Uvasagadasao 6.40

6.40

tae ṇaṃ tassa kuṃḍakoliyassa samaṇovāsayassa bahūhiṃ sīla-vvaya-guṇa-veramaṇa-paccakkhāṇa-posahovavāsehiṃ appāṇaṃ bhāvemāṇassa coddasa saṃvaccharāiṃ vīikkaṃtāiṃ| paṇṇarasamassa saṃvaccharassa aṃtarā vaṭṭamāṇassa annadā kadāi puvvarattāvarattakālasamayaṃsi dhammajāgariyaṃ jāgaramāṇassa imeyārūve ajjhatthie ciṃtie patthie manogae saṃkappe samuppajjitthā–evaṃ khalu ahaṃ kaṃpillapure nagare bahūṇaṃ jāva āpucchaṇijje paḍipucchaṇijje, sayassa vi ya ṇaṃ kuḍuṃbassa meḍhī jāva savvakajjavaḍḍhāvae, taṃ eteṇaṃ vakkheveṇaṃ ahaṃ no saṃcāemi samaṇassa bhagavao mahāvīrassa aṃtiyaṃ dhammapannatti uvasaṃpajjittā ṇaṃ viharittae|
tae ṇaṃ se kuṃḍakolie samaṇovāsae jeṭṭhaputtaṃ mitta-nāi-niyaga-sayaṇa-saṃbaṃdhi-parijaṇaṃ ca āpucchai, āpucchittā sayāo gihāo paḍinikkhamai, paḍinikkhamittā kaṃpillapuraṃ nayaraṃ majjhaṃ-majjheṇaṃ niggacchai, niggacchittā jeṇeva posahasālā, teṇeva uvāgacchai, uvāgacchittā posahasālaṃ pamajjai, pamajjittā uccāra-pāsavaṇabhūmiṃ paḍilehei, paḍilehettā dabbhasaṃthārayaṃ saṃtharei, saṃtharettā dabbhasaṃthārayaṃ duruhai, duruhittā posahasālāe posahie baṃbhayārī ummukkamaṇisuvaṇṇe vavagaya-mālāvaṇṇagavilevaṇe nikkhittasattha-musale ege abīe dabbhasaṃthārovagae samaṇassa bhagavao mahāvīrassa aṃtiyaṃ dhammapannattiṃ uvasaṃpajjittā ṇaṃ viharai|
tae ṇaṃ se kuṃḍakolie samaṇovāsae paḍhamaṃ uvāsagapaḍimaṃ uvasaṃpajjittā ṇaṃ viharai|
tae ṇaṃ se kuṃḍakolie samaṇovāsae paḍhamaṃ uvāsagapaḍimaṃ ahāsuttaṃ ahākappaṃ ahāmaggaṃ ahātaccaṃ sammaṃ kāeṇaṃ phāsei pālei sohei tīrei kittei ārāhei|
tae ṇaṃ se kuṃḍakolie samaṇovāsae doccaṃ uvāsagapaḍimaṃ, evaṃ taccaṃ, cautthaṃ, paṃcamaṃ, chaṭṭhaṃ, sattamaṃ, aṭṭhamaṃ, navamaṃ, dasamaṃ, ekkārasamaṃ uvāsagapaḍimaṃ ahāsuttaṃ ahākappaṃ ahāmaggaṃ ahātaccaṃ sammaṃ kāeṇaṃ phāsei pālei sohei tīrei kittei ārāhei|
tae ṇaṃ se kuṃḍakolie samaṇovāsae imeṇaṃ eyārūveṇaṃ orāleṇaṃ viuleṇaṃ payatteṇaṃ paggahieṇaṃ tavokammeṇaṃ sukke lukkhe nimmaṃse aṭṭhicammāvaṇaddhe kiḍikiḍiyābhūe kise dhamaṇisaṃtae jāe|
tae ṇaṃ tassa kuṃḍakoliyassa samaṇovāsagassa annadā kadāi puvvarattāvarattakālasamayaṃsi dhammajāgariyaṃ jāgaramāṇassa ayaṃ ajjhatthie ciṃtie patthie manogae saṃkappe samuppajjitthā–evaṃ khalu ahaṃ imeṇaṃ eyārūveṇaṃ orāleṇaṃ viuleṇaṃ payatteṇaṃ paggahieṇaṃ tavokammeṇaṃ sukke lukkhe nimmaṃse aṭṭhicammāvaṇaddhe kiḍikiḍiyābhūe kise dhamaṇisaṃtae jāe| ta atthi tā me uṭṭhāṇe kamme bale vīrie purisakkāra-parakkame saddhā-dhii-saṃvege, taṃ jāvatā me uṭṭhāṇe kamme bale vīrie purisakkāra-parakkame saddhā-dhii-saṃvege, jāva ya me dhammāyarie dhammovaesae samaṇe bhagavaṃ mahāvīre jiṇe suhatthī viharai, tāvatā me seyaṃ kallaṃ pāuppabhāyāe rayaṇīe jāva uṭṭhiyammi sūre sahassarassimmi dinayare teyasā jalaṃte apacchimamāraṇaṃtiyasaṃlehaṇā-jjhūsaṇā-jjhūsiyassa bhattapāna-paḍiyāikkhiyassa kālaṃ aṇavakaṃkha-māṇassa viharittae–evaṃ saṃpehei, saṃpehettā kallaṃ pāuppabhāyāe rayaṇīe jāva uṭṭhiyammi sūre sahassarassimmi dinayare teyasā jalaṃte apacchimamāraṇaṃtiyasaṃlehaṇā-jjhūsaṇā-jjhūsie bhattapāna-paḍiyāikkhie kālaṃ aṇavakaṃkhamāṇe viharai|
tae ṇaṃ se kuṃḍakolie samaṇovāsae bahūhiṃ sīla-vvaya-guṇa-veramaṇa-paccakkhāṇa-posahovavāsehiṃ appāṇaṃ bhāvettā, vīsaṃ vāsāiṃ samaṇovāsagapariyāgaṃ pāuṇittā, ekkārasa ya uvāsagapaḍimāo sammaṃ kāeṇaṃ phāsittā, māsiyāe saṃlehaṇāe attāṇaṃ jjhūsittā, saṭṭhiṃ bhattāiṃ aṇasaṇāe chedettā, āloiya-paḍikkaṃte, samāhipatte, kālamāse kālaṃ kiccā, sohamme kappe sohammavaḍiṃsaga-ssa mahāvimāṇassa uttarapuratthime ṇaṃ aruṇajjhae vimāṇe devattāe uvavanne| tattha ṇaṃ atthegaiyāṇaṃ devāṇaṃ cattāri paliovamāiṃ ṭhiī pannattā|
se ṇaṃ bhaṃte! kuṃḍakolie tāo devalogāo āukkhaeṇaṃ bhavakkhaeṇaṃ ṭhiikkhaeṇaṃ anaṃtaraṃ cayaṃ caittā kahiṃ gami-hii? kahiṃ uvavajjihii?
goyamā! mahāvidehe vāse sijjhihii bujjhihii muccihii savvadukkhāṇaaṃtaṃ kāhii|
evaṃ khalu jaṃbū! samaṇeṇaṃ bhagavayā mahāvīreṇaṃ uvāsagadasāṇaṃ chaṭṭhassa ajjhayaṇassa ayamaṭṭhe pannatte|