Uvasagadasao 5.35

5.35

tae ṇaṃ tassa cullasayagassa samaṇovāsayassa puvvarattāvarattakālasamayaṃsi ege deve aṃtiyaṃ pāubbhūe|
tae ṇaṃ se deve egaṃ mahaṃ nīluppala-gavalaguliya-ayasikusumappagāsaṃ khuradhāraṃ asiṃ gahāyaṃ evaṃ vayāsī–haṃbho! cullasayagā! samaṇovāsayā! appatthiyapatthiyā! duraṃta-paṃta-lakkhaṇā! hīṇapuṇṇacāuddasiyā! siri-hiri-dhii-kitti-parivajjiyā dhammakāmayā! puṇṇakāmayā! saggakāmayā! mokkhakāmayā! dhammakaṃkhiyā! puṇṇakaṃkhiyā! saggakaṃkhiyā! mokkhakaṃkhiyā! dhamma pivāsiyā! puṇṇapivāsiyā! saggapivāsiyā! mokkhapivāsiyā! no khalu kappai tava devānuppiyā! sīlāiṃ vayāiṃ veramaṇāiṃ paccakkhāṇāiṃ posahovavāsāiṃ cālittae vā khobhittae vā khaṃḍittae vā bhaṃjittae vā ujjhittae vā pariccaittae vā, taṃ jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja jeṭṭhaputtaṃ sāo gihāo nīṇemi, nīṇettā tava aggao ghāemi, ghāettā satta maṃsasolle karemi, karettā ādānabhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se cullasayae samaṇovāsae teṇaṃ deveṇaṃ evaṃ vutte samāṇe abhīe atatthe aṇuvvigge akhubhie acalie asaṃbhaṃte tusiṇīe dhammajjhāṇovagae viharai|
tae ṇaṃ se deve cullasayagaṃ samaṇovāsayaṃ abhīyaṃ atatthaṃ aṇuvviggaṃ akhubhiyaṃ acaliyaṃ asaṃbhaṃtaṃ tusiṇīyaṃ dhamma-jjhāṇovagayaṃ viharamāṇaṃ pāsai, pāsittā doccaṃ pi taccaṃ pi cullasayayaṃ samaṇovāsayaṃ evaṃ vayāsī–haṃbho! cullasayagā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja jeṭṭha-puttaṃ sāo gihāo nīṇemi, nīṇettā tava aggao ghāemi, ghāettā satta maṃsasolle karemi, karettā ādānabhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se cullasayae samaṇovāsae teṇaṃ deveṇaṃ doccaṃ pi taccaṃ pi evaṃ vutte samāṇe abhīe jāva viharai|
tae ṇaṃ se deve cullasayagaṃ samaṇovāsayaṃ abhīyaṃ jāva pāsai, pāsittā āsuratte ruṭṭhe kuvie caṃḍikkie misimisīyamāṇe cullasayagassa samaṇovāsayassa jeṭṭhaputtaṃ gihāo nīṇei, nīṇettā aggao ghāei, ghāettā satta maṃsasolle karei, karettā ādānabhariyaṃsi kaḍāhayaṃsi addahei, addahettā cullasayagassa samaṇovāsayassa gāyaṃ maṃseṇa ya soṇieṇa ya āiṃcai|
tae ṇaṃ se cullasayae samaṇovāsae taṃ ujjalaṃ viulaṃ kakkasaṃ pagāḍhaṃ caṃḍaṃ dukkhaṃ durahiyāsaṃ veyaṇaṃ sammaṃ sahai khamai titikkhai ahiyāsei|
tae ṇaṃ se deve cullasayagaṃ samaṇovāsayaṃ abhīyaṃ jāva pāsai, pāsittā cullasayagaṃ samaṇovāsayaṃ evaṃ vayāsī–haṃbho cullasayagā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja majjhimaṃ puttaṃ sāo gihāo nīṇemi, nīṇettā tava aggao ghāemi, ghāettā satta maṃsasolle karemi, karettā ādānabhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se cullasayae samaṇovāsae teṇaṃ deveṇaṃ evaṃ vutte samāṇe abhīe jāva viharai|
tae ṇaṃ se deve cullasayagaṃ samaṇovāsayaṃ abhīyaṃ jāva pāsai, pāsittā doccaṃ pi taccaṃ pi cullasayagaṃ samaṇovāsayaṃ evaṃ vayāsī–haṃbho! cullasayayā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja majjhimaṃ puttaṃ sāo gihāo nīṇemi, nīṇettā tava aggao ghāemi, ghāettā satta maṃsasolle karemi, karettā ādānabhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se cullasayae samaṇovāsae teṇaṃ deveṇaṃ doccaṃ pi taccaṃ pi evaṃ vutte samāṇe abhīe jāva viharai|
tae ṇaṃ se deve cullasayagaṃ samaṇovāsayaṃ abhīyaṃ jāva pāsai, pāsittā āsuratte ruṭṭhe kuvie caṃḍikkie misimisīyamāṇe cullasayagassa samaṇovāsayassa majjhimaṃ puttaṃ gihāo nīṇei, nīṇettā aggao ghāei, ghāettā satta maṃsasolle karei, karettā ādānabhariyaṃsi kaḍāhayaṃsi addahei, addahettā cullasayagassa samaṇovāsayassa gāya maṃseṇa ya soṇieṇa ya āiṃcai|
tae ṇaṃ se cullasayae samaṇovāsae taṃ ujjalaṃ jāva veyaṇaṃ sammaṃ sahai khamai titikkhai ahiyāsei|
tae ṇaṃ se deve cullasayagaṃ samaṇovāsayaṃ abhīyaṃ jāva pāsai, pāsittā cullasayagaṃ samaṇovāsayaṃ evaṃ vayāsī–haṃbho! cullasayagā! samaṇovāsayā! jāva jai ṇaṃ tumaṃ ajja! sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja kanīyasaṃ puttaṃ sāo gihāo nīṇemi, nīṇettā tava aggao ghāemi, ghāettā satta maṃsasolle karemi, karettā ādānabhariyaṃsi kaḍāhayaṃsi addahemi, addahettā tava gāya maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se cullasayae samaṇovāsae teṇaṃ deveṇaṃ evaṃ vutte samāṇe abhīe jāva viharai|
tae ṇaṃ se deve cullasayagaṃ samaṇovāsayaṃ abhīyaṃ jāva pāsai, pāsittā doccaṃ pi taccaṃ pi cullasayagaṃ samaṇovāsayaṃ evaṃ vayāsī–haṃbho! cullasayagā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja kanīyasaṃ puttaṃ sāo gihāo nīṇemi, nīṇettā tava aggao ghāemi, ghāettā satta maṃsasolle karemi, karettā ādānabhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se cullasayae samaṇovāsae teṇaṃ deveṇaṃ doccaṃ pi taccaṃ pi evaṃ vutte samāṇe abhīe jāva viharai|
tae ṇaṃ se deve cullasayagaṃ samaṇovāsayaṃ abhīya jāva pāsai, pāsittā āsuratte ruṭṭhe kuvie caṃḍikkie misimisīyamāṇe cullasayagassa samaṇovāsayassa kanīyasaṃ puttaṃ gihāo nīṇei, nīṇettā aggao ghāei, ghāettā satta maṃsasolle karei, karettā ādānabhariyaṃsi kaḍāhayaṃsi addahei, addahettā cullasayagassa samaṇovāsayassa gāyaṃ maṃseṇa ya soṇieṇa ya āiṃcai|
tae ṇaṃ se cullasayae samaṇovāsae taṃ ujjalaṃ jāva veyaṇaṃ sammaṃ sahai khamai titikkhai ahiyāsei|
tae ṇaṃ se deve cullasayagaṃ samaṇovāsayaṃ abhīyaṃ jāva pāsai, pāsittā cautthaṃ pi cullasayagaṃ samaṇovāsayaṃ evaṃ vayāsī–haṃbho! cullasayagā! samaṇovāsiyā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja jāo imāo cha hiraṇṇakoḍīo nihāṇapauttāo, cha hiraṇṇakoḍīo vaḍḍhipauttāo, cha hiraṇṇakoḍīo pavittharapauttāo, tāo sāo gihāo nīṇemi, nīṇettā ālabhiyāe nayarīe siṃghāḍaga-tiya-caukka-caccara-caummuha-mahāpahapahesu savvao samaṃtā vippairāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se cullasayae samaṇovāsae teṇaṃ deveṇaṃ evaṃ vutte samāṇe abhīe jāva viharai|
tae ṇaṃ se deve cullasayaga samaṇovāsayaṃ abhīyaṃ jāva pāsai, pāsittā doccaṃ pi taccaṃ pi evaṃ vayāsī–haṃbho! culla sayagā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja jāo imāo cha hiraṇṇakoḍīo nihāṇapauttāo, cha hiraṇṇakoḍīo vaḍḍhipauttāo, cha hiraṇṇakoḍīo pavittharapauttāo, tāo sāo gihāo nīṇemi, nīṇettā ālabhiyāe nayarīe siṃghāḍaga-tiya-caukka-caccara-caummuha-mahāpahapahesu savvao samaṃtā vippairāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ tassa cullasayagassa samaṇovāsayassa teṇaṃ deveṇaṃ doccaṃ pi taccaṃ pi evaṃ vuttassa samāṇassa ayameyārūve ajjhatthie ciṃtie patthie manogae saṃkappe samuppajjitthā–aho ṇaṃ ime purise anārie anāriyabuddhī anāriyāiṃ pāvāiṃ kammāiṃ samācarati, je ṇaṃ mamaṃ jeṭṭhaṃ puttaṃ sāo gihāo nīṇei, nīṇettā mama aggao ghāei, ghāettā satta maṃsasolle karei, karettā ādāṇa-bhariyaṃsi kaḍāhayaṃsi addahei, addahettā mamaṃ gāyaṃ maṃseṇa ya soṇieṇa ya āiṃcai, je ṇaṃ mamaṃ majjhimaṃ puttaṃ sāo gihāo nīṇei, nīṇettā mama aggao ghāei, ghāettā satta maṃsasolle karei, karettā ādānabhariyaṃsi kaḍāhayaṃsi addahei, addahettā mamaṃ gāyaṃ maṃseṇa ya soṇieṇa ya āiṃcai, je ṇaṃ mamaṃ kanīyasaṃ puttaṃ sāo gihāo nīṇei, nīṇettā mama aggao ghāei, ghāettā satta maṃsasolle karei, karettā ādānabhariyaṃsi kaḍāhayaṃsi addahei, addahettā mamaṃ gāyaṃ maṃseṇa ya soṇieṇa ya āiṃcai, jāo vi ya ṇaṃ imāo mamaṃ cha hiraṇṇakoḍīo nihāṇapauttāo, cha hiraṇṇakoḍīo vaḍḍhipauttāo, cha hiraṇṇakoḍīo pavittharapauttāo, tāo vi ya ṇaṃ icchai mamaṃ sāo gihāo nīṇettā ālabhiyāe nayarīe siṃghāḍaga-tiya-caukka-caccara-caummuha-mahāpahapahesu savvao samaṃtā vippairittae, taṃ seyaṃ khalu mamaṃ eyaṃ purisa giṇhittae tti kaṭṭu uddhāvie jahā surādeva taheva bhāriya pucchai taheva kahei|