Uvasagadasao 4.33

4.33

tae ṇaṃ tassa surādevassa samaṇovāsayassa puvvarattāvarattakālasamayaṃsi ege deve aṃtiyaṃ pāubbhavitthā|
tae ṇaṃ se deve egaṃ mahaṃ nīluppala-gavalaguliya-ayasikusumappagāsaṃ khuradhāraṃ asiṃ gahāya surādevaṃ samaṇovāsayaṃ evaṃ vayāsī–
haṃbho! surādevā! samaṇovāsayā! apatthiyapatthiyā! duraṃta-paṃta-lakkhaṇā! hīnapuṇṇa-cāuddasiyā! siri-hiri-dhii-kitti-parivajjiyā! dhammakāmayā! puṇṇakāmayā! saggakāmayā! mokkhakāmayā! dhammakaṃkhiyā! puṇṇakaṃkhiyā! saggakaṃkhiyā! mokkhakaṃkhiyā! dhammapivāsiyā! puṇṇapivāsiyā! saggapivāsiyā! mokkhapivāsiyā! no khalu kappai tava devānuppiyā! sīlāiṃ vayāiṃ veramaṇāiṃ paccakkhāṇāiṃ posahovavāsāiṃ cālittae vā khobhittae vā khaṃḍittae vā bhaṃjittae vā ujjhittae vā pariccaittae vā, taṃ jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja jeṭṭha puttaṃ sāo gihāo nīṇemi, nīṇettā tava aggao ghāemi, ghāettā paṃca maṃsasolle karemi, karettā ādānabhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se surādeve samaṇovāsae teṇaṃ deveṇaṃ evaṃ vutte samāṇe abhīe atatthe aṇuvvigge akhubhie acalie asaṃbhaṃte tusiṇīe dhammajjhāṇovagae viharai|
tae ṇaṃ se deve surādevaṃ samaṇovāsayaṃ abhīyaṃ atatthaṃ anuvviggaṃ akhubhiyaṃ acaliyaṃ asaṃbhaṃtaṃ tusiṇīyaṃ dhammajjhāṇovagayaṃ viharamāṇaṃ pāsai, pāsittā doccaṃ pi taccaṃ pi surādevaṃ samaṇovāsayaṃ evaṃ vayāsī–haṃbho! surādevā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja jeṭṭhaputtaṃ sāo gihāo nīṇaṃmi, nīṇettā tava aggao ghāemi, ghāettā paṃca maṃsasolle karemi, karettā si kaḍāhayaṃsi addahemi, adda-hettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se surādeve samaṇovāsae teṇe deveṇaṃ doccaṃ pi taccaṃ pi evaṃ vutte samāṇe abhīe jāva viharai|
tae ṇaṃ se deve surādevaṃ samaṇovāsayaṃ abhīyaṃ jāva pāsai, pāsittā āsuratte ruṭṭhe kuvie caṃḍikkie misimisīyamāṇe surādevassa samaṇovāsayassa jeṭṭhaputtaṃ gihāo nīṇei, nīṇettā aggao ghāei, ghāettā paṃca maṃsasolle karei, karettā ādānabhariyaṃsi kaḍāhayaṃsi addahei, addahettā surādevassa samaṇovāsayassa gāyaṃ maṃseṇa ya soṇieṇa ya āiṃcai|
tae ṇaṃ se surādeve samaṇovāsae taṃ ujjalaṃ viulaṃ kakkasaṃ pagāḍhaṃ caṃḍaṃ dukkhaṃ durahiyāsaṃ veyaṇaṃ sammaṃ sahai khamai titikkhai ahiyāsei|
tae ṇaṃ se deve surādevaṃ samaṇovāsayaṃ abhīyaṃ jāva pāsai, pāsittā surādevaṃ samaṇovāsayaṃ evaṃ vayāsī–haṃbho! surādevā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja majjhimaṃ puttaṃ sāo gihāo nīṇemi, nīṇettā tava aggao ghāemi, ghāettā paṃca maṃsasolle karemi, karettā ādāṇabhari-yaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīvi-yāo vavarovijjasi|
tae ṇaṃ se surādeve samaṇovāsae teṇaṃ deveṇaṃ evaṃ vutte samāṇe abhīe jāva viharai|
tae ṇaṃ se deve surādevaṃ samaṇovāsayaṃ abhīyaṃ jāva pāsai, pāsittā doccaṃ pi taccaṃ pi surādevaṃ samaṇovāsayaṃ evaṃ vayāsī–haṃbho! surādevā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja majjhimaṃ puttaṃ sāo gihāo nīṇemi, nīṇettā tava aggao ghāemi, ghāettā paṃca maṃsasolle karemi, karettā ādānabhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se surādeve samaṇovāsae teṇaṃ deveṇaṃ doccaṃ pi taccaṃ pi evaṃ vutte samāṇe abhīe jāva viharai|
tae ṇaṃ se deve surādevaṃ samaṇovāsayaṃ abhīyaṃ jāva pāsai, pāsittā āsuratte ruṭṭhe kuvie caṃḍikkie misimisīyamāṇe surādevassa samaṇovāsayassa majjhimaṃ puttaṃ gihāo nīṇei, nīṇettā aggao ghāei, ghāettā paṃca maṃsasolle karei, karettā ādāṇabha-riyaṃsi kaḍāhayaṃsi addahei, addahettā surādevassa samaṇovāsayassa gāyaṃ maṃseṇa ya soṇieṇa ya āiṃcai|
tae ṇaṃ se surādeve samaṇovāsae taṃ ujjalaṃ jāva veyaṇaṃ sammaṃ sahai khamai titikkhai ahiyāsei|
tae ṇaṃ se deve surādevaṃ samaṇovāsayaṃ abhīyaṃ jāva pāsai, pāsittā surādevaṃ samaṇovāsayaṃ evaṃ vayāsī–haṃbho! surādevā! samaṇovāsayā! jāva jai ṇaṃ tumaṃ ajja sīlāiṃ kayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja kanīyasaṃ puttaṃ sāo gihāo nīṇemi, nīṇettā tava aggao ghāemi, ghāettā paṃca maṃsasolle karemi, karettā ādāṇabhari-yaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīvi-yāo vavarovijjasi|
tae ṇaṃ se surādeve samaṇovāsae teṇaṃ deveṇaṃ evaṃ vutte samāṇe abhīe jāva viharai|
tae ṇaṃ se deve surādevaṃ samaṇovāsayaṃ abhīyaṃ jāva pāsai, pāsittā doccaṃ pi taccaṃ pi surādevaṃ samaṇovāsayaṃ evaṃ vayāsī–haṃbho! surādevā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja kanīyasaṃ puttaṃ sāo gihāo nīṇemi, nīṇettā tava aggao ghāemi, ghāettā paṃca maṃsasolle karemi, karettā ādānabhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se surādeve samaṇovāsae teṇaṃ deveṇaṃ doccaṃ pi taccaṃ pi evaṃ vutte samāṇe abhīe jāva viharai|
tae ṇaṃ se deve surādevaṃ samaṇovāsayaṃ abhīyaṃ jāva pāsai, pāsittā āsuratte ruṭṭhe kuvie caṃḍikkie misimisīyamāṇe surādevassa samaṇovāsayassa kanīyasaṃ puttaṃ gihāo nīṇei, nīṇettā aggao ghāei, ghāettā paṃca maṃsasolle karei, karettā ādāṇa-bhariyaṃsi kaḍāhayaṃsi addahei, addahettā surādevassa samaṇovāsayassa gāyaṃ maṃseṇa ya soṇieṇa ya āiṃcai|
tae ṇaṃ se surādeve samaṇovāsae taṃ ujjalaṃ jāva veyaṇaṃ sammaṃ sahai khamai titikkhai ahiyāsei|
tae ṇaṃ se deve surādevaṃ samaṇovāsayaṃ abhīyaṃ jāva pāsai, pāsittā cautthaṃ pi surādevaṃ samaṇovāsayaṃ evaṃ vayāsī–haṃbho! surādevā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja sarīraṃsi jamagasamagameva solasa rogāyaṃke pakkhivāmi, [taṃ jahā–1. sāse 2. kāse 3. jare 4. dāhe 5. kucchisūle 6. bhagaṃdare 7. arisae 8. ajīrae 9. diṭṭhisūle 10. muddhasūle 11. akārie 12. acchiveyaṇā 13. kaṇṇaveyaṇā 14. kaḍue 15. udare0 16. koḍhe] | jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se surādeve samaṇovāsae teṇaṃ deveṇaṃ evaṃ vutte samāṇe abhīe jāva0 viharai|
tae ṇaṃ se deve surādevaṃ samaṇovāsayaṃ abhīyaṃ jāva pāsai, pāsittā doccaṃ pi taccaṃ pi surādevaṃ samaṇovāsayaṃ evaṃ vayāsī–haṃbho! surādevā! samaṇovāsayā! jāva jai ṇaṃ tumaṃ ajjaṃ sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja sarīraṃsi jamagasamagameva solasa rogāyaṃke pakkhivāmi jāva jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ tassa surādevassa samaṇovāsayassa teṇaṃ deveṇaṃ doccaṃ pi taccaṃ pi evaṃ vuttassa samāṇassa imeyārūve ajjhatthie ciṃtie patthie manogae saṃkappe samuppajjitthā–aho ṇaṃ ime purise anārie anāriyabuddhī anāriyāiṃ pāvāiṃ kammāiṃ samācarati, je ṇaṃ mamaṃ jeṭṭhaputtaṃ sāo gihāo nīṇei, nīṇettā mama aggao ghāei, ghāettā paṃca maṃsasolle karei, karettā ādānabhariyaṃsi kaḍāhayaṃsi addahei, addahettā mamaṃ gāyaṃ maṃseṇa ya soṇieṇa ya āiṃcai, je ṇaṃ mamaṃ majjhimaṃ puttaṃ sāo gihāo nīṇei, nīṇettā mama aggao ghāei, ghāettā paṃca maṃsasolle karei, karettā ādānabhariyaṃsi kaḍāhayaṃsi addahei, addahettā mamaṃ gāyaṃ maṃseṇa ya soṇieṇa ya āiṃcai, je ṇaṃ mamaṃ kanīyasaṃ puttaṃ sāo gihāo nīṇei, nīṇettā mama aggao ghāei, ghāettā paṃca maṃsasolle karei, karettā ādānabhariyaṃsi kaḍāhayaṃsi addahei, addahettā mamaṃ gāyaṃ maṃseṇa ya soṇieṇa ya āiṃcai, je vi ya ime solasa rogāyaṃkā, te vi ya icchai mama sarīraṃsi pakkhivittae, taṃ seyaṃ khalu mamaṃ eyaṃ purisaṃ giṇhittae tti kaṭṭu uddhāvie, se vi ya āgāse uppaie, teṇa ya khabhe āsāie, mahayā-mahayā saddeṇaṃ kolāhale kae|
tae ṇaṃ sā dhannā bhāriyā kolāhalasaddaṃ soccā nisamma jeṇeva surādeve samaṇovāsae, teṇeva uvāgacchai, uvāgacchittā evaṃ vayāsī–kiṇṇaṃ devānuppiyā! tubbhe ṇaṃ mahayā-mahayā saddeṇaṃ kolāhale kae?
tae ṇaṃ se surādeve samaṇovāsae dhannaṃ bhāriyaṃ evaṃ vayāsī–evaṃ khalu devānuppie! na yāṇāmi ke vi purise āsuratte ruṭṭhe kuvie caṃḍikkae misimisīyamāṇe egaṃ mahaṃ nīluppala-gavalaguliya-ayasikusumappagāsaṃ khuradhāraṃ asiṃ gahāya mamaṃ evaṃ vayāsī–haṃbho! surādevā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja jeṭṭhaputtaṃ sāo gihāo nīṇemi, nīṇettā tava aggao ghāemi, ghāettā paṃca maṃsasolle karemi, karettā ādānabhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ ahaṃ teṇa puriseṇaṃ evaṃ vutte samāṇe abhīe jāva viharāmi|
tae ṇaṃ se purise mamaṃ abhīyaṃ jāva pāsai, pāsittā mamaṃ doccaṃ pi taccaṃ pi evaṃ vayāsī–haṃbho! surādevā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posaho-vavāsāiṃ na chaḍḍesi na bhaṃjesi, to jāva tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ ahaṃ teṇaṃ puriseṇaṃ doccaṃ pi taccaṃ pi evaṃ vutte samāṇe abhīe jāva viharāmi|
tae ṇaṃ se purise mamaṃ abhīyaṃ jāva pāsai, pāsittā āsuratte ruṭṭhe kuvie caṃḍikkie misimisīyamāṇe mamaṃ jeṭṭhaputtaṃ gihāo nīṇei, nīṇettā mama aggao ghāei, ghāettā paṃca maṃsasolle karei, karettā ādānabhariyaṃsi kaḍāhayaṃsi addahei, addahettā mamaṃ gāyaṃ maṃseṇa ya soṇieṇa ya āiṃcai| tae ṇaṃ ahaṃ taṃ ujjalaṃ jāva veyaṇaṃ sammaṃ sahāmi khamāmi titikkhāmi ahiyāsemi|
evaṃ majjhimaṃ puttaṃ jāva veyaṇaṃ sammaṃ sahāmi khamāmi titikkhāmi ahiyāsemi| evaṃ kanīyassaṃ puttaṃ jāva veyaṇaṃ sammaṃ sahāmi khamāmi titikkhāmi ahiyāsemi|
tae ṇaṃ se purise mamaṃ abhīyaṃ jāva pāsai, pāsittā mamaṃ cautthaṃ pi evaṃ vayāsī–haṃbho! surādevā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja sarīraṃsi jamagasamagameva solasa rogāyaṃke pakkhivāmi jāva jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ ahaṃ teṇaṃ puriseṇaṃ evaṃ vutte samāṇe abhīe jāva viharāmi|
tae ṇaṃ se purise mamaṃ abhīyaṃ jāva pāsai, pāsittā doccaṃ pi taccaṃ pi mamaṃ evaṃ vayāsī–haṃbho! surādevā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja sarīraṃsi jama-gasamagameva solasa rogāyaṃke pakkhivāmi jāva jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ teṇaṃ puriseṇaṃ doccaṃ pi taccaṃ pi mamaṃ evaṃ vuttassa samāṇassa imeyārūve ajjhatthie ciṃtie patthie manogae saṃkappe samu-ppajjitthā–aho ṇaṃ ime purise anārie anāriyabuddhī anāriyāiṃ pāvāiṃ kammāiṃ samācarati, je ṇaṃ mamaṃ jeṭṭhaṃ puttaṃ sāo gihāo nīṇei, nīṇettā mama aggao ghāei, ghāettā paṃca maṃsasolle karei, karettā ādānabhariyaṃsi kaḍāhayaṃsi addahei, addahettā mamaṃ gāyaṃ maṃseṇa ya soṇieṇa ya āiṃcai, je ṇaṃ mamaṃ majjhimaṃ puttaṃ sāo gihāo nīṇei, nīṇettā mama aggao ghāei, ghāettā paṃca maṃsaso-lle karei, karettā ādānabhariyaṃsi kaḍāhayaṃsi addahei, addahettā mamaṃ gāyaṃ maṃseṇa ya soṇieṇa ya āiṃcai, je ṇaṃ mama kanīyasaṃ puttaṃ sāo gihāo nīṇei, nīṇettā mama aggao ghāei, ghāettā paṃca maṃsasolle karei, karettā ādānabhariyaṃsi kaḍāhayaṃsi addahei, addahettā mamaṃ gāyaṃ maṃseṇa ya soṇieṇa ya āiṃcai, je vi ya ime solasa rogāyaṃkā, te vi ya icchai mama sarīraṃsi pakkhivittae, taṃ seyaṃ khalu mamaṃ eyaṃ purisaṃ giṇhittae tti kaṭṭu uddhāvie, se vi ya āgāse uppaie, mae vi ya khaṃbhe āsāie, mahayā-mahayā saddeṇaṃ kolāhale kae|
tae ṇaṃ sā dhannā bhāriyā surādevaṃ samaṇovāsayaṃ evaṃ vayāsī–no khalu kei purise tava jeṭṭhaputtaṃ sāo gihāo nīṇei nīṇettā tava aggao ghāei, no khalu kei purise tava majjhimaṃ puttaṃ sāo gihāo nīṇei, nīṇettā tava aggao ghāei, no khalu kei purise tava kanīyasaṃ putta sāo gihāo nīṇei, nīṇettā tava aggao ghāei0, no khalu devānuppiyā! tubbhaṃ ke vi purise sarīraṃsi jamagasamagaṃ solasaṃ rogāyaṃke pakkhivai, esa ṇaṃ ke vi purise tubbhaṃ uvasaggaṃ karei, esa ṇaṃ tume vidarisaṇe diṭṭhe| taṃ ṇaṃ tumaṃ iyāṇiṃ bhaggavae bhagganiyame bhaggaposahe viharasi| taṃ ṇaṃ tumaṃ piyā! eyassa ṭhāṇassa āloehi paḍikkamāhi niṃdāhi garihāhi viu-ṭṭāhi visīhehi akaraṇayāe abbhuṭṭhāhi ahārihaṃ pāyacchittaṃ tavokammaṃ paḍivajjāhi|
tae ṇaṃ se surādeve samaṇovāsae dhannāe bhāriyāe taha tti eyamaṭṭhaṃ vinaeṇaṃ paḍisuṇei, paḍisuṇettā tassa ṭhāṇassa āloei paḍikkamai niṃdai garihai viuṭṭai visohei akaraṇayāe abbhuṭṭhei ahārihaṃ pāyacchittaṃ tavokammaṃ paḍivajjai|
tae ṇaṃ se surādeve samaṇovāsae paḍhamaṃ uvāsagapaḍimaṃ uvasaṃpajjittā ṇaṃ viharai|
tae ṇaṃ se surādeve samaṇovāsae paḍhamaṃ uvāsagapaḍimaṃ ahāsuttaṃ ahākappaṃ ahāmaggaṃ ahātaccaṃ sammaṃ kāeṇaṃ phāsei pālei sohei tīrei kittei ārāhei|
tae ṇaṃ se surādeve samaṇovāsae doccaṃ uvāsagapaḍimaṃ, evaṃ taccaṃ, cautthaṃ, paṃcamaṃ, chaṭṭhaṃ, sattamaṃ, aṭṭhamaṃ, navamaṃ, dasamaṃ, ekkārasaṃ uvāsagapaḍimaṃ ahāsuttaṃ ahākappaṃ ahāmaggaṃ ahātaccaṃ sammaṃ kāeṇaṃ phāsei pālei sohei tīrei kittei ārāhei|
tae ṇaṃ se surādeve samaṇovāsae teṇaṃ orāleṇaṃ viuleṇaṃ payatteṇaṃ paggahieṇaṃ tavokammeṇaṃ sukke lukkhe nimmaṃse aṭṭhicammāvaṇaddhe kiḍikiḍiyābhūe kise dhamaṇisaṃtae jāe|
tae ṇaṃ tassa surādevassa samaṇovāsagassa annadā kadāi puvvarattāvarattakālasamayaṃsi dhammajāgariyaṃ jāgaramāṇassa ayaṃ ajjhatthie ciṃtie patthie manogae saṃkappe samuppajjitthā–evaṃ khalu ahaṃ imeṇaṃ eyārūveṇaṃ orāleṇaṃ viuleṇaṃ payatteṇaṃ paggahi-eṇaṃ tavokammeṇaṃ sukke lukkhe nimmaṃse aṭṭhicammāvaṇaddhe kiḍikiḍiyābhūe kise dhamaṇisaṃtae jāe| taṃ atthi tā me uṭṭhāṇe kamme bale vīrie purisakkāra parakkame saddhā-dhii-saṃvege, taṃ jāvatā me atthi uṭṭhāṇe kamme bale vīrie purisakkāra-parakkame saddhā-dhii-saṃvege, jāva ya me dhammāyarie dhammovaesae samaṇe bhagavaṃ mahāvīre jiṇe suhatthī viharai, tāvatā me seyaṃ kallaṃ pāuppabhāyāe rayaṇīe jāva uṭṭhi-yammi sūre sahassarassimmi dinayare teyasā jalaṃte apacchimamāraṇaṃtiyasaṃlehaṇā-jjhūsaṇā-jjhūsiyassa bhattapāna-paḍiyāikkhiyassa, kāla aṇavakaṃkha-māṇassa viharittae–evaṃ saṃpehei, saṃpehettā kallaṃ pāuppabhāyāe rayaṇīe jāva uṭṭhiyammi sūre sahassarassimmi dinayare teyasā jalaṃte apacchimamāraṇaṃtiyasaṃlehaṇā-jjhūsaṇā-jjhūsie bhattapāna-paḍiyāikkhie kālaṃ aṇavakaṃkhamāṇe viharai|
tae ṇaṃ se surādeve samaṇovāsae bahūhiṃ sīla-vvaya-guṇa-veramaṇa-paccakkhāṇa-posahovavāsehiṃ appāṇaṃ bhāvettā, vīsaṃ vāsāiṃ samaṇovāsagapariyāgaṃ pāuṇittā, ekkārasa ya uvāsagapaḍimāo sammaṃ kāeṇaṃ phāsittā, māsiyāe saṃlehaṇāe attāṇaṃ jjhūsittā, saṭṭhiṃ bhattāiṃ aṇasaṇāe chedettā, āloiya-paḍikkaṃte samāhipatte kālamāse kālaṃ kiccā0 sohamme kappe aruṇakaṃte vimāṇe uvavaṇṇe| cattāri paliovamāiṃ ṭhiī| mahāvidehe vāse sijjhihii bujjhihii muccihii savvadukkhāṇamaṃtaṃ kāhii|
evaṃ khalu jaṃbū! samaṇeṇaṃ bhagavayā mahāvīreṇaṃ uvāsagadasāṇaṃ cautthassa ajjhayaṇassa ayamaṭṭhe pannatte0|