Uvasagadasao 4.32

4.32

jai ṇaṃ bhaṃte! samaṇeṇaṃ bhagavayā mahāvīreṇaṃ jāva saṃpatteṇaṃ sattamassa aṃgassa uvāsagadasāṇaṃ taccassa ajjhayaṇassa ayamaṭṭhe pannatte, cautthassa ṇaṃ bhaṃte! ajjhayaṇassa ke aṭṭhe pannatte?
evaṃ khalu jaṃbū! teṇaṃ kāleṇaṃ teṇaṃ samaeṇaṃ vāṇārasī nāmaṃ nayarī| koṭṭhae ceie| jiyasattū rāyā|
tattha ṇaṃ vāṇārasīe nayarīe surādeve nāmaṃ gāhāvai parivasai–aḍḍhe jāva bahujanassa aparibhūe|
tassa ṇaṃ surādevassa gāhāvaissa cha hiraṇṇakoḍīo nihāṇapauttāo, cha hiraṇṇakoḍīo vaḍḍhipauttāo, cha hiraṇṇa-koḍīo pavittharapauttāo, cha vvayā dasagosāhassieṇaṃ vaeṇaṃ hotthā|
se ṇaṃ surādeve gāhāvaī bahūṇaṃ jāva āpucchaṇijje paḍipucchaṇijje, sayassa vi ya ṇaṃ kuḍuṃbassa meḍhī jāva savvakajjavaḍḍhāvae yāvi hotthā|
tassa ṇaṃ surādevassa gāhāvaissa vannā nāmaṃ bhāriyā hotthā–ahīna-paḍipuṇṇa-paṃciṃdiyasarīrā jāva mānussae kāmabhoe paccaṇubhavamāṇī viharai|
teṇaṃ kāleṇaṃ teṇaṃ samaeṇaṃ samaṇe bhagavaṃ mahāvīre jāva jeṇeva vāṇārasī nayarī jeṇeva koṭṭhae ceie teṇeva uvāgacchai, uvāgacchittā ahāpaḍirūvaṃ oggahaṃ ogiṇhittā saṃjameṇaṃ tavasā appāṇaṃ bhāvemāṇe viharai|
parisā niggayā|
kūṇie rāyā jahā, tahā jiyasattū niggacchai jāva pajjuvāsai|
tae ṇaṃ se surādeve gāhāvaī imīse kahāe laddhaṭṭhe samāṇe–evaṃ khalu samaṇe bhagavaṃ mahāvīre puvvāṇupuvviṃ caramāṇe gāmāṇugāmaṃ dūijjamāṇe ihamāgae iha saṃpatte iha samosaḍhe iheva vāṇārasīe nayarīe bahiyā koṭṭhae ceie ahāpaḍirūvaṃ oggahaṃ o-giṇhittā saṃjameṇa tavasā appāṇaṃ bhāvemāṇe viharai|
taṃ mahapphalaṃ khalu bho! devānuppiyā! tahārūvāṇaṃ arahaṃtāṇaṃ bhagavaṃtāṇaṃ nāmagoyassa vi savaṇayāe, kimaṃga puṇa abhigamana-vaṃdana-namaṃsaṇa-paḍipucchaṇa-pajjuvāsaṇṇayāe? egassa vi āriyassa dhammiyassa suvayaṇassa savaṇayāe, kimaṃga puṇa viulassa aṭṭhassa gahaṇayāe? taṃ gacchāmi ṇaṃ devānuppiyā! samaṇaṃ bhagavaṃ mahāvīraṃ vaṃdāmi ṇamaṃsāmi sakkāremi sammāṇemi kallāṇaṃ maṃgalaṃ devayaṃ ceiyaṃ pajjuvāsāmi–
evaṃ saṃpehei, saṃpehettā ṇhāe kayavalikamme kayakouya-maṃgalapāyacchitte suddhappāvesāiṃ maṃgallāiṃ vatthāiṃ pavara parihie appamahagghābharaṇālaṃkiyasarīre sayāo gihāo paḍinikkhamai, paḍinikkhamittā sakoreṃṭamalladāmeṇaṃ chatteṇaṃ dharijjamāṇeṇaṃ manussavaggurāparikhitte pādavihāracāreṇaṃ vāṇārasiṃ nayariṃ majjhaṃmajjheṇaṃ niggacchai, niggacchittā jeṇāmeva koṭṭhae ceie, jeṇeva samaṇe bhagavaṃ mahāvīre, teṇeva uvāgacchai, uvāgacchittā samaṇaṃ bhagavaṃ mahāvīraṃ tikkhutto āyāhiṇa-payāhiṇaṃ karei, karettā vaṃdai namaṃsai, vaṃdittā namaṃsittā naccāsaṇṇe nāidūre sussūsamāṇe namaṃsamāṇe abhimuhe vinaeṇaṃ paṃjaliuḍe pajjuvāsai|
tae ṇaṃ samaṇe bhagavaṃ mahāvīre surādevassa gāhāvaissa tīse ya mahaimahāliyāe parisāe jāva dhammaṃ parikahei|
parisā paḍigayā, rāyā ya gae|
tae ṇaṃ se surādeve gāhāvaī samaṇassa bhagavao mahāvīrassa aṃtie dhammaṃ soccā nisamma haṭṭhatuṭṭhacittamāṇaṃdie pīimaṇe paramasomaṇassie harisavasa-visappamāṇahiyae uṭṭhāe uṭṭhei, uṭṭhettā samaṇaṃ bhagavaṃ mahāvīraṃ tikkhutto āyāhiṇa-payāhiṇaṃ karei, karettā vaṃdai namaṃsai, vaṃdittā namaṃsittā evaṃ vayāsī–
saddahāmi ṇaṃ bhaṃte! niggaṃthaṃ pāvayaṇaṃ, pattiyāmi ṇaṃ bhaṃte! niggaṃthaṃ pāvayaṇaṃ, roemi ṇaṃ bhaṃte! niggaṃthaṃ pāvayaṇaṃ, abbhuṭṭhemi ṇaṃ bhaṃte! niggaṃthaṃ pāvayaṇaṃ| evameyaṃ bhaṃte! tahameyaṃ bhaṃte! avitahameyaṃ bhaṃte! asaṃdiddhameyaṃ bhaṃte! icchiyameyaṃ bhaṃte! paḍicchiyameyaṃ bhaṃte! icchiya-paḍicchiyameyaṃ bhaṃte! se jaheyaṃ tubbhe vadaha|
jahā ṇaṃ devānuppiyāṇaṃ aṃtie bahave rāīsara-talavara-māḍaṃbiya-koḍuṃbiya-ibbha-seṭṭhi-senāvai-satthavāhappabhiiyā muṃḍā bhavittā agārāo anagāriyaṃ pavvaiyā, no khalu ahaṃ tahā saṃcāemi muṃḍe bhavittā agārāo anagāriyaṃ pavvaittae| ahaṃ ṇaṃ devānuppiyāṇaṃ aṃtie paṃcāṇuvvaiyaṃ sattasikkhā-vaiyaṃ–duvālasavihaṃ sāvagadhammaṃ paḍivajjissāmi|
ahāsuhaṃ devānuppiyā! mā paḍibaṃdhaṃ karehi|
tae ṇaṃ se surādeve gāhāvaī samaṇassa bhagavao mahāvīrassa aṃtie sāvayadhammaṃ paḍivajjai|
tae ṇaṃ samaṇe bhagavaṃ mahāvīre annadā kadāi vāṇārasīe nayarīe koṭṭhayāo ceiyāo paḍinikkhamai, paḍinikkhamittā bahiyā janavayavihāraṃ viharai|
tae ṇaṃ se surādeve samaṇovāsae jāe–abhigayajīvājīve jāva samaṇe niggaṃthe phāsu-esaṇijjeṇaṃ asana-pāna-khāima-sāimeṇaṃ vattha-paḍiggaha-kaṃbala-pāyapuṃchaṇeṇaṃ osaha-bhesajjeṇaṃ pāḍihārieṇa ya pīḍha-phalaga-sejjā-saṃthāraeṇaṃ paḍilābhemāṇe viharai|
tae ṇaṃ sā dhannā bhāriyā samaṇovāsiyā jāyā–abhigayajīvājīvā jāva samaṇe niggaṃthe phāsu-esaṇijjeṇaṃ asana-pāna-khāima-sāimeṇaṃ vattha-paḍiggaha-kaṃbala-pāyapuṃchaṇeṇaṃ osaha-bhesajjeṇaṃ pāḍihārieṇa ya pīḍha-phalaga-sejjā-saṃcāraeṇaṃ paḍilābhemāṇī viharai|
tae ṇaṃ tassa surādevassa samaṇovāsagassa uccāvaehiṃ sīla-vvaya-guṇa-veramaṇa-paccakkhāṇa-posahovavāsehiṃ appāṇaṃ bhāvemāṇassa coddasa saṃvaccharāiṃ vīikkaṃtāiṃ| paṇṇarasamassa saṃvaccharassa aṃtarā vaṭṭamāṇassa annadā kadāi puvvarattāvarattakālasamayaṃsi dhammajāgariyaṃ jāgaramāṇassa imeyārūve ajjhatthie ciṃtie patthie manogae saṃkappe samuppajjitthā–evaṃ khalu ahaṃ vāṇārasīe nayarīe bahūṇaṃ jāva āpucchaṇijje paḍipucchaṇijje, sayassa vi ya ṇaṃ kuḍuṃbassa meḍhī jāva savvakajjavaḍḍhāvae, taṃ eteṇaṃ vakkheveṇaṃ ahaṃ no saṃcāemi samaṇassa bhagavao mahāvīrassa aṃtiyaṃ dhammapannattiṃ uvasaṃpajjittā ṇaṃ viharittae|
tae ṇaṃ surādeve samaṇovāsae jeṭṭhaputtaṃ mitta-nāi-niyaga-sayaṇa-saṃbaṃdhi-parijanaṃ ca āpucchai, āpucchittā sayāo gihāo paḍinikkhamai, paḍinikkhamittā vāṇārasiṃ nayariṃ majjhaṃmajjheṇaṃ niggacchai, niggacchittā jeṇeva posahasālā, teṇeva uvāgacchai, uvāgacchittā posahasālaṃ pamajjai, pamajjittā uccārapāsavaṇabhūmiṃ paḍilehei, paḍilehittā dabbhasaṃthārayaṃ saṃtharei, saṃtharettā dabbha saṃthārayaṃ duruhai, duruhittā posahasālāe posahie baṃbhayārī ummukkamaṇisuvaṇṇe vavagayamālāvaṇṇagavilevaṇe nikkhittasatthamusale ege abīe dabbhasaṃthārovagae samaṇassa bhagavao mahāvīrassa aṃtiyaṃ dhammapannattiṃ uvasaṃpajjittā ṇaṃ viharai|