Uvasagadasao 2.25

2.25

tae ṇaṃ se divve sapparūve kāmadevaṃ samaṇovāsayaṃ abhīyaṃ atatthaṃ aṇuvviggaṃ akhubhiyaṃ acaliyaṃ asaṃbhaṃtaṃ tusiṇīyaṃ dhammajjhāṇovagayaṃ viharamāṇaṃ pāsai, pāsittā jāhe no saṃcāei kāmadevaṃ samaṇovāsayaṃ niggaṃthāo pāvayaṇāo cālittae vā khobhi ttae vā vipariṇāmettae vā, tāhe saṃte taṃte paritaṃte saṇiyaṃ-saṇiyaṃ paccosakkai, paccosakkittā posahasālāo paḍinikkhamai, paḍini-kkhamittā divvaṃ sapparūvaṃ vippajahai, vippajahittā egaṃ mahaṃ divvaṃ devarūvaṃ viuvvai–hāra-virāiya-vacchaṃ kaḍaga-tuḍiya-thaṃbhiyabhuyaṃ aṃgaya-kuṃḍala-maṭṭha-gaṃḍa-kaṇṇapīḍhadhāriṃ vicittahatthābharaṇaṃ vicitta-mālā-mauli-mauḍaṃ kallāṇaga-pavaravatthaparihiyaṃ kallāṇagapavaramallāṇulevaṇaṃ bhāsuraboṃdiṃ palaṃba-vanamāladharaṃ divveṇaṃ vaṇṇeṇaṃ divveṇaṃ gaṃdheṇaṃ divveṇaṃ rūveṇaṃ divveṇaṃ phāseṇaṃ divveṇaṃ saṃghāeṇaṃ divveṇaṃ saṃṭhāṇeṇaṃ divvāe iḍḍhīe divvāe juīe divvāe pabhāe divvāe chāyāe divvāe accīe divveṇaṃ teeṇaṃ divvāe lesāe dasadisāo ujjovemāṇaṃ pabhāsemāṇaṃ pāsāīyaṃ darisaṇijjaṃ abhirūvaṃ paḍirūvaṃ–divvaṃ devarūvaṃ viuvvittā kāmadevassa samaṇovāsayassa posahasālaṃ anuppavisai, anuppavisittā aṃtalikkhapaḍivaṇṇe sakhiṃkhiṇiyāiṃ paṃcavaṇṇāiṃ vatthāiṃ pavara parihie kāmadevaṃ samaṇovāsayaṃ evaṃ vayāsī– haṃbho! kāmadevā! samaṇovāsayā! dhaṇṇesi ṇaṃ tumaṃ devānuppiyā! puṇṇesi ṇaṃ tumaṃ devānuppiyā! kayatthesi ṇaṃ tumaṃ devānuppiyā! kayalakkhaṇesi ṇaṃ tumaṃ devānuppiyā! suladdhe ṇaṃ tava devānuppiyā! mānussae jammajīviyaphale, jassa ṇaṃ tava niggaṃthe pāvayaṇe imeyārūve paḍivattī laddhā pattā abhisamaṇṇāgayā|
evaṃ khalu devānuppiyā! sakke deviṃde devarāyā vajjapāṇī puraṃdare sayakkaū sahassakkhe maghavaṃ pāgasāsaṇe dāhiṇaḍḍhalogāhivaī battīsa-vimāna-sayasahassāhivaī erāvaṇavāhaṇe suriṃde arayaṃbara-vatthadhare ālaiyamālamauḍe nava-hema-cāru-citta-caṃcala-kuṃḍala-vili-hijjamāṇagaṃḍe bhāsuraboṃdī palaṃbavaṇamāle sohamme kappe sohammavaḍeṃsae vimāṇe sabhāe sohammāe sakkaṃsi sīhāsaṇaṃsi caurāsīīe sāmāṇiyasāhassīṇaṃ tāyattīsāe tāvattīsagāṇaṃ, cauṇhaṃ logapālāṇaṃ, aṭṭhaṇhaṃ aggamahisīṇaṃ saparivārāṇaṃ, tiṇhaṃ parisāṇaṃ, sattaṇhaṃ aniyāṇaṃ, sattaṇhaṃ aniyāhivaīṇaṃ, cauṇhaṃ caurāsīṇaṃ āyarakkha-devasāhassīṇaṃ, annesiṃ ca bahūṇaṃ devāṇa ya devīṇa ya majjhagae evamāikkhai, evaṃ bhāsai, evaṃ pannavei, evaṃ parūvei–
evaṃ khalu devā! jaṃbuddīve dīve bhārahe vāse caṃpāe nayarīe kāmadeve samaṇovāsae posahasālāe posahie baṃbhacārī ummukkamaṇisuvaṇṇe vavagayamālāvaṇṇagavilevaṇe nikkhittasatthamusale ege abīe dabbhasaṃthārovagae samaṇassa bhagavao mahāvīrassa aṃtiyaṃ dhammapannattiṃ uvasaṃpajjittā ṇaṃ viharai| no khalu se sakke keṇai deveṇa vā dāṇaveṇa vā jakkheṇa vā rakkhaseṇa vā kinnareṇa vā kiṃpuriseṇa vā mahorageṇa vā gaṃdhavveṇa vā niggaṃthāo pāvayaṇāo cālittae vā khobhittae vā vipariṇāmettae vā|
tae ṇaṃ ahaṃ sakkassa deviṃdassa devaraṇṇo eyamaṭṭhaṃ asaddahamāṇe apattiyamāṇe aroemāṇe ihaṃ havvamāgae| taṃ aho ṇaṃ devānuppiyāṇaṃ iḍḍhī juī jaso balaṃ vīriyaṃ purisakkāra-parakkame laddhe patte abhisamannāgae| taṃ diṭṭhā ṇaṃ devānuppiyāṇaṃ iḍḍhī juī balaṃ vīriyaṃ purisakkāra-parakkame laddhe patte abhisamannāgae| taṃ khāmemi ṇaṃ devānuppiyā! khamaṃtu ṇaṃ devānuppiyā! khaṃtumarihaṃti ṇaṃ devānuppiyā! nāiṃ bhujjo karaṇayāe tti kaṭṭu pāyavaḍie paṃjaliuḍe eyamaṭṭhaṃ bhujjo-bhujjo khāmei, khāmettā jāmeva disaṃ pāubbhūe, tāmeva disaṃ paḍigae|
tae ṇaṃ se kāmadeve samaṇovāsae niruvasaggamiti kaṭṭu paḍimaṃ pārei|
teṇaṃ kāleṇaṃ teṇaṃ samaeṇaṃ samaṇe bhagavaṃ mahāvīre jāva jeṇeva caṃpā nayarī, jeṇeva puṇṇabhadde ceie, teṇeva uvāgacchai uvāgacchittā ahāpaḍirūvaṃ oggahaṃ ogiṇhittā saṃjameṇaṃ tavasā appāṇaṃ bhāvemāṇe viharai|