Uvasagadasao 7.44

7.44

tae ṇaṃ se saddālaputte ājīviovāsae annadā kadāi vātāhatayaṃ kolālabhaṃḍaṃ aṃto sālāhiṃto bahiyā nīṇei, nīṇettā āyavaṃsi dalayai|
tae ṇaṃ samaṇe bhagavaṃ mahāvīre saddālaputtaṃ ājīviovāsayaṃ evaṃ vayāsī–saddālaputtā! esa ṇaṃ kolālabhaṃḍe kahaṃ kato?
tae ṇaṃ se saddālaputte ājīviovāsae samaṇaṃ bhagavaṃ mahāvīraṃ evaṃ vayāsī–esa ṇaṃ bhaṃte! puvviṃ maṭṭiyā āsī, tao pacchā udaeṇaṃ timijjai, timmijjittā chāreṇa ya kariseṇa ya egayao mīsijjai, mīsijjittā cakke ārubhijjati, tao bahave karagā ya vāragā ya pihaḍagā ya ghaḍagā ya addhaghaḍagā ya kalasagā ya aliṃjaragā ya jaṃbūlagā ya0 uṭṭiyāo ya kajjaṃti|
tae ṇaṃ samaṇe bhagavaṃ mahāvīre saddālaputtaṃ ājīviovāsayaṃ evaṃ vayāsī–saddālaputtā! esa ṇaṃ kolālabhaṃḍe kiṃ uṭṭhāṇeṇaṃ kammeṇaṃ baleṇaṃ vīrieṇaṃ purisakkāra-parakkameṇaṃ kajjaṃti, udāhu aṇuṭṭhāṇeṇaṃ akammeṇaṃ abaleṇaṃ avīrieṇaṃ0 apurisakkāra-parakkameṇaṃ kajjaṃti?
tae ṇaṃ se saddālaputte ājīviovāsae samaṇaṃ bhagavaṃ mahāvīraṃ evaṃ vayāsī–bhaṃte! aṇuṭṭhāṇeṇaṃ akammeṇaṃ abaleṇaṃ avīrieṇaṃ apurisakkāraparakkameṇaṃ| natthi uṭṭhāṇe i vā kamme i vā bale i vā vīrie i vā purisakkāraparakamme i vā, niyatā savvabhāvā|
tae ṇaṃ samaṇe bhagavaṃ mahāvīre saddālaputtaṃ ājīviovāsayaṃ evaṃ vayāsī–saddālaputtā! jai ṇaṃ tubbhaṃ kei purise vātāhataṃ vā pakkellayaṃ vā kolālabhaṃḍaṃ avaharejja vā vikkhirejja vā bhiṃdejja vā acchiṃdejja vā pariṭṭhavejja vā, aggimittāe vā bhāriyāe saddhiṃ viulāiṃ bhogabhogāiṃ bhuṃjamāṇe viharejjā, tassa ṇaṃ tumaṃ purisassa kaṃ daṃḍaṃ vattejjāsi?
bhaṃte! ahaṃ ṇaṃ taṃ purisaṃ āosejja vā haṇejja vā baṃdhejja vā mahejja vā tajjejja vā tālejja vā nicchoḍejja vā nibbhacchejja vā, akāle ceva jīviyāo vavarovejjā|
saddālaputtā! no khalu tubbhaṃ kei purise vātāhataṃ vā pakkellayaṃ vā kolālabhaṃḍaṃ avaharai vā vikkhirai vā bhiṃdai vā acchiṃdai vā pariṭṭhavei vā; aggimittāe bhāriyāe saddhiṃ viulāiṃ bhogabhogāiṃ bhuṃjamāṇe viharai; no vā tumaṃ taṃ purisaṃ āosesi vā haṇesi vā baṃdhesi vā mahesi vā tajjesi vā tālesi vā nicchoḍesi vā nibbhacchesi vā akāle ceva jīviyāo vavarovesi, jai natthi uṭṭhāṇei vā kamme i vā bale i vā vīrie i vā purisakkāra-parakkame i vā, niyatā savvabhāvā| ahaṃ ṇaṃ tubbhaṃ kei purise vātāhataṃ vā pakkellayaṃ vā kolālabhaṃḍaṃ avaharei vā vikkhirei vā bhiṃdei vā acchiṃdei vā pariṭṭhavei vā, aggimittāe vā bhāriyāe saddhiṃ viulāiṃ bhogabhogāiṃ bhuṃjamāṇe viharai, tumaṃ vā taṃ purisaṃ āosesi vā haṇesi vā baṃdhesi vā mahesi vā tajjesi vā tālesi vā nicchoḍesi vā nibbhacchesi vā, akāle ceva jīviyāo vavarovesi, to jaṃ vadasi natthi uṭṭhāṇe i vā kamme i vā bale i vā vīrie i vā purisakkāra-parakkame i vā, niyatā savvabhāvā, taṃ te micchā|
ettha ṇaṃ se saddālaputte ājīviovāsae saṃbuddhe|
tae ṇaṃ se saddālaputte ājīviovāsae samaṇaṃ bhagavaṃ mahāvīraṃ vaṃdai namaṃsai, vaṃdittā namaṃsittā evaṃ vayāsī–icchāmi ṇaṃ bhaṃte! tubbhaṃ aṃtie dhammaṃ nisāmettae|
tae ṇaṃ samaṇe bhagavaṃ mahāvīre saddālaputtassa ājīviovāsagassa tīse ya mahaimahāliyāe parisāe jāva dhammaṃ parikahei|