Nayadhammakahao 1.2.9.2

1.2.9.2

ēsa ṇaṁ dēvāṇuppiyā vijaē nāmaṁ takkarē-jāva giddhē viva āmisabhakkhī bālaghāyaē bālamāraē, taṁ nō khalu dēvāṇuppiyā! ēyassa kēi rāyā vā rāyaputtē vā rāyamaccē vā avarajjhaï ētthaṭṭē appaṇō sayāiṁ kammāiṁ avarajjhanti tti kaṭṭu jēṇāmēva cāragasālā tēṇāmēva uvāgacchanti uvāgacchittā haḍi-bandhaṇaṁ karēnti karēttā bhattapāṇanirōhaṁ karēnti karēttā tisañjhaṁ kasappahārē ya chivāpahārē ya layāpahārē ya nivāēmāṇā viharanti taē ṇaṁ sē dhaṇē satthavāhē mittanāi-niyaga-sayaṇa-sambandhi-pariyaṇēṇaṁ saddhiṁ rōyamāṇē [kandamāṇē] vilavamāṇē dēvadinnassa dāragassa sarīrassa mahayā iḍḍhīsakkāra-samuddaēṇaṁ nīharaṇaṁ karēti karēttā bahūiṁ lōiyāiṁ mayagakiccāiṁ karēti karēttā kēṇaï kālantarēṇaṁ avagayasōē jāē yāvi hōtthā.