Uvasagadasao 7.43

7.43

tae ṇaṃ kallaṃ pāuppabhāyāe rayaṇīe phulluppalakamalakomalummiliyaṃmi aha paṃḍure pahāe rattāsoga-ppagāsa-kiṃsuya-suyamuha-guṃjaddharāgasarise kamalāgarasaṃḍabohae uṭṭhiyammi sūre sahassarassimmi dinayare teyasā jalaṃte samaṇe bhagavaṃ mahāvīre jāva jeṇeva polāsapure nayare jeṇeva sahassaṃbavane ujjāṇe teṇeva uvāgacchai, uvāgacchittā ahāpaḍirūvaṃ oggahaṃ ogiṇhittā saṃjameṇaṃ tavasā appāṇaṃ bhāvemāṇe viharai|
parisā niggayā| kūṇie rāyā jahā, tahā jiyasattū niggacchai jāva pajjuvāsai|
tae ṇaṃ se saddālaputte ājīviovāsae imīse kahāe laddhaṭṭhe samāṇe–evaṃ khalu samaṇe bhagavaṃ mahāvīre puvvāṇu-puvviṃ caramāṇe gāmāṇugāmaṃ dūijjamāṇe ihamāgae iha saṃpatte iha samosaḍhe iheva polāsapurassa nayarassa bahiyā sahassaṃbavaṇe ujjāṇe ahāpaḍirūvaṃ oggahaṃ ogiṇhittā saṃjameṇaṃ tavasā appāṇaṃ bhāvemāṇe viharai|
taṃ gacchāmi ṇaṃ samaṇaṃ bhagavaṃ mahāvīraṃ vaṃdāmi ṇamaṃsāmi sakkāremi sammāṇemi kallāṇa maṃgalaṃ devayaṃ ceiyaṃ pajjuvāsāmi–evaṃ saṃpehei, saṃpehettā ṇhāe kayabalikamme kaya-kouya-maṃgala pāyacchitte suddhappāvesāiṃ maṃgallāiṃ vatthāiṃ pavara parihie appamahagghā-bharaṇālaṃkiyasarīre manussavaggurāparigae sāo gihāo paḍinikkhamai, paḍinikkhamittā polāsapuraṃ nayaraṃ majjhaṃmajjheṇaṃ niggacchai, niggacchittā jeṇeva sahassaṃbavane ujjāṇe, jeṇeva samaṇe bhagavaṃ mahāvīre, teṇeva uvāgacchai, uvāgacchittā tikkhutto āyāhiṇa-payāhiṇaṃ karei, karettā vaṃdai namaṃsai, vaṃdittā namaṃsittā naccāsaṇṇe nāidūre sussūsamāṇe namaṃsamāṇe abhimuhe vinaeṇaṃ paṃjaliuḍe pajjuvāsai|
tae ṇaṃ samaṇe bhagavaṃ mahāvīre saddālaputtassa ājīviovāsagassa tīse ya mahai-mahāliyāe parisāe jāva dhammaṃ parikahei|
saddālaputtāi! samaṇe bhagavaṃ mahāvīre saddālaputtaṃ ājīviovāsayaṃ evaṃ vayāsī–se nūṇaṃ saddālaputtā! kallaṃ tumaṃ paccāvaraṇhakālasamayaṃsi jeṇeva asogavaṇiyā, teṇeva uvāgacchasi, uvāgacchittā gosālassa maṃkhaliputtassa aṃtiyaṃ dhammapannatti uvasaṃpajjittā ṇaṃ viharasi| tae ṇaṃ tubbhaṃ ege deve aṃtiyaṃ pāubbhavitthā|
tae ṇaṃ se deve aṃtalikkhapaḍivaṇṇe sakhiṃkhiṇiyāiṃ paṃcavaṇṇāiṃ vatthāiṃ pavara parihie tumaṃ evaṃ vayāsī–haṃbho! saddālaputtā! ehii ṇaṃ devānuppiyā! kallaṃ ihaṃ mahāmāhaṇe jāva tacca-kammasaṃpayā-saṃpautte! taṃ ṇaṃ tumaṃ vaṃdejjāhi ṇamaṃsejjāhi sakkārejjāhi sammāṇejjāhi kallāṇaṃ maṃgalaṃ devayaṃ ceiyaṃ pajjuvāsejjāhi, pāḍihārieṇaṃ pīḍha-phalaga-sejjā-saṃthāraeṇaṃ uvanimaṃtejjāhi| doccaṃ pi taccaṃ pi evaṃ vayai, vaittā jāmeva disaṃ pāubbhūe, tāmeva disaṃ paḍigae|
tae ṇaṃ tubbhaṃ teṇaṃ deveṇaṃ evaṃ vuttassa samāṇassa imeyārūve ajjhatthie ciṃtie patthie manogae saṃkappe samuppaṇṇe–evaṃ khalu mama dhammāyarie dhammovaesae gosāle maṃkhaliputte–se ṇaṃ mahāmāhaṇe jāva tacca-kammasaṃpayā-saṃpautte, se ṇaṃ kallaṃ iha havvamāgacchissaṃti tae ṇaṃ taṃ ahaṃ vaṃdissāmi namaṃsissāmi sakkāressāmi sammāṇessāmi kallāṇaṃ maṃgalaṃ devayaṃ ceiyaṃ pajjuvāsissāmi, pāḍihārieṇaṃ pīḍha-phalaga-sejjā-saṃthāraeṇaṃ uvanimaṃtissāmi| se nūṇaṃ saddālaputtā! aṭṭhe samaṭṭhe?
haṃtā atthi|
taṃ no khalu saddālaputtā! teṇaṃ deveṇaṃ gosālaṃ maṃkhaliputtaṃ paṇihāya evaṃ vutte|
tae ṇaṃ tassa saddālaputtassa ājīviovāsayassa samaṇeṇaṃ bhagavayā mahāvīreṇaṃ evaṃ vuttassa samāṇassa imeyārūve ajjhatthie ciṃtie patthie manogae saṃkappe samuppanne–esa ṇaṃ samaṇe bhagavaṃ mahāvīre mahāmāhaṇe uppannaṇāṇadaṃsaṇadhare tīyappaḍupannāṇāgayajāṇae arahā jiṇe kevalī savvaṇṇū savvadarisī telokkacahiya-mahiya-pūie sadevamaṇuyāsurassa logassa accaṇijje pūyaṇijje vaṃdaṇijje namaṃsaṇijje sakkāraṇijje sammāṇaṇijje kallāṇaṃ maṃgalaṃ devayaṃ ceiyaṃ pajjuvāsaṇijje tacca-kammasaṃpayā-saṃpautte| taṃ seyaṃ khalu mamaṃ samaṇaṃ bhagavaṃ mahāvīraṃ vaṃdittā namaṃsittā pāḍihārieṇaṃ pīḍha-phalaga-sejjā-saṃthāraeṇaṃ uvanimaṃtettae–evaṃ saṃpehei, saṃpehettā uṭṭhāe uṭṭhei, uṭṭhettā samaṇaṃ bhagavaṃ mahāvīraṃ vaṃdai namaṃsai, vaṃdittā namaṃsittā evaṃ vayāsī–
evaṃ khalu bhaṃte! mama posālapurassa nayarassa bahiyā paṃca kuṃbhārāvaṇasayā| tattha ṇaṃ tubbhe pāḍihāriyaṃ pīḍha-phalaga-sejjā-saṃthārayaṃ ogiṇhittā ṇaṃ viharai|
tae ṇaṃ samaṇe bhagavaṃ mahāvīre saddālaputtassa ajīviovāsagassa eyamaṭṭhaṃ paḍisuṇei, paḍisuṇettā saddālaputtassa ājīviovāsagassa paṃcasu kuṃbhārāvaṇasaesu phāsuesaṇijjaṃ pāḍihāriyaṃ pīḍha-phalaga-sejjā-saṃthārayaṃ ogiṇhittā ṇaṃ viharai|