Uvasagadasao 2.23

2.23

tae ṇaṃ se divve pisāyarūve kāmadevaṃ samaṇovāsayaṃ abhīyaṃ atatthaṃ aṇuvvigga akhubhiyaṃ acaliyaṃ asaṃbhaṃtaṃ tusiṇīyaṃ dhammajjhāṇovagayaṃ viharamāṇaṃ pāsai, pāsittā jāhe no saṃcāei kāmadevaṃ samaṇovāsayaṃ niggaṃthāo pāvayaṇāo cālittae vā khobhittae vā vipariṇāmittae vā, tāhe saṃte taṃte paritaṃte saṇiyaṃ-saṇiyaṃ paccosakkai, paccosakkittā posahasālāo paḍinikkhamai, paḍinikkha-mittā divvaṃ pisāyarūvaṃ vippajahai, vippajahittā egaṃ mahaṃ divvaṃ hatthirūvaṃ viuvvai–sattaṃgapaiṭṭhiyaṃ sammaṃ saṃṭhiyaṃ sujātaṃ purato udaggaṃ piṭṭhato varāhaṃ ayākucchiṃ alaṃbakucchiṃ palaṃba-laṃbodarādharakaraṃ abbhuggaya- maula- malliyā- vimala- dhavaladaṃtaṃ kaṃcanakosī- paviṭṭhadaṃtaṃ āṇāmiya- cāva- laliya-saṃvelliyaggasoṃḍaṃ kumma-paḍipuṇṇacalaṇaṃ vīsatinakhaṃ allīṇa-pamāṇajuttapucchaṃ mattaṃ mehamiva gulu-guleṃtaṃ mana-pavana-jaiṇavegaṃ–divvaṃ hatthirūvaṃ viuvvittā jeṇeva posahasālā, jeṇeva kāmadeve samaṇovāsae, teṇeva uvāgacchai, uvāgacchittā kāmadevaṃ samaṇovāsayaṃ evaṃ vayāsī–
haṃbho! kāmadevā! samaṇovāsayā! appatthiyapatthiyā! duraṃta-paṃta-lakkhaṇā! hīnapu-ṇṇacāuddasiyā! siri-hiri-dhii-kitti-parivajjiyā! dhammakāmayā! puṇṇakāmayā! saggakāmayā! mokkhakāmayā! dhammakaṃkhiyā! puṇṇakaṃkhiyā! saggakaṃkhiyā! mokkhakaṃkhiyā! dhammapivāsiyā! puṇṇapivāsiyā! saggapivāsiyā! mokkhapivāsiyā! no khalu kappai tava devānuppiyā! sīlāiṃ vayāiṃ veramaṇāiṃ paccakkhāṇāiṃ posahovavāsāiṃ cālittae vā khobhittae vā khaṃḍittae vā bhaṃjittae vā ujjhittae vā pariccaittae vā, taṃ jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi to taṃ ahaṃ ajja soṃḍāe geṇhāmi, geṇhittā posahasālāo nīṇemi, nīṇettā uḍḍhaṃ vehāsaṃ uvvihāmi, uvvihittā tikkhehiṃ daṃtamusalehiṃ paḍicchāmi, paḍicchittā ahe dharaṇitalaṃsi tikkhutto pāesu lolemi, jahā ṇaṃ tumaṃ devānuppiyā! aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se kāmadeve samaṇovāsae teṇaṃ divveṇaṃ hatthirūveṇaṃ evaṃ vutte samāṇe abhīe atatthe aṇuvvigge akhubhie acalie asaṃbhaṃte tusiṇīe dhammajjhāṇovagae viharai|
tae ṇaṃ se divve hatthirūve kāmadevaṃ samaṇovāsayaṃ abhīyaṃ atatthaṃ anuvviggaṃ akhubhiyaṃ acaliyaṃ asaṃbhaṃtaṃ tusiṇīyaṃ dhammajjhāṇovagayaṃ viharamāṇaṃ pāsai, pāsittā doccaṃ pi taccaṃ pi kāmadevaṃ samaṇovāsayaṃ evaṃ vayāsī– haṃbho! kāmadevā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to taṃ ajja ahaṃ soṃḍāe geṇhāmi, geṇhettā posahasālāo nīṇemi, nīṇettā uḍḍhaṃ vehāsaṃ uvvihāmi, uvvihittā tikkhehiṃ daṃtamusalehiṃ paḍicchāmi, paḍicchettā ahe dharaṇitalaṃsi tikkhutto pāesu lolemi, jahā ṇaṃ tumaṃ devānuppiyā! aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se kāmadeve samaṇovāsae teṇaṃ divveṇaṃ hatthirūveṇaṃ doccaṃ pi taccaṃ pi evaṃ vutte samāṇe abhīe jāva viharai|
tae ṇaṃ se divve hatthirūve kāmadevaṃ samaṇovāsayaṃ abhīyaṃ jāva pāsai, pāsittā āsuratte ruṭṭhe kuvie caṃḍikkie misi misīyamāṇe kāmadevaṃ samaṇovāsayaṃ soṃḍāe geṇheti, geṇhittā uḍḍhaṃ vehāsaṃ uvvihai, uvvihittā tikkhehiṃ daṃtamusalehiṃ paḍicchai, paḍicchittā ahe dharaṇitalaṃsi tikkhutto pāesu lolei|
tae ṇaṃ se kāmadeve samaṇovāsae taṃ ujjalaṃ viulaṃ kakkasaṃ pagāḍhaṃ caṃḍaṃ dukkhaṃ durahiyāsaṃ veyaṇaṃ sammaṃ sahai khamai titikkhai ahiyāsei|