvīō pōkkhariṇīō jāva sarasarapantiyāō jattha ṇaṁ bahujaṇō ṇhāi ya piyaï ya pāṇiyaṁ ca saṁvahaï, taṁ sēyaṁ khalu mama kallaṁ pāuppabhāyāē jāva sēṇiyaṁ rāyaṁ āpucchittā rāyagihassa bahiyā uttarapuratthimē disībhāgē vēbbhārapavvayassa adūrasāmantē vatthupāḍhagarōiyaṁsi bhūmibhāgaṁsi jāva nandaṁ pōkkhariṇiṁ khaṇāvēttaē tti kaṭṭu ēvaṁ sampēhēi sampēhēttā kallaṁ pāuppabhāyāē jāva pōsahaṁ pārēi pārēttā ṇhāē kayabalikammē mitta-nāi-jāva samparivuḍē mahatthaṁ jāva pāhuḍaṁ gēṇhaï gēṇhittā jēṇēva sēṇiē rāyā tēṇēva uvāgacchaï jāva pāhuḍaṁ uvaṭṭhavēi uvaṭṭhavēttā ēvaṁ vayāsī—

1.13.1.8

icchāmi ṇaṁ sāmī! tubbhēhiṁ abbhaṇuṇṇāē samāṇē rāyagihassa bahiyā jāva khaṇāvēttaē, ahāsuhaṁ dēvāṇuppiyā! taē ṇaṁ sē nandē sēṇiēṇaṁ raṇṇā abbhaṇuṇṇāē samāṇē haṭṭhatuṭṭhē rāyagihaṁ majjhaṁmajjhēṇaṁ niggacchaï niggacchittā vatthupāḍhaya-rōiyaṁsi bhūmibhāgaṁsi nandaṁ pōkkhariṇiṁ khaṇāvēuṁ payattē yāvi hōtthā.

1.13.1.9

taē ṇaṁ sā nandā pōkkharaṇī anupuvvēṇaṁ khammamāṇā-khammamāṇā pōkkharaṇī jāyā yāvi hōtthā-cāukkōṇā samatīrā anupuvvaṁ sujāyāvappasīyalajalā sañchannapatta-bisa-muṇālā bahuuppala-paüma-kumudanaliṇa-subhaga-sōgandhiya-puṇḍarīya-mahāpuṇḍarīyasayapatta-sahassa-patta-papphullakēsarōvavēyā parihattha-bhamanta-macchappaya aṇēga-saüṇagaṇa-mihuṇa-viyariya-saddunnaïya-mahurasaranāiyā pāsāīyā darisaṇijjā abhirūvā paḍirūvā.

1.13.1.10

taē ṇaṁ sē nandē maṇiyārasēṭṭhī nandāē pōkkhariṇīē caüdisiṁ cattāri vaṇasaṇḍē rōvāvēi, taē ṇaṁ tē vaṇasaṇḍā anupuvvēṇaṁ sārakkhijjāmāṇā saṅgōvijjamāṇā saṁvaḍḍhijjamāṇā ya sē vaṇasaṇḍā jāyā-kiṇhā jāva mahāmēha-niurambabhūyā pattiyā pupphiyā jāva uvasōbhēmāṇā-uvasō-bhēmāmā ciṭṭhanti.

1.13.1.11

taē ṇaṁ nandē puratthimillē vaṇasaṇḍē ēgaṁ mahaṁ cittasabhaṁ kārāvēi-aṇēgakhambhasayasaṇṇiviṭṭhaṁ pāsāīyaṁ0 tattha ṇaṁ bahūṇi kiṇhāṇi ya jāva sukkilāṇi ya kaṭṭhakammāṇi ya pōtthakammāṇi ya citta-lēppa-ganthima-vēḍhima-pūrima-saṅghāimāiṁ uvadaṁsijjamāṇāiṁ-uvadaṁsijjamāṇāiṁ ciṭṭhanti tattha ṇaṁ bahūṇi āsaṇāṇi ya sayaṇāṇi ya atthuya-paccatthuyāiṁ ciṭṭhanti, tattha ṇaṁ bahavē naḍā ya naṭṭā ya jāva dinnabhaï-bhatta-vēyaṇā tālāyarakammaṁ karēmāṇā karēmāṇā viharanti rāyagihaviṇiggaō ēttha ṇaṁ bahujaṇō tēsu puvvannatthēsu āsaṇasayaṇēsu saṇṇi-saṇṇō ya santuyaṭṭō ya suyamāṇō ya pēcchamāṇō ya sāhēmāṇō ya suhaṁsuhēṇaṁ viharaï.

1.13.1.12

taē ṇaṁ nandē maṇaïyārasēṭṭhī dāhiṇillē vaṇasaṇḍē ēgaṁ mahaṁ mahāṇasasālaṁ kārāvēi-aṇēgakhambhasaṇṇiviṭṭhaṁ jāva paḍirūvaṁ tattha ṇaṁ bahavē purisā dinnabhaï-bhattavēyaṇā viulaṁ asaṇa-pāṇa-khāima-sāimaṁ uvakkhaḍēnti bahūṇaṁ samaṇa-māhaṇa-atihi-kivaṇa-vaṇīmagāṇaṁ paribhāēmāṇā-paribhāēmāṇā viharanti.

1.13.1.13

taē ṇaṁ nandē maṇiyārasēṭṭhī paccatthimillē vaṇasaṇḍē ēgaṁ mahaṁ tigicchayasālaṁ kārāvēi-aṇēgakhambhasayasaṇṇiviṭṭhaṁ jāva paḍirūvaṁ, tattha ṇaṁ bahavē vējjā ya vējjaputtā ya jāṇuyā ya jāṇuyaputtā ya kusalā ya kusalaputtā ya dinnabhaï-bhatta-vēyaṇā bahūṇaṁ vāhiyāṇa ya gilāṇāṇa ya rōgiyāṇa ya dubbalāṇa ya tēicchakammaṁ karēmāṇā viharanti, aṇṇē ya ēttha bahavē purisā dinnabhaï bhatta-vēyaṇā tēsiṁ bahūṇaṁ vāhiyāṇa ya gilāṇāṇa ya rōgiyāṇa ya dubbalāṇa ya ōsaha-bhēsajja-bhattapāṇēṇaṁ paḍiyārakammaṁ karēmāṇā viharanti.

1.13.1.14

taē ṇaṁ nandē maṇiyārasēṭṭhī uttarillē vaṇasaṇḍē ēgaṁ mahaṁ alaṅkāriyasabhaṁ kārāvēi aṇēgakhambhasayasaṇṇiviṭṭhaṁ jāva paḍirūvaṁ, tattha ṇaṁ bahavē alaṅkāriya-maṇussā dinnabhaï-bhatta-vēyaṇā bahūṇaṁ samaṇāṇa ya aṇāhāṇa ya gilāṇāṇa ya rōgiyāṇa ya dubbalāṇa ya alaṅkāriyakammaṁ karēmāṇā-karēmāṇā viharanti.

1.13.1.15

taē ṇaṁ tīē nandāē pōkkhariṇīē bahavē saṇāhā ya aṇāhā ya panthiyā ya pahiyā ya karōḍiyā ya taṇahārā ya pattahārā ya kaṭṭhahārā ya-appēgaïyā ṇhāyanti appēgaïyā pāṇiyaṁ piyanti appēgaïyā pāṇiyaṁ saṁvahanti appēgaïyā visajjiyasēya jalla-mala-parissama-niddakhuppivāsā suhaṁsuhēṇaṁ viharanti. rāyagihaviṇiggaō vi yattha bahujaṇō kiṁ tē jalaramaṇavivihamajjaṇa-kayalilayāharayakusuma-sattharaya-amēgasaüṇagaṇa-kayaribhiyasaṅkulēsu suhaṁsuhēṇaṁ abhiramamāṇō-abhiramamāṇō viharaï.

1.13.1.16

taē ṇaṁ nandāē pōkkhariṇīē bahujaṇō ṇhāyamāṇō ya piyamāṇō ya pāṇiyaṁ ca saṁvahamāṇō ya aṇaṇamaṇṇaṁ ēvaṁ vayāsī — dhaṇṇē ṇaṁ dēvāṇuppiyaṁ! nandē maṇiyārasēṭṭhī kayatthē jāva jammajīviyaphalē jassa ṇaṁ imēyārūvā nandā pōkkhariṇī cāukkōṇā jāva paḍirūvā, jassa ṇaṁ puratthimillē taṁ cēva savvaṁ caüsu vi vaṇasaṇḍēsu jāva rāyagihaviṇiggaō jattha bahujaṇō āsaṇēsu ya sayaṇēsu ya saṇṇisaṇṇō ya santuyaṭṭō ya pēcchamāṇō ya sāhēmāṇō ya suhaṁsuhēṇaṁ viharaï, taṁ dhannē kayatthē kayalakkhaṇē kayapunnē kayā ṇaṁ lōyā! suladdhē māṇussaē jammījiviyaphalē nandassa maṇiyārassa, tatē ṇaṁ rāyagihē siṅghāḍaga-jāva-pahēsu bahujaṇō aṇṇamaṇṇassa ēvamāikkhaï ēvaṁ bhāsaï ēvaṁ pannavēi ēvaṁ parūvēi- dhannē ṇaṁ dēvāṇuppiyā nandē maṇiyārasēṭṭhī sō cēva gamaō jāva suhaṁsuhēṇaṁ viharaï.

1.13.1.17

taē ṇaṁ sē nandē maṇiyārasēṭṭhī bahujaṇassa antiē ēyamaṭṭhaṁ sōccā nisamma haṭṭhatuṭṭhē dhārāhata-kalambagaṁ viva samūsaviyarōmakūvē paraṁ sāyāsōkkhamaṇubhavamāṇē viharaï.

1.13.2.1

taē ṇaṁ tassa nandassa maṇiyārasēṭṭhissa aṇṇayā kayāi sarīragaṁsi sōlasa rōgāyaṅkā pāubbhūyā taṁ jahā—

1.13.2.2

sāsē kāsē jarē dāhē kucchisūlē bhagandarē .
arisā ajīraē diṭṭhī- muddhasūlē akāraē .
acchivēyaṇā kaṇṇavēyaṇā kaṇḍū daüdarē kōḍhē ..

1.13.3.1

taē ṇaṁ sē nandē maṇiyārasēṭṭhī sōlasahiṁ rōyāyaṅkēhiṁ abhibhūē samāṇē kōḍumbiyapurisē saddāvēi saddāvēttā ēvaṁ vayāsī — gacchaha ṇaṁ tubbhē dēvāṇuppiyā! rāyagihē nayarē siṅghāḍaga-jāva pahēsu mahayā-mahayā saddēṇaṁ ugghōsēmāṇā-ugghōsēmāṇā ēvaṁ vayaha-ēvaṁ khalu dēvāṇuppiyā nandassa maṇiyārassa sarīragaṁsi sōlasa rōyāyaṅkā pāubbhūyā taṁ jahā— sāsē jāva kōḍhē taṁ jō ṇaṁ icchaï dēvāṇuppiyā! vijjō vā vijjaputtō vā jāṇuō vā jāṇuaputtō vā kusalō vā kusalaputtō vā nandassa maṇiyārassa tēsiṁ ca ṇaṁ sōlasaṇhaṁ rōgāyaṅkāṇaṁ ēgamavi rōgāyaṅkaṁ uvāsamittaē tassa ṇaṁ nandē maṇiyārasēṭṭhī viulaṁ atthasampayāṇaṁ dalayaï tti kaṭṭu dōccampi taccampi ghōsaṇaṁ ghōsēha ghōsēttā ēyamāṇattiyaṁ paccappiṇaha, tēvi tahēva paccappiṇanti.

1.13.3.2

taē ṇaṁ rāyagihē nagarē imēyārūvaṁ ghōsaṇaṁ sōccā nisamma bahavē vējjā ya vējjaputtā ya kusalaputtā ya satthakōsahatthagayā ya kōsagapāya hatthagayā ya siliyāhatthagayā ya guliyāhatthagayā ya ōsaha-bhēsajjahatthagayā ya saēhiṁ saēhiṁ gihēhintō nikkhamanti nikkhamittā rāyagihaṁ majjhaṁmajjhēṇaṁ jēṇēva nandassa maṇiyārasēṭṭhissa gihē tēṇēva uvāgacchanti uvāgacchittā nandassa sarīraṁ pāsanti, tēsiṁ rōgāyaṅkāṇaṁ niyāṇaṁ pucchanti, nandassa maṇiyārasēṭṭhiyassa bahuhiṁ uvvalaṇēhiṁ ya uvavaṭṭaṇēhi ya siṇēhapāṇēhi ya vamaṇēhi ya virēyaṇēhi ya sēyaṇēhi ya avadahaṇēhiṁ ya avaṇhāvaṇēhi ya aṇuvāsavaṇāhi ya vattikammēhi ya nirūhēhi ya sirāvēhēhi ya tacchaṇāhi ya pacchaṇāhi ya sirāvatthīhi ya tappaṇāhi ya puḍhavāēhi ya challīhi ya vallīhi ya mūlēhi ya kandēhi ya pattēhi ya pupphēhi ya phalēhi ya bīēhi ya siliyāhi ya guliyāhi ya ōsahēhi ya bhēsajjēhi ya icchanti tēsiṁ sōlasaṇhaṁ rōgāyaṅkāṇaṁ ēgamavi rōgāyaṅkaṁ uvasāmittaē, nō cēva ṇaṁ sañcāēnti uvasāmēttaē.

1.13.3.3

taē ṇaṁ tē bahavē vējjā ya vējjaputtā ya0 jāhē nō sañcāēnti tēsiṁ sōlasaṇhaṁ rōgāyaṅkāṇaṁ ēgamavi rōgāyaṅkaṁ uvasāmittaē tāhē santā tantā jāva paḍigayā.

1.13.3.4

taē ṇaṁ nandē tēhiṁ sōlasēhiṁ rōgāyaṅkēhi abhibhūē samāṇē nandāē pukkhariṇīē mucchiē gaḍhiē giddhē ajjhōvavaṇṇē tirikkhajōṇiēhiṁ nibaddhāuē baddhapaēsiē aṭṭa-duhaṭṭa-vasaṭṭē kālamāsē kālaṁ kiccā nandāē pōkkhariṇīē daddurīē kucchiṁsi daddurattāē uvavaṇṇē.

1.13.3.5

taē ṇaṁ nandē daddurē gabbhāō viṇimukkē samāṇē ummukkabālabhāvē viṇṇāyapariṇayamittē jōvvaṇagamaṇuppattē nandāē pōkkhariṇīē abhiramamāṇē-abhiramamāṇē viharaï, taē ṇaṁ nandāē pōkkhariṇīē bahujaṇō ṇhāyamāṇō ya piyamāṇō ya pāṇiyaṁ ca saṁvahamāṇō ya aṇṇamaṇṇaṁ ēvamāikkhaï ēvaṁ bhāsaï ēvaṁ pannavēi ēvaṁ parūvēi- dhannē ṇaṁ dēvāṇuppiyā! nandē maṇiyārē jassa ṇaṁ imēyārūvā nandā pukkhariṇī-cāukkōṇā jāva paḍirūvā jassa ṇaṁ puratthimillē vanasaṇḍē cittasabhā anēgakhambha0 tahēva cattāri sāhāō jāva jamjīviyaphalē, taē ṇaṁ tassa daddurassa taṁ abhikkhaṇaṁ-abhikkhaṇaṁ bahujaṇassa antiē ēyamaṭṭhaṁ sōccā nisamma imēyārūvē ajjhatthiē cintiē pattiē maṇōgaē saṅkappē samuppajjitthā—

1.13.3.6

kahiṁ mannē maē imēyārūvē saddē nisantapuvvē tti kaṭṭu subhēṇaṁ pariṇāmēṇaṁ jāva jāīsaraṇē samuppaṇṇē, puvvajāiṁ sammaṁ samāgacchaï, taē ṇaṁ tassa daddurassa imēyārūvē ajjhatthiē cintiē patthiē maṇōgaē saṅkappē samuppajjitthā — ēvaṁ khalu ahaṁ ihēva rāyagihē nayarē nandē nāmaṁ maṇiyārē-aḍḍhē, tēṇaṁ kālēṇaṁ tēṇaṁ samaēṇaṁ samaṇē bhagavaṁ mahavīrē samōsaḍhē.

1.13.3.7

taē ṇaṁ maē samaṇassa bhagavaō mahāvīrassa antiē pañcāṇuvvaïē sattasikkhāvaïē-jāva paḍivaṇṇē, taē ṇaṁ ahaṁ aṇṇayā kayāi asāhudaṁsaṇēṇaṁ ya jāva micchatta vippaḍivaṇṇē.

1.13.3.8

taē ṇaṁ ahaṁ aṇṇayā kayāī gimhakālasayaṁsi jāva pōsahaṁ uvasampajjittā ṇaṁ viharāmi, ēvaṁ jahēva cintā āpucchaṇā nandāpukkhariṇī vaṇasaṇḍā sabhāō taṁ cēva savvaṁ jāva nandāē daddurattāē uvavaṇṇē, taṁ ahō ṇaṁ ahaṁ adhaṇṇē apunnē akayapunnē nigganthāō pāvayaṇāō naṭṭhē bhaṭṭhē parivabbhaṭṭhē taṁ sēyaṁ khalu mamaṁ sayamēva puvvapaḍivaṇṇāiṁ pañcāṇuvvayāiṁ uvasampajjittā ṇaṁ viharittaē, ēvaṁ sampēhēi sampēhēttā puvvapaḍivaṇṇāiṁ pañcāṇuvvayāiṁ ārūhēi āruhēttā imēyārūvaṁ abhiggahaṁ abhigiṇhaï- kappaï mē jāvajjīvaṁ chaṭṭhañchaṭṭhēṇaṁ aṇikkhittēṇaṁ tavōkammēṇaṁ appāṇaṁ bhāvēmāṇassa viharittaē, chaṭṭhassa vi ya ṇaṁ pāraṇagaṁsi kappaï mē nandāē pōkkhariṇīē paripērantēsu phāsuēṇaṁ ṇhāṇōdaēṇaṁ ummaddaṇōlōliyāhi ya vittiṁ kappēmāṇassa viharittaē-imēyārūvaṁ abhiggahaṁ abhigēṇhaï, jāvajjīvāē chaṭṭhaṁ-chaṭṭhēṇaṁ jāva viharaï.

1.13.3.9

tēṇaṁ kālēṇaṁ tēṇaṁ samaēṇaṁ ahaṁ gōyamā! guṇasilaē samōsaḍhē, parisā niggayā, taē ṇaṁ nandāē pōkkhariṇīē bahujaṇō ṇhāyamāṇō ya piyamāṇō ya pāṇiyaṁ ca saṁvahamāṇō ya aṇṇamaṇṇaṁ ēvamāikkhaï-jāva samaṇē bhagavaṁ mahāvīrē ihēva guṇasilaē cēiē samōsaḍhē, taṁ gacchāmō ṇaṁ dēvāṇuppiyā samaṇaṁ bhagavaṁ mahāvīraṁ vandāmō jāva pajjuvāsāmō ēyaṁ mē ihabhavē parabhavē ya hiyāē jāva āṇugāmiyattāē bhavissaï, taē ṇaṁ tassa daddurassa bahujaṇassa antiē ēyamaṭṭhaṁ sōccā nisamma0 ayamēyārūvē ajjhatthiē cintiē patthiē maṇōgaē saṅkappē samuppajjitthā — ēvaṁ khalu samaṇē0 taṁ gacchāmi ṇaṁ samaṇaṁ0 vandāmi- ēvaṁ sampahēi sampēhēttā nandāō pōkkhariṇīō saṇiyaṁ-saṇiyaṁ paccuttarēi jēṇēva rāyamaggē tēṇēva uvāgacchaï uvāgacchittā tāē ukkiṭṭhāē0 dadduragaīē vīīvayamāṇē-vīīvayamāṇē jēṇēva mamaṁ antiē tēṇēva pahārēttha gamaṇāē.

1.13.3.10

imaṁ ca ṇaṁ sēṇiē rāyā bhambhasārē ṇhāē kayakōuya0 jāva savvālaṅkāravibhūsiē hatthi-khandhavaragaē sakōrēṇṭamalladāmēṇaṁ chattēṇaṁ0 sēyavaracāmarēhi0 haya-gaya-raha-bhaḍa-caḍagara0 cāuraṅgiṇīē sēṇāē saddhiṁ samparivuḍē mama pāyavandaē havvamāgacchaï.

1.13.3.11

taē ṇaṁ sē daddurē sēṇiyassa raṇṇō ēgēṇaṁ āsakisōraēṇaṁ vāmapāēṇaṁ akkantē samāṇē antanigghāiē kaē yāvi hōtthā, taē ṇaṁ sē daddurē athāmē abalē avīriē apurisakkāraparakkamē adhāra-ṇijjamittikaṭṭu ēgantamavakkamaï0 karayalapariggahiyaṁ0 namōtthu ṇaṁ arahantāṇaṁ jāva siddhigaïnāmadhējjaṁ ṭhāṇaṁ sampattāṇaṁ, namōtthu ṇaṁ samaṇassa bhagavaō mahāvīrassa jāva siddhigaïnāmadhējjaṁ ṭhāṇaṁ sampāviukāmassa puvvimpi ya ṇaṁ maē samaṇassa bhagavaō mahāvīrassa antiē thūlaē pāṇāivāē paccakkhāē jāva thūlaē pariggahē paccakkhāē, taṁ iyāṇiṁ pi tassēva antiē savvaṁ pāṇāivāyaṁ paccakkhāmi jāva savvaṁ pariggahaṁ paccakkhāmi jāvajjīvaṁ savvaṁ asaṇa-pāṇa-khāima-sāimaṁ paccakkhāmi jāvajjīvaṁ jampi ya imaṁ sarīraṁ iṭṭhaṁ kantaṁ jāva mā phusantu ēyampi ya ṇaṁ carimēhiṁ ūsāsēhiṁ vōsirāmi tti kaṭṭu, taē ṇaṁ sē daddurē kālamāsē kālaṁ kiccā jāva sōhammē kappē dadduravaḍiṁsaē vimāṇē uvavāya-sabhāē dadduradēvattāē uvavaṇṇē, ēvaṁ khalu gōyamā! daddurēṇaṁ sā divvā dēviḍḍhī laddhā pattā abhisa-maṇṇāgayā.

1.13.3.12

daddurassa ṇaṁ bhantē! dēvassa kēvaïyaṁ kālaṁ ṭhiī pannattā? gōyamā! cattāri palaviōvamāiṁ ṭhiī pannattā, sē ṇaṁ daddurē dēvē mahāvidēhē vāsē sijjhihii bujjhihii jāva antaṁ karēhii ya.

1.13.3.13

ēvaṁ khalu jambū samaṇēṇaṁ bhagavayā mahāvīrēṇaṁ jāva sampattēṇaṁ tērasamassa nāyajjhayaṇassa ayamaṭṭhē pannattē tti bēmi.

Translations (2)

Commentaries (2)

Discussed in (1)