Uvasagadasao 1.10

1.10

tae ṇaṃ se ānaṃde gāhāvaī samaṇassa bhagavao mahāvīrassa aṃtie paṃcāṇuvvaiyaṃ sattasikkhāvaiyaṃ–duvālasavihaṃ sāvayadhammaṃ paḍivajjati, paḍivajjittā samaṇaṃ bhagavaṃ mahāvīraṃ vaṃdai namaṃsai, vaṃdittā namaṃsittā evaṃ vayāsī–no khalu me bhaṃte! kappai ajjappabhiiṃ annautthie vā annautthiya-devayāṇi vā annautthiya-pariggahiyāṇi vā arahaṃtaceiyāiṃ vaṃdittae vā namaṃsittae vā, puvviṃ aṇālatteṇaṃ ālavittae vā saṃlavittae vā, tesiṃ asaṇaṃ vā pānaṃ vā khāimaṃ vā sāimaṃ vā dāuṃ vā anuppadāuṃ vā, nannattha rāyābhiogeṇaṃ gaṇābhiogeṇaṃ balābhiogeṇaṃ devayābhiogeṇaṃ guruniggaheṇaṃ vittikaṃtāreṇaṃ|
kappai me samaṇe niggaṃthe phāsu-esaṇijjeṇaṃ asana-pāna-khāima-sāimeṇaṃ vattha-paḍiggaha-kaṃbala-pāyapuṃchaṇeṇaṃ pīḍha-phalaga-sejjā-saṃthāraeṇaṃ osaha-bhesajjeṇa ya paḍilābhemāṇassa viharittae–tti kaṭṭu imaṃ eyārūvaṃ abhiggahaṃ abhigiṇhai, abhigiṇhittā pasiṇāiṃ pucchai, pucchittā aṭṭhāiṃ ādiyai, ādittā samaṇaṃ bhagavaṃ mahāvīraṃ tikkhutto vaṃdai namaṃsai, vaṃdittā namaṃsittā, samaṇassa bhagavao mahāvīrassa aṃtiyāo dūipalāsāo ceiyāo paḍinikkhamai, paḍinikkhamittā jeṇeva vāṇiyagāme nayare, jeṇeva sae gihe jeṇeva sivānaṃdā bhāriyā? teṇeva uvāgacchai, uvāgacchittā sivaṇaṃdaṃ bhāriyaṃ evaṃ vayāsī–
evaṃ khalu devānuppie! mae samaṇassa bhagavao mahāvīrassa aṃtie dhamme nisaṃte| se vi ya dhamme me icchie paḍicchie abhiruie| taṃ gacchāhi ṇaṃ tumaṃ devānuppie! samaṇaṃ bhagavaṃ mahāvīraṃ vaṃdāhi ṇamaṃsāhi sakkārehi sammāṇehi kallāṇaṃ maṃgalaṃ devayaṃ ceiyaṃ pajjuvāsāhi, samaṇassa bhagavao mahāvīra ssa aṃtie paṃcāṇuvvaiyaṃ sattasikkhāvaiyaṃ–duvālasavihaṃ gihidhammaṃ paḍivajjāhi|