Uvasagadasao 5.34

5.34

jai ṇaṃ bhaṃte! samaṇeṇaṃ bhagavayā mahāvīreṇaṃ jāva saṃpatteṇaṃ sattamassa aṃgassa uvāsagadasāṇaṃ cautthassa ajjhayaṇassa ayamaṭṭhe pannatte, paṃcamassa ṇaṃ bhaṃte! ajjhayaṇassa ke aṭṭhe pannatte?
evaṃ khalu jaṃbū! teṇaṃ kāleṇaṃ teṇaṃ samaeṇaṃ ālabhiyā nāmaṃ nayarī| saṃkhavaṇe ujjāṇe| jiyasattū rāyā|
tattha ṇaṃ ālabhiyāe nayarīe cullasayae nāmaṃ gāhāvaī parivasai–aḍḍhe jāva bahujanassa aparibhūe|
tassa ṇaṃ cullasayayassa gāhāvaissa cha hiraṇṇakoḍīo nihāṇapauttāo, cha hiraṇṇakoḍīo vaḍḍhipauttāo, cha hiraṇṇakoḍīo pavittharapauttāo, cha vvayā dasagosāhassieṇaṃ vaeṇaṃ hotthā|
se ṇaṃ cullasayae gāhāvaī bahūṇaṃ jāva āpucchaṇijje paḍipucchaṇijje, sayassa vi ya ṇaṃ kuḍuṃbassa meḍhī jāva savvakajjavaḍḍhāvae yāvi hotthā|
tassa ṇaṃ cullasayayassa gāhāvaissa bahulā nāmaṃ bhāriyā hotthā–ahīna-paḍipuṇṇa-paṃciṃdiyasarīrā jāva mānussae kāmabhoe paccaṇubhavamāṇī viharai|
teṇaṃ kāleṇaṃ teṇaṃ samaeṇaṃ samaṇe bhagavaṃ mahāvīre jāva jeṇeva ālabhiyā nayarī jeṇeva saṃkhavane ujjāṇe teṇeva uvāgacchai, uvāgacchittā ahāpaḍirūvaṃ oggahaṃ ogiṇhittā saṃjameṇaṃ tavasā appāṇaṃ bhāvemāṇe viharai|
parisā niggayā|
kuṇie rāyā jahā, tahā jiyasattū niggacchai jāva pajjuvāsai|
tae ṇaṃ se cullasayae gāhāvaī imīse kahāe laddhaṭṭhe samāṇe–evaṃ khalu samaṇe bhagavaṃ mahāvīre puvvāṇupuvviṃ cara-māṇe gāmāṇugāmaṃ dūijjamāṇe ihamāgae iha saṃpatte iha samosaḍhe iheva ālabhiyāe nayarīe bahiyā saṃkhavaṇe ujjāṇe ahāpaḍirūvaṃ oggahaṃ ogiṇhittā saṃjameṇaṃ tavasā appāṇaṃ bhāvemāṇe viharai|
taṃ mahapphalaṃ khalu bho! devānuppiyā! tahārūvāṇaṃ arahaṃtāṇaṃ bhagavaṃtāṇaṃ nāmagoyassa vi savaṇayāe, kimaṃga puṇa abhigamana-vaṃdana-namaṃsaṇa-paḍipucchaṇa-pajjuvāsaṇayāe? egassa vi āriyassa dhammiyassa suvayaṇassa savaṇayāe, kimaṃga puṇa viulassa aṭṭhassa gahaṇayāe? taṃ gacchāmi ṇaṃ devānuppiyā! samaṇaṃ bhagavaṃ mahāvīraṃ vaṃdāmi ṇamaṃsāmi sakkāremi sammāṇemi kallāṇaṃ maṃgalaṃ devayaṃ ceiyaṃ pajjuvāsāmi–
evaṃ saṃpehei, saṃpehettā ṇhāe kayabalikamme kaya-kouya-maṃgala-pāyacchitte suddhappāvesāiṃ maṃgallāiṃ vatthāiṃ pavara parihie appamahagghābharaṇālaṃkiyasarīre sayāo gihāo paḍinikkhamai, paḍinikkhamittā sakoreṃṭamalladāmeṇaṃ chatteṇaṃ dharijjamāṇeṇaṃ manussavaggurāparikhitte pādavihāracāreṇaṃ ālabhiyaṃ nayariṃ majjhaṃmajjheṇaṃ niggacchai, niggacchittā jeṇāmeva saṃkhavaṇe ujjāṇe, jeṇeva samaṇe bhagavaṃ mahāvīre teṇeva uvāgacchai, uvāgacchittā samaṇaṃ bhagavaṃ mahāvīraṃ tikkhutto āyāhiṇa-payāhiṇaṃ karei, karettā vaṃdai namaṃsai, vaṃdittā namaṃsittā naccāsaṇṇe nāidūre sussūsamāṇe namaṃsamāṇe abhimuhe vinaeṇaṃ paṃjaliuḍe pajjuvāsai|
tae ṇaṃ samaṇe bhagavaṃ mahāvīre cullasayayassa gāhāvaissa tīse ya mahaimahāliyāe parisāe jāva dhammaṃ parikahei|
parisā paḍigayā, rāyā ya gae|
tae ṇaṃ cullasayae gāhāvaī samaṇassa bhagavao mahāvīrassa aṃtie dhammaṃ soccā nisamma haṭṭhatuṭṭhacittamāṇaṃdie pīimaṇe paramasomaṇassie harisavasavisappamāṇahiyae uṭṭhāe uṭṭhei, uṭṭhettā samaṇaṃ bhagavaṃ mahāvīraṃ tikkhutto āyāhiṇa-payāhiṇaṃ karei, karettā vaṃdai namaṃsai, vaṃdittā namaṃsittā evaṃ vayāsī– saddahāmi ṇaṃ bhaṃte! niggaṃthaṃ pāvayaṇaṃ, pattiyāmi ṇaṃ bhaṃte! niggaṃthaṃ pāvayaṇaṃ, roemi ṇaṃ bhaṃte! niggaṃthaṃ pāvayaṇaṃ, abbhuṭṭhemi ṇaṃ bhaṃte! niggaṃthaṃ pāvayaṇaṃ| evameyaṃ bhaṃte! tahameyaṃ bhaṃte! avitahameyaṃ bhaṃte! asaṃdiddhameyaṃ bhaṃte! icchiyameyaṃ bhaṃte! paḍicchiyameyaṃ bhaṃte! icchiya-paḍicchiyameyaṃ bhaṃte! se jaheyaṃ tubbhe vadaha|
jahā ṇaṃ devānuppiyāṇaṃ aṃtie bahave rāīsara-talavara-māḍaṃbiya-koḍuṃbiya-ibbha-seṭṭhi-senāvai satthavāhappabhiiyā muṃḍā bhavittā agārāo anagāriyaṃ pavvaiyā, no khalu ahaṃ tahā saṃcāemi muṃḍe bhavittā agārāo anagāriyaṃ pavvaittae| ahaṃ ṇaṃ devānuppiyāṇaṃ aṃtie paṃcāṇuvvaiyaṃ sattasikkhā-vaiyaṃ–duvālasavihaṃ sāvagadhammaṃ paḍivajjissāmi|
ahāsuhaṃ devānuppiyā! mā paḍibaṃdhaṃ karehi|
tae ṇaṃ se cullasayae gāhāvaī samaṇassa bhagavao mahāvīrassa aṃtie sāvayadhammaṃ paḍivajjai|
tae ṇaṃ samaṇe bhagavaṃ mahāvīre annadā kadāi ālabhiyāe nayarīe saṃkhavaṇāo ujjāṇāo paḍinikkhamai, paḍinikkhamittā bahiyā janavayavihāraṃ viharai|
tae ṇaṃ se cullasayae samaṇovāsae jāe–abhigayajīvājīve jāva samaṇe niggaṃthe phāsu-esaṇijjeṇaṃ asana-pāna-khāima-sāimeṇaṃ vattha-paḍiggaha-kaṃbala-pāyapuṃchaṇeṇaṃ osaha-bhesajjeṇaṃ pāḍihārieṇa ya pīḍha-phalaga-sejjā-saṃthāraeṇaṃ paḍilābhemāṇe viharai|
tae ṇaṃ sā bahulā bhāriyā samaṇovāsiyā jāyā–abhigayajīvājīvā jāva samaṇe niggaṃthe phāsu-esaṇijjeṇaṃ asana-pāna-khāima-sāimeṇaṃ vattha-paḍiggaha-kaṃbala-pāyapuṃchaṇeṇaṃ osaha-bhesajjeṇaṃ pāḍihārieṇa ya pīḍha-phalaga-sejjā-saṃthāraeṇaṃ paḍilābhemāṇī viharai|
tae ṇaṃ tassa cullasayayassa samaṇovāsagassa uccāvaehiṃ sīla-vvaya-guṇa-veramaṇa-paccakkhāṇa-posahovavāsehiṃ appāṇaṃ bhāvemāṇassa coddasa saṃvaccharāiṃ vīikkaṃtāiṃ| pannarasamassa saṃvaccharassa aṃtarā vaṭṭamāṇassa annadā kadāi puvvarattāvarattakā-lasamayaṃsi dhammajāgariyaṃ jāgaramāṇassa imeyārūve ajjhatthie ciṃtie patthie manogae saṃkappe samuppajjitthā–evaṃ khalu ahaṃ ālabhiyāe nayarīe bahūṇaṃ jāva āpucchaṇijje paḍipucchaṇijje, sayassa vi ya ṇaṃ kuḍuṃbassa meḍhī jāva savvakajjavaḍḍhāvae, taṃ eteṇaṃ vakkheveṇaṃ ahaṃ no saṃcāemi samaṇassa bhagavao mahāvīrassa aṃtiyaṃ dhammapannattiṃ uvasaṃpajjittā ṇaṃ viharittae|
tae ṇaṃ se cullasayae samaṇovāsae jeṭṭhaputtaṃ mitta-nāi-niyaga-sayaṇa-saṃbaṃdhi-parijaṇaṃ ca āpucchai, āpucchittā sayāo gihāo paḍinikkhamai, paḍinikkhamittā ālabhiyaṃ nayariṃ majjhaṃmajjheṇaṃ niggacchai, niggacchittā jeṇeva posahasālā teṇeva uvāgacchai, uvāgacchittā posahasālaṃ pamajjai, pamajjittā uccāra-pāsavaṇabhūmiṃ paḍilehei, paḍilehettā dabbhasaṃthārayaṃ saṃtharei, saṃtharettā dabbhasaṃthārayaṃ duruhai, duruhittā posahasālāe posahie baṃbhayārī ummukkamaṇisuvaṇṇe vavagaya-mālāvaṇṇagavilevaṇe nikkhittasatthamusale ege abīe dabbhasaṃthārovagae samaṇassa bhagavao mahāvīrassa aṃtiyaṃ dhammapannattiṃ uvasaṃpajjittā ṇaṃ viharai|