Uvasagadasao 1.9

1.9

ihakhalu ānaṃdāi! samaṇe bhagavaṃ mahāvīre ānaṃdaṃ samaṇovāsagaṃ evaṃ vayāsī–evaṃ khalu ānaṃdā! samaṇovāsaeṇaṃ abhigayajīvājīveṇaṃ uvaladdhapuṇṇapāveṇaṃ āsava-saṃvara-nijjara-kiriyā-ahigaraṇa-baṃdhamokkhakusaleṇaṃ asahejjeṇaṃ, devāsura-nāga-suvaṇṇa-jakkha-rakkhasa-kinnara-kiṃpurisa-garula-gaṃdhavva-mahoragāiehiṃ devagaṇehiṃ niggaṃthāo pāvayaṇāo anaikkamaṇijjeṇaṃ sammattassa paṃca ati-yārā peyālā jāṇiyavvā, na samāyariyavvā, taṃ jahā–1. saṃkā, 2. kaṃkhā, 3. vitigicchā, 4. parapāsaṃḍapasaṃsā, 5. parapāsaṃḍasaṃthavo|
tayānaṃtaraṃ ca ṇaṃ thūlayassa pāṇāivāyaveramaṇassa samaṇovāsaeṇaṃ paṃca atiyārā peyālā jāṇiyavvā, na samāyariyavvā, taṃ jahā–1. baṃdhe 2. vahe 3. chavicchede 4. atibhāre 5. bhattapānavocchede|
tayānaṃtaraṃ ca ṇaṃ thūlayassa musāvāyaveramaṇassa samaṇovāsaeṇaṃ paṃca atiyārā jāṇiyavvā na samāyariyavvā, taṃ jahā–1. sahasābhakkhāṇe 2. rahassabbhakkhāṇe 3. sadāramaṃtabhee 4. mosovaese 5. kūḍalehakaraṇe|
tayānaṃtaraṃ ca ṇaṃ thūlayassa adinnādānaveramaṇassa samaṇovāsaeṇaṃ paṃca atiyārā jāṇiyavvā, na samāyariyavvā, taṃ jahā–1. teṇāhaḍe 2. takkarappaoge 3. viruddharajjātikkame 4. kūḍatula-kūḍamāṇe 5. tappaḍirūvagavavahāre|
tayānaṃtaraṃ ca ṇaṃ sadārasaṃtosīe samaṇovāsaeṇaṃ paṃca atiyārā jāṇiyavvā, na samāyariyavvā, taṃ jahā–1. ittariyapariggahiyāgamaṇaṃ 2. apariggahiyāgamaṇe 3. anaṃgakiḍḍā 4. paravīvāhakaraṇe 5. kāmabhoge tivvābhilāse|
tayānaṃtaraṃ ca ṇaṃ icchāparimāṇassa samaṇovāsaeṇaṃ paṃca atiyārā jāṇiyavvā, na samāyariyavvā, taṃ jahā–1. khettavatthupamāṇātikkame 2. hiraṇṇasuvaṇṇapamāṇātikkame 3. dhaṇadhanna- pamāṇātikkame 4. dupayacauppayapamāṇātikkame 5. kuviyapamāṇātikkame|
tayānaṃtaraṃ ca ṇaṃ disivayassa samaṇovāsaeṇaṃ paṃca atiyārā jāṇiyavvā, na samāyariyavvā, taṃ jahā 1. uḍḍhadisipamāṇātikkame 2. ahodisipamāṇātikkame 3. tiriyadisipamāṇātikkame 4. khettavuḍḍhī 5. satiaṃtaraddhā|
tayānaṃtaraṃ ca ṇaṃ uvabhogaparibhoge duvihe pannatte, taṃ jahā–bhoyaṇao kammao ya|
bhoyaṇao samaṇovāsaeṇaṃ paṃca atiyārā jāṇiyavvā, na samāyariyavvā, taṃ jahā–1. sacittāhāre 2. sacittapaḍibaddhāhāre 3. appauliosahibhakkhaṇayā 4. duppauliosahibhakkhaṇayā 5. tucchosahi-bhakkhaṇayā|
kammao ṇaṃ samaṇovāsaeṇaṃ paṇṇarasa kammādāṇāiṃ jāṇiyavvāiṃ, na samāyariyavvāiṃ, taṃ jahā–1. iṃgālakamme 2. vanakamme 3. sāḍīkamme 4. bhāḍīkamme 5. phoḍīkamme 6. daṃtavāṇijje 7. lakkhavāṇijje 8. rasavāṇijje 9. visavāṇijje 10. kesavāṇijje 11. jaṃtapīlaṇakamme 12. nillaṃchaṇakamme 13. davaggidāvaṇayā 14. saradahatalāgaparisosaṇayā 15. asatījaṇaposaṇayā|
tayānaṃtaraṃ ca ṇaṃ aṇaṭṭhādaṃḍaveramaṇassa samaṇovāsaeṇaṃ paṃca atiyārā jāṇiyavvā, na samāyariyavvā, taṃ jahā–1. kaṃdappe 2. kukkuie 3. moharie 4. saṃjuttāhikaraṇe 5. uvabhogaparibhogā-tiritte|
tayānaṃtaraṃ ca ṇaṃ sāmāiyassa samaṇovāsaeṇaṃ paṃca atiyārā jāṇiyavvā, na samāyariyavvā, taṃ jahā–1. manaduppaṇihāṇe 2. vaiduppaṇihāṇe 3. kāyaduppaṇihāṇe 4. sāmāiyassa satiakaraṇayā 5. sāmāiyassa aṇavaṭṭhiyassa karaṇayā|
tayānaṃtaraṃ ca ṇaṃ desāvagāsiyassa samaṇovāsaeṇaṃ paṃca atiyārā jāṇiyavvā, na samāyariyavvā, taṃ jahā–1. āṇavaṇappaoge 2. pesaṇavaṇappaoge 3. saddāṇuvāe 4. rūvāṇuvāe 5. bahiyāpogga-lapakkheve|
tayānaṃtaraṃ ca ṇaṃ posahovavāsassa samaṇovāsaeṇaṃ paṃca atiyārā jāṇiyavvā, na samāyariyavvā, taṃ jahā–1. appaḍilehiya-duppaḍilehiya-sijjāsaṃthāre 2. appamajjiya-duppamajjiya-sijjāsaṃthāre 3. appaḍilehiya-duppaḍilehiya-uccārapāsavaṇabhūmī 4. appamajjiya-uccārapāsavaṇabhūmī 5. posahovavāsassa sammaṃ ananupālaṇayā|
tayānaṃtaraṃ ca ṇaṃ ahāsaṃvibhāgassa samaṇovāsaeṇaṃ paṃca atiyārā jāṇiyavvā, na samāyariyavvā, taṃ jahā–1. sacitta nikkhevaṇayā 2. sacittapihaṇayā 3. kālātikkame 4. paravavadese 5. macchariyayā|
tayānaṃtaraṃ ca ṇaṃ apacchimamāraṇaṃtiyasaṃlehaṇājjhūsaṇārāhaṇāe paṃca atiyārā jāṇiyavvā, na samāyariyavvā, taṃ jahā –1. ihalogāsaṃsappaoge 2. paralogāsaṃsappaoge 3. jīviyāsaṃsappaoge 4. maraṇāsaṃsappaoge 5. kāmabhogāsaṃsappaoge|