Uvasagadasao 1.12

1.12

bhaṃteti! bhagavaṃ goyame samaṇaṃ bhagavaṃ mahāvīraṃ vaṃdai namaṃsai, vaṃdittā namaṃsittā evaṃ vayāsī–pahū ṇaṃ bhaṃte! ānaṃde samaṇovāsae devānuppiyāṇaṃ aṃtie muṃḍe bhavittā agārāo anagāriyaṃ pavvaittae?
no iṇaṭṭhe samaṭṭhe|
goyamā! ānaṃde ṇaṃ samaṇovāsae bahūiṃ vāsāiṃ samaṇovāsagapariyāgaṃ pāuṇihiti, pāuṇittā ekkārasa ya uvāsagapaḍimāo sammaṃ kāeṇaṃ phāsittā, māsiyāe saṃlehaṇāe attāṇaṃ jjhūsittā, saṭṭhiṃ bhattāiṃ aṇasaṇāe chedettā, āloiya-paḍikkaṃte samāhipatte kālamāse kālaṃ kiccā sohamme kappe aruṇābhe vimāṇe devattāe uvavajjihiti| tattha ṇaṃ atthegaiyāṇaṃ devāṇaṃ cattāri paliovamāiṃ ṭhiī pannattā| tattha ṇaṃ ānaṃdassa vi samaṇovāsagassa cattāri paliovamāiṃ ṭhiī pannattā bhavissaī?
tae ṇaṃ samaṇe bhagavaṃ mahāvīre annadā kadāi vāṇiyagāmāo nayarāo dūipalāsāo ceiyāo paḍinikkhamai, paḍinikkhamittā bahiyā janavayavihāraṃ viharai|