Uvasagadasao 1.11

1.11

tae ṇaṃ sā sivānaṃdā bhāriyā ānaṃdeṇaṃ samaṇovāsaeṇaṃ evaṃ vuttā samāṇā haṭṭhatuṭṭhacittamāṇaṃdiyā pīimaṇā paramasamaṇassiyā harisavasavisappamāṇahiyayā karayalapariggahiyaṃ sirasāvattaṃ matthae aṃjaliṃ kaṭṭu evaṃ sāmi! tti ānaṃdassa samaṇovāsagassa eyamaṭṭhaṃ vinaeṇaṃ paḍisuṇei|
tae ṇaṃ se ānaṃde samaṇovāsae koḍuṃbiyapurise saddāvei, saddāvettā evaṃ vayāsī–khippāmeva bho! devānuppiyā! lahukaraṇajutta-joiyaṃ samakhuravālihāṇa-samalihiyasiṃgaehiṃ jaṃbūṇayāmayakalāvajutta-paivisiṭṭhaehiṃ rayayāmayaghaṃṭa-suttarajjugavarakaṃcaṇa-khaciyanatthapaggahoggahiyaehiṃ nīluppalakayā-melaehiṃ pavaragoṇajuvāṇaehiṃ nānāmaṇikanaga-ghaṃṭiyājālaparigayaṃ sujāyajugajutta-ujjuga -pasattha suviraiya-nimmiyaṃ pavaralakkhaṇovaveyaṃ juttāmeva dhammiyaṃ jāṇappavaraṃ uvaṭṭhaveha, uvaṭṭhavettā mama eyamāṇattiyaṃ paccappiṇaha|
tae ṇaṃ te koḍuṃbiyapurisā ānaṃdeṇaṃ samaṇovāsaeṇaṃ evaṃ vuttā samāṇā haṭṭhatuṭṭha-cittamānaṃdiyā pīimaṇā paramasomanassiyā harisavasa-visappamāṇahiyayā karayalapariggahiyaṃ sirasāvattaṃ matthae aṃjaliṃ kaṭṭu evaṃ sāmi! tti āṇāe vinaeṇaṃ vayaṇaṃ paḍi suṇeṃti, paḍisuṇettā khippāmeva lahukaraṇajutta-joiyaṃ jāva dhammiyaṃ jāṇappavaraṃ uvaṭṭhavettā tamāṇattiyaṃ paccappiṇaṃti|
tae ṇaṃ sā sivānaṃdā bhāriyā ṇhāyā kayabalikammā kaya-kouya-maṃgalapāyacchittā suddhappā-vesāiṃ maṃgallāiṃ vatthāiṃ pavara parihiyā appamahagghābharaṇālaṃkiyasarīrā ceḍiyācakkavālaparikiṇṇā dhammiyaṃ jāṇappavaraṃ duruhai, duruhittā vāṇiyagāmaṃ nayaraṃ majjhaṃmajjheṇaṃ niggacchai, niggacchittā jeṇeva dūipalāsae ceie teṇeva uvāgacchai, uvāgacchittā dhammiyāo jāṇappavarāo paccoruhai, pacco-ruhittā ceḍiyācakkavālaparikiṇṇā jeṇeva samaṇe bhagavaṃ mahāvīre teṇeva uvāgacchai, uvāgacchittā tikkhutto āyāhiṇa-payāhiṇaṃ karei, karettā vaṃdai namaṃsai, vaṃdittā namaṃsittā naccāsaṇṇe nāidūre sussūsamāṇā namaṃsamāṇā abhimuhe vinaeṇaṃ paṃjaliyaḍā pajjuvāsai|
tae ṇaṃ samaṇe bhagavaṃ mahāvīre sivānaṃdāe tīse ya mahaimahāliyāe parisāe jāva dhammaṃ parikahei|
tae ṇaṃ sā sivānaṃdā bhāriyā samaṇassa bhagavao mahāvīrassa aṃtie dhammaṃ soccā nisamma haṭṭhatuṭṭha-cittamāṇaṃdiyā pīimaṇā paramasomaṇassiyā harisavasavisappamāṇahiyayā uṭṭhāe uṭṭhei, uṭṭhettā samaṇaṃ bhagavaṃ mahāvīraṃ tikkhutto āyāhiṇa-payāhiṇaṃ karei, karettā vaṃdai namaṃsai, vaṃdittā namaṃsittā evaṃ vayāsī–
saddahāmi ṇaṃ bhaṃte! niggaṃthaṃ pāvayaṇaṃ, pattiyāmi ṇaṃ bhaṃte! niggaṃthaṃ pāvayaṇaṃ, roemi ṇaṃ bhaṃte! niggaṃthaṃ pāvayaṇaṃ, abbhuṭṭhemi ṇaṃ bhaṃte! niggaṃthaṃ pāvayaṇaṃ| evameyaṃ bhaṃte! tahameyaṃ bhaṃte! avitahameyaṃ bhaṃte! asaṃdiddhameyaṃ bhaṃte! icchiyameyaṃ bhaṃte! paḍicchiyameyaṃ bhaṃte! icchiya-paḍicchiyameyaṃ bhaṃte! se jaheyaṃ tubbhe vadaha| jahā ṇaṃ devānuppiyāṇaṃ aṃtie bahave rāīsara-talavara-māḍaṃbiya-koḍuṃbiya-ibbha-seṭṭhi-senāvai-satthavāhappabhiiyā muṃḍā bhavittā agārāo anagāriyaṃ pavvaiyā, no khalu ahaṃ tahā saṃcāemi muṃḍā bhavittā agārāo anagāriyaṃ pavvaittae| ahaṃ ṇaṃ devānuppiyāṇaṃ aṃtie paṃcāṇuvvaiyaṃ sattasikkhā-vaiyaṃ–duvālasavihaṃ gihidhammaṃ paḍivajjissāmi|
ahāsuhaṃ devānuppiyā! mā paḍibaṃdhaṃ karehi|
tae ṇaṃ sivānaṃdā bhāriyā samaṇassa bhagavao mahāvīrassa aṃtie paṃcāṇuvvaiyaṃ satta-sikkhāvaiyaṃ–duvālasavihaṃ gihidhammaṃ paḍivajjai, paḍivajjittā samaṇaṃ bhagavaṃ mahāvīraṃ vaṃdai namaṃsai, vaṃdittā namaṃsittā tameva dhammiyaṃ jāṇappavaraṃ duruhai, duruhittā jāmeva disaṃ pāubbhūyā, tāmeva disaṃ paḍigayā|