Uvasagadasao 7.42

7.42

tae ṇaṃ se saddālaputte ājīviovāsae annadā kadāi paccāvaraṇhakālasamayaṃsi jeṇeva asoga-vaṇiyā, teṇeva uvāgacchai, uvāgacchittā gosālassa maṃkhaliputtassa aṃtiyaṃ dhammapannattiṃ uvasaṃpajjittā ṇaṃ viharai|
tae ṇaṃ tassa saddālaputtassa ājīviovāsagassa ekke deve aṃtiyaṃ pāubbhavitthā|
tae ṇaṃ se deve aṃtalikkhapaḍivaṇṇe sakhiṃkhiṇiyāiṃ paṃcavaṇṇāiṃ vatthāiṃ pavara parihie saddālaputtaṃ ājīviovāsayaṃ evaṃ vayāsī– ehii ṇaṃ devānuppiyā! kallaṃ ihaṃ mahāmāhaṇe uppanna-nāṇadaṃsaṇadhare tīyappaḍupannāṇāgayajāṇae arahā jiṇe kevalī savvaṇṇū savvadarisī telokkacahiya-mahiya-pūie sadevamaṇuyāsurassa logassa accaṇijje pūyaṇijje vaṃdaṇijje namaṃsaṇijje sakkāra-ṇijje sammāṇaṇijje kallāṇaṃ maṃgalaṃ devayaṃ ceiyaṃ pajjuvāsaṇijje tacca-kammasaṃpayā-saṃpautte| taṃ ṇaṃ tumaṃ vaṃdejjāhi ṇamaṃsejjāhi sakkārejjāhi sammāṇejjāhi kallāṇaṃ maṃgalaṃ devayaṃ ceiyaṃ pajjuvāsejjāhi, pāḍihārieṇaṃ pīḍha-phalaga-sejjā-saṃthāraeṇaṃ uvanimaṃtejjāhi| doccaṃ pi taccaṃ pi evaṃ vayai, vaittā jāmeva disaṃ pāubbhūe, tāmeva disaṃ paḍigae|
tae ṇaṃ tassa saddālaputtassa ājīviovāsagassa teṇaṃ deveṇaṃ evaṃ vuttassa samāṇassa imeyārūve ajjhatthie ciṃtie patthie manogae saṃkappe samuppanne–evaṃ khalu mamaṃ dhammāyarie dhammovaesae gosāle maṃkhaliputte–se ṇaṃ mahāmāhaṇe uppannaṇāṇadaṃsaṇadhare tīyappaḍupaṇṇāṇāgayajāṇae arahā jiṇe kevalī savvaṇṇū savvadarisī telokkacahiya-mahiya-pūie sadevamaṇuyāsurassa logassa accaṇijje pūyaṇijje vaṃdaṇijje namaṃsaṇijje sakkāraṇijje sammāṇaṇijje kallāṇaṃ maṃgalaṃ devayaṃ ceiyaṃ pajjuvāsaṇijje tacca-kammasaṃ-payā-saṃpautte, se ṇaṃ kallaṃ iha havvamāgacchissaṃti| tae ṇaṃ taṃ ahaṃ vaṃdissāmi namaṃsissāmi sakkāressāmi sammāṇessāmi kallāṇaṃ maṃgalaṃ devayaṃ ceiyaṃ pajjuvāsissāmi pāḍihā-rieṇaṃ pīḍha-phalaga-sejjā-saṃthāraeṇaṃ uvanimaṃtissāmi|