Nayadhammakahao 1.2.9.1

1.2.9.1

taē ṇaṁ tē nagaraguttiyā vijayassa takkarassa payamaggamaṇugacchamāṇā jēṇēva māluyā-kacchaē tēṇēva uvāgacchanti uvāgacchittā māluyākacchagaṁ anuppavisanti anuppavisittā vijayaṁ takkaraṁ sasakkhaṁ sahōḍhaṁ sagēvējjaṁ jīvaggāhaṁ gēṇhanti gēṇhittā aṭṭhi-muṭṭhi-jāṇukōppara-pahāra-sambhagga-mahiya-gattaṁ karēnti karēttā avaüḍā bandhaṇaṁ karēnti karēttā dēvadinnassa dāragassa ābharaṇaṁ gēṇhanti gēṇhittā vijayassa takkarassa gīvāē bandhanti bandhittā māluyākacchagāō paḍiṇikkhamanti paḍinikkhamittā jēṇēva rāyagihē nayarē tēṇēva uvāgacchanti uvāgacchittā rāyagihaṁ nayaraṁ anuppavisanti anuppavisittā rāyagihē nayarē siṅghāḍaga-tiga-caükka-caccara-caümmuha-mahāpahapahēsu kasappahārē ya chivāpahārē ya layāpahārē ya nivāēmāṇā-nivāēmāṇā chāraṁ ca dhūliṁ ca kayavaraṁ ca uvariṁ pakiramāṇā-pakiramāṇā mahayā-mahayā saddēṇaṁ ugghōsēmāṇā ēvaṁ vayanti-