Uvasagadasao 7.41

7.41

jai ṇaṃ bhaṃte! samaṇeṇaṃ bhagavayā mahāvīreṇaṃ jāva saṃpatteṇaṃ sattamassa aṃgassa uvāsagadasāṇaṃ chaṭṭhassa ajjhayaṇassa ayamaṭṭhe pannatte, sattamassa ṇaṃ bhaṃte! ajjhayaṇassa ke aṭṭhe pannatte?
evaṃ khalu jaṃbū! teṇaṃ kāleṇaṃ teṇaṃ samaeṇaṃ polāsapuraṃ nāmaṃ nayaraṃ| sahassaṃbavaṇaṃ ujjāṇaṃ| jiyasattū rāyā|
tattha ṇaṃ polāsapure nayare saddālaputte nāmaṃ kuṃbhakāre ājīviovāsae parivasai| ājīviya-samayaṃsi laddhaṭṭhe gahiyaṭṭhe pucchiyaṭṭhe viṇicchiyaṭṭhe abhigayaṭṭhe aṭṭhimiṃjapemāṇurāgaratte| ayamāuso! ājīviyasamae aṭṭhe ayaṃ paramaṭṭhe sese aṇaṭṭhetti ājī-viyasamaeṇaṃ appāṇaṃ bhāvemāṇe viharai|
tassa ṇaṃ saddālaputtassa ājīviovāsagassa ekkā hiraṇṇakoḍī nihāṇapauttāo ekkā hiraṇṇa-koḍī vaḍḍhipauttāo, ekkā hiraṇṇakoḍī pavittharapauttāo, ekke vae dasagosāhassieṇaṃ vaeṇaṃ|
tassa ṇaṃ saddālaputtassa ājīviovāsagassa aggimittā nāmaṃ bhāriyā hotthā|
tassa ṇaṃ saddālaputtassa ājīviovāsagassa polāsapurassa nagarassa bahiyā paṃca kuṃbhārāvaṇasayā hotthā|
tassa ṇaṃ bahave purisā diṇṇa-bhai-bhattaveyaṇā kallākalliṃ bahave karae ya vārae ya pihaḍae ya ghaḍae ya addhaghaḍae ya kalasae ya aliṃjarae ya jaṃbūlae ya uṭṭiyāo ya kareṃti| anne ya se bahave purisā diṇṇa-bhai-bhattaveyaṇā kallākalliṃ tehiṃ bahūhiṃ karaehi ya vāraehi ya pihaḍaehi ya ghaḍaehi ya addhaghaḍaehi ya kalasaehi ya aliṃjaraehi ya jaṃbūlaehi ya uṭṭiyāhi ya rāyamaggaṃsi vittiṃ kappemāṇā viharaṃti|