Uvasagadasao 2.24

2.24

tae ṇaṃ se divve hatthirūve kāmadevaṃ samaṇovāsayaṃ abhīyaṃ atatthaṃ aṇuvviggaṃ akhubhiyaṃ acaliyaṃ asaṃbhaṃtaṃ tusiṇīyaṃ dhammajjhāṇovagayaṃ viharamāṇaṃ pāsai, pāsittā jāhe no saṃcāei kāmadevaṃ samaṇovāsayaṃ niggaṃthāo pāvayaṇāo cālittae vā khobhittae vā vipariṇāmittae vā, tāhe saṃte taṃte paritaṃte saṇiyaṃ-saṇiyaṃ paccosakkai, paccosakkittā posahasālāo paḍinikkhamai, paḍi-nikkhamittā divvaṃ hatthirūvaṃ vippajahai, vippajahittā egaṃ mahaṃ divvaṃ sapparūvaṃ viuvvai–uggavisaṃ caṃḍavisaṃ ghoravisaṃ mahākāyaṃ masī-mūsākālagaṃ nayaṇavisarosapuṇṇaṃ aṃjaṇapuṃja-nigarappagāsaṃ rattacchaṃ lohiyaloyaṇaṃ jamalajuyala-caṃcalacalaṃtajīhaṃ dharaṇīyalaveṇibhūyaṃ ukkaḍa-phuḍa-kuḍila-jaḍila-kakkasa-viyaḍa-phaḍāḍovakaraṇadacchaṃ lohāgara-dhammamāṇa-dhamadhameṃtaghosaṃ aṇāgaliyadivvapacaṃḍarosaṃ–divvaṃ sapparūvaṃ viuvvittā jeṇeva posahasālā, jeṇeva kāmadeve samaṇovāsae, teṇeva uvāgacchai, uvāgacchittā kāmadevaṃ samaṇovāsayaṃ evaṃ vayāsī–
haṃbho! kāmadevā! samaṇovāsayā! appatthiyapatthiyā! duraṃta-paṃta-lakkhaṇā! hīnapuṇṇa-cāuddasiyā! siri-hiri-dhii-kitti-parivajjiyā! dhammakāmayā! puṇṇakāmayā! saggakāmayā! mokkhakāmayā! dhammakaṃkhiyā! puṇṇakaṃkhiyā! saggakaṃkhiyā! mokkhakaṃkhiyā! dhammapivāsiyā! puṇṇapivāsiyā! saggapivāsiyā! mokkhapivāsiyā! no khalu kappai tava devānuppiyā! sīlāiṃ vayāiṃ veramaṇāiṃ paccakkhāṇāiṃ posahovavāsāiṃ cālittae vā khobhittae vā khaṃḍittae vā bhaṃjittae vā ujjhittae vā paricca-ittae vā, taṃ jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ajjeva ahaṃ sarasarassa kāyaṃ duruhāmi, duruhittā pacchimeṇaṃ bhāeṇaṃ tikkhutto gīvaṃ veḍhemi, veḍhittā tikkhāhiṃ visaparigatāhiṃ dāḍhāhiṃ uraṃsi ceva nikuṭṭemi, jahā ṇaṃ tumaṃ devānuppiyā! aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se kāmadeve samaṇovāsae teṇaṃ divveṇaṃ sapparūveṇaṃ evaṃ vutte samāṇe abhīe atatthe aṇuvvigge akhubhie acalie asaṃbhaṃte tusiṇīe dhammajjhāṇovagae viharai|
tae ṇaṃ se divve sapparūve kāmadevaṃ samaṇovāsayaṃ abhīyaṃ atatthaṃ aṇuvviggaṃ akhubhiyaṃ acaliyaṃ asaṃbhaṃtaṃ tusiṇīyaṃ dhammajjhāṇovagayaṃ viharamāṇaṃ pāsai, pāsittā doccaṃ pi taccaṃ pi evaṃ vayāsī– haṃbho! kāmadevā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ajjeva ahaṃ sarasarassa kāyaṃ duruhāmi, duru-hittā pacchimeṇaṃ bhāeṇaṃ tikkhutto gīvaṃ veḍhemi, veḍhittā tikkhāhiṃ visaparigatāhiṃ dāḍhāhiṃ uraṃsi ceva nikuṭṭemi, jahā ṇaṃ tumaṃ devānuppiyā! aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se kāmadeve samaṇovāsae teṇaṃ divveṇaṃ sapparūveṇaṃ doccaṃ pi taccaṃ pi evaṃ vutte samāṇe abhīe jāva viharai|
tae ṇaṃ se divve sapparūve kāmadevaṃ samaṇovāsayaṃ abhīyaṃ jāva pāsai, pāsittā āsuratte ruṭṭhe kuvie caṃḍikkie misi misīyamāṇe kāmadevassa sarasarassa kāyaṃ duruhai, duruhittā pacchimeṇaṃ bhāeṇaṃ tikkhutto gīvaṃ veḍhei, veḍhittā tikkhāhiṃ visaparigatāhiṃ dāḍhāhiṃ uraṃsi ceva nikuṭṭei|
tae ṇaṃ se kāmadeve samaṇovāsae taṃ ujjalaṃ viulaṃ kakkasaṃ pagāḍhaṃ caṃḍaṃ dukkhaṃ durahiyāsaṃ veyaṇaṃ sammaṃ sahai khamai titikkhai ahiyāsei|