Uvasagadasao 7.47

7.47

tae ṇaṃ tassa saddālaputtassa samaṇovāsayassa bahūhiṃ sīla-vvaya-guṇa-veramaṇa-paccakkhāṇa-posahovavāsehiṃ appāṇaṃ bhāvemāṇassa coddasa saṃvaccharā vīikkaṃtā| paṇṇarasamassa saṃvaccharassa aṃtarā vaṭṭamāṇassa annadā kadāi puvvarattāvarattakālasamayaṃsi dhammajāgariyaṃ jāgaramāṇassa imeyārūve ajjhatthie ciṃtie patthie manogae saṃkappe samuppajjitthā–
evaṃ khalu ahaṃ polāsapure nayare bahūṇaṃ jāva āpucchaṇijje paḍipucchaṇijje, sayassa vi ya ṇaṃ kuḍuṃbassa meḍhī jāva savvakajjavaḍḍhāvae, taṃ eteṇaṃ vakkheveṇaṃ ahaṃ no saṃcāemi samaṇassa bhagavao mahāvīrassa aṃtiyaṃ dhammapannatti uvasaṃpajjittā ṇaṃ viharittae|
tae ṇaṃ se saddālaputte samaṇovāsae jeṭṭhaputtaṃ mitta-nāi-niyaga-sayaṇa-saṃbaṃdhi-parijaṇaṃ ca āpucchai, āpucchittā sayāo gihāo paḍinikkhamai, paḍinikkhamittā polāsapuraṃ nayaraṃ majjhaṃmajjheṇaṃ niggacchai, niggacchittā jeṇeva posahasālā teṇeva uvāgacchai, uvāgacchittā posahasālaṃ pamajjai, pamajjittā uccāra-pāsavaṇabhūmiṃ paḍilehei, paḍilehettā dabbhasaṃthārayaṃ saṃtharei, saṃtharettā dabbhasaṃthārayaṃ duruhai, duruhittā posahasālāe posahie baṃbhayārī ummukkamaṇisuvaṇṇe vavagaya-mālāvaṇṇagavilevaṇe nikkhittasattha-musale ege abīe dabbhasaṃthārovagae samaṇassa bhagavao mahāvīrassa aṃtiyaṃ dhammapannattiṃ uvasaṃpajjittā ṇaṃ viharai|
tae ṇaṃ tassa saddālaputtassa samaṇovāsayassa puvvarattāvarattakāle ege deve aṃtiyaṃ pāubbhavitthā|
tae ṇaṃ se deve egaṃ mahaṃ nīluppala-gavalaguliya-ayasikusumappagāsaṃ khuradhāraṃ asiṃ gahāya saddālaputtaṃ samaṇovāsayaṃ evaṃ vayāsī–haṃbho! saddālaputtā! samaṇovāsayā! appatthiyapatthiyā! duraṃta-paṃta-lakkhaṇā! hīṇapuṇṇacāuddasiyā! siri-hiri-dhii-kitti-parivajjiyā! dhammakāmayā! puṇṇa-kāmayā! saggakāmayā! mokkhakāmayā! dhammakaṃkhiyā! puṇṇakaṃkhiyā! saggakaṃkhiyā! mokkhakaṃkhiyā! dhammapivāsiyā! puṇṇapivāsiyā! saggapivāsiyā! mokkhapivāsiyā! no khalu kappai tava devānuppi-yā! sīlāiṃ vayāiṃ veramaṇāiṃ paccakkhāṇāiṃ posahovavāsāiṃ cālittae vā khobhittae vā khaṃḍittae vā bhaṃjittae vā ujjhittae vā pariccaittae vā, taṃ jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja jeṭṭhaputtaṃ sāo gihāo nīṇemi, nīṇettā tava aggao ghāemi, ghāettā nava maṃsasolle karemi, karettā ādānabhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi
tae ṇaṃ se saddālaputte samaṇovāsae teṇaṃ deveṇaṃ evaṃ vutte samāṇe abhīe atatthe anuvvigge akhubhie acalie asaṃbhaṃte tusiṇīe dhammajjhāṇovagae viharai|
tae ṇaṃ se deve saddālaputtaṃ samaṇovāsayaṃ abhīyaṃ atatthaṃ aṇuvviggaṃ akhubhiyaṃ acaliyaṃ asaṃbhaṃtaṃ tusiṇīyaṃ dhammajjhā-ṇovagayaṃ viharamāṇaṃ pāsai, pāsittā doccaṃ pi taccaṃ pi saddālaputtaṃ samaṇovāsayaṃ evaṃ vayāsī–haṃbho! saddālaputtā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja jeṭṭhaputtaṃ sāo gihāo nīṇemi, nīṇettā tava aggao ghāemi, ghāettā nava maṃsasolle karemi, karettā ādānabhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se saddālaputte samaṇovāsae teṇaṃ deveṇaṃ doccaṃ pi taccaṃ pi evaṃ vutte samāṇe abhīe jāva viharai|
tae ṇaṃ se deve saddālaputtaṃ samaṇovāsayaṃ abhīyaṃ jāva pāsai, pāsittā āsuratte ruṭṭhe kuvie caṃḍikkie misimisīya-māṇe saddālaputtassa samaṇovāsayassa jeṭṭhaputtaṃ gihāo nīṇei, nīṇettā aggao ghāei, ghāettā nava maṃsasolle karei, karettā ādānabhariyaṃsi kaḍāhayaṃsi addahei, addahettā saddālaputtassa samaṇovāsayassa gāyaṃ maṃseṇa ya soṇieṇa ya āiṃcai|
tae ṇaṃ se saddālaputte samaṇovāsae taṃ ujjalaṃ viulaṃ kakkasaṃ pagāḍhaṃ caṃḍaṃ dukkhaṃ durahiyāsaṃ veyaṇaṃ sammaṃ sahai khamai titikkhai ahiyāsei|
tae ṇaṃ se deve saddālaputtaṃ samaṇovāsayaṃ abhīyaṃ jāva pāsai, pāsittā saddālaputtaṃ samaṇovāsayaṃ evaṃ vayāsī–haṃbho! saddālaputtā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja majjhimaṃ puttaṃ sāo gihāo nīṇemi, nīṇettā tava aggao ghāemi, ghāettā nava maṃsasolle karemi, karettā ādā-ṇabhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se saddālaputte samaṇovāsae teṇaṃ deveṇaṃ evaṃ vutte samāṇe abhīe jāva viharai|
tae ṇaṃ se deve saddālaputtaṃ samaṇovāsayaṃ abhīyaṃ jāva pāsai, pāsittā doccaṃ pi taccaṃ pi saddālaputtaṃ samaṇovāsayaṃ evaṃ vayāsī–haṃbho! saddālaputtā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja majjhimaṃ puttaṃ sāo gihāo nīṇemi, nīṇettā tava aggao ghāemi, ghāettā nava maṃsasolle karemi, karettā ādānabhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se saddālaputte samaṇovāsae teṇaṃ deveṇaṃ doccaṃ pi taccaṃ pi evaṃ vutte samāṇe abhīe jāva viharai|
tae ṇaṃ se deve saddālaputtaṃ samaṇovāsayaṃ abhīyaṃ jāva pāsai, pāsittā āsuratte ruṭṭhe kuvie caṃḍikkie misimisīya-māṇe saddālaputtassa samaṇovāsayassa majjhimaṃ puttaṃ gihāo nīṇei, nīṇettā aggao ghāei, ghāettā nava maṃsasolle karei, karettā ādānabhariyaṃsi kaḍāhayaṃsi addahei, addahettā saddālaputtassa samaṇovāsayassa gāyaṃ maṃseṇa ya soṇieṇa ya āiṃcai|
tae ṇaṃ se saddālaputte samaṇovāsae taṃ ujjalaṃ jāva veyaṇaṃ sammaṃ sahai khamai titikkhai ahiyāsei|
tae ṇaṃ se deve saddālaputtaṃ samaṇovāsayaṃ abhīyaṃ jāva pāsai, pāsittā saddālaputtaṃ samaṇovāsayaṃ evaṃ vayāsī–haṃbho! saddālaputtā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja kanīyasaṃ puttaṃ sāo gihāo nīṇemi, nīṇettā tava aggao ghāemi, ghāettā nava maṃsasolle karemi, karettā ādā-ṇabhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se saddālaputte samaṇovāsae teṇaṃ deveṇaṃ evaṃ vutte samāṇe abhīe jāva viharai|
tae ṇaṃ se deve saddālaputtaṃ samaṇovāsayaṃ abhīyaṃ jāva pāsai, pāsittā doccaṃ pi taccaṃ pi saddālaputtaṃ samaṇovāsayaṃ evaṃ vayāsī–haṃbho! saddālaputtā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja kanīyasaṃ puttaṃ sāo gihāo nīṇemi, nīṇettā tava aggao ghāemi, ghāettā nava maṃsasolle karemi, karettā ādānabhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se saddālaputte samaṇovāsae teṇaṃ deveṇaṃ doccaṃ pi taccaṃ pi evaṃ vutte samāṇe abhīe jāva viharai|
tae ṇaṃ se deve saddālaputtaṃ samaṇovāsayaṃ abhīyaṃ jāva pāsai, pāsittā āsuratte ruṭṭhe kuvie caṃḍikkie misimisīyamāṇe saddālaputtassa samaṇovāsayassa kanīyasaṃ puttaṃ gihāo nīṇei, nīṇettā aggao ghāei, ghāettā nava maṃsasolle karei, karettā ādānabhariyaṃsi kaḍāhayaṃsi addahei, addahettā saddālaputtassa samaṇovāsayassa gāyaṃ maṃseṇa ya soṇieṇa ya āiṃcai|
tae ṇaṃ se saddālaputte samaṇovāsae taṃ ujjalaṃ jāva veyaṇaṃ sammaṃ sahai khamai titikkhai ahiyāsei|
tae ṇaṃ se deve saddālaputtaṃ samaṇovāsayaṃ abhīyaṃ jāva pāsai, pāsittā cautthaṃ pi saddālaputtaṃ samaṇovāsayaṃ evaṃ vayāsī–haṃbho! saddālaputtā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja jā imā aggimittā bhāriyā dhamhasahāiyā dhammaviijjiyā dhammāṇurāgarattā samasuhadukkhasa-hāiyā, taṃ sāo gihāo nīṇemi, nīṇettā tava aggao ghāemi, ghāettā nava maṃsasollae karemi, karettā ādānabhariyaṃsi kaḍāha-yaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se saddālaputte samaṇovāsae teṇaṃ deveṇaṃ evaṃ vutte samāṇe abhīe jāva viharai|
tae ṇaṃ se deve saddālaputtaṃ samaṇovāsayaṃ abhīyaṃ jāva pāsai, pāsittā doccaṃ pi taccaṃ pi saddālaputtaṃ samaṇovāsayaṃ evaṃ vayāsī–haṃbho! saddālaputtā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja jā imā aggimittā bhāriyā dhammasahāiyā dhammaviijjiyā dhammāṇurāgarattā samasuhadukkhasahāiyā taṃ sāo gihāo nīṇemi, nīṇettā tava aggao ghāemi, ghāettā nava maṃsasolle karemi, karettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ tassa saddālaputtassa samaṇovāsayassa teṇaṃ deveṇaṃ doccaṃ pi taccaṃ pi evaṃ vuttassa samāṇassa ayaṃ ajjhatthie ciṃtie patthie manogae saṃkappe samuppajjitthā–aho ṇaṃ ime purise anārie anāriyabuddhī anāriyāiṃ pāvāiṃ kammāiṃ samācarati, je ṇaṃ mamaṃ jeṭṭhaṃ puttaṃ, je ṇaṃ mamaṃ majjhimayaṃ puttaṃ, jeṇaṃ mamaṃ kanīyasaṃ puttaṃ sāo gihāo nīṇei, nīṇettā mama aggao ghāei, ghāettā nava maṃsasolle karei, karettā ādānabhariyaṃsi kaḍāhayaṃsi addahei, addahettā mamaṃ gāyaṃ maṃseṇa ya soṇieṇa ya āiṃcai, jā vi ya ṇaṃ mamaṃ aggimittā bhāriyā dhammasahāiyā dhammaviijjiyā dhammāṇu-rāgarattā samasuhadukkhasahāiyā, taṃ pi ya icchai sāo gihāo nīṇettā mamaṃ aggao ghāettae| taṃ seyaṃ khalu mamaṃ eyaṃ purisaṃ giṇhittae tti kaṭṭu uddhāvie, se vi ya āgāse uppaie, teṇa ca khaṃbhe āsāie, mahayā-mahayā saddeṇaṃ kolāhale kae|
tae ṇaṃ sā aggimittā bhāriyā taṃ kolāhalasaddaṃ soccā nisamma jeṇeva saddālaputte samaṇovāsae, teṇeva uvāgacchai, uvāgacchittā saddālaputtaṃ samaṇovāsayaṃ evaṃ vayāsī–kiṇṇaṃ devānuppiyā! tubbhe ṇaṃ mahayā-mahayā saddeṇaṃ kolāhale kae?
tae ṇaṃ se saddālaputte samaṇovāsae aggimittaṃ bhāriyaṃ evaṃ vayāsī–evaṃ khalu devānuppie! na yāṇāmi ke vi purise āsuratte ruṭṭhe kuvie caṃḍikkie misimisīyamāṇe egaṃ mahaṃ nīluppala-gavalaguliya-ayasikusumappagāsaṃ khuradhāraṃ asiṃ gahāya mamaṃ evaṃ vayāsī–haṃbho! saddālaputtā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja jeṭṭhaputtaṃ sāo gihāo nīṇemi, nīṇettā tava aggao ghāemi, ghāettā nava maṃsasolle karemi, karettā ādānabhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi| tae ṇaṃ ahaṃ teṇaṃ puriseṇaṃ evaṃ vutte samāṇe abhīe jāva viharāmi| tae ṇaṃ se purise mamaṃ abhīyaṃ jāva pāsai, pāsittā mamaṃ doccaṃ pi taccaṃ pi evaṃ vayāsī–
haṃbho! saddālaputtā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja jeṭṭhaputtaṃ sāo gihāo nīṇemi, nīṇettā tava aggao ghāemi, ghāettā nava maṃsasolle karemi, karettā ādānabhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ ahaṃ teṇaṃ puriseṇaṃ doccaṃ pi taccaṃ pi evaṃ vutte samāṇe abhīe jāva viharāmi|
tae ṇaṃ se purise mamaṃ abhīyaṃ jāva pāsai, pāsittā āsuratte ruṭṭhe kuvie caṃḍikkie misimisīyamāṇe mamaṃ jeṭṭhaputtaṃ gihāo nīṇei, nīṇettā mama aggao ghāei, ghāettā nava maṃsasolle karei, karettā ādānabhariyaṃsi kaḍāhayaṃsi addahei, addahettā mamaṃ gāyaṃ maṃseṇa ya soṇieṇa ya āiṃcai|
tae ṇaṃ ahaṃ taṃ ujjalaṃ jāva veyaṇaṃ sammaṃ sahāmi khamāmi titikkhāmi ahiyāsemi|
evaṃ majjhimaṃ puttaṃ jāva veyaṇaṃ sammaṃ sahāmi khamāmi titikkhāmi ahiyāsemi| evaṃ kanīyasaṃ puttaṃ jāva veyaṇaṃ sammaṃ sahāmi khamāmi titikkhāmi ahiyāsemi| tae ṇaṃ se purise mamaṃ abhīyaṃ jāva pāsai, pāsittā mamaṃ cautthaṃ pi evaṃ vayāsī–haṃbho! saddālaputtā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja jā imā aggimittā bhāriyā dhammasahāiyā dhammaviijjiyā dhammāṇurāgarattā samasuhadukkhasahāiyā taṃ sāo gihāo nīṇemi, nīṇettā tava aggao ghāemi, ghāettā nava maṃsasolle karemi, karettā ādānabhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ ahaṃ teṇaṃ puriseṇaṃ evaṃ vutte samāṇe abhīe jāva viharāmi|
tae ṇaṃ se purise mamaṃ abhīyaṃ jāva doccaṃ pi taccaṃ pi mamaṃ evaṃ vayāsī–haṃbho! saddālaputtā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to jāva tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ teṇaṃ puriseṇaṃ doccaṃ pi taccaṃ pi mamaṃ evaṃ vuttassa samāṇassa imeyārūve ajjhatthie ciṃtie patthie manogae saṃkappe samuppajjitthā–aho ṇaṃ ime purise anārie anāriyabuddhī anāriyāiṃ pāvāiṃ kammāiṃ samācarati, je ṇaṃ mamaṃ jeṭṭhaputtaṃ, je ṇaṃ mamaṃ majjhi mayaṃ puttaṃ, je ṇaṃ mamaṃ kanīyasaṃ puttaṃ sāo gihāo nīṇei, nīṇettā mama aggao ghāei, ghāettā nava maṃsasolle karei, karettā ādānabhariyaṃsi kaḍāhayaṃsi addahei, addahettā mamaṃ gāyaṃ maṃseṇa ya soṇieṇa ya āiṃcai, tumaṃ pi ya ṇaṃ icchai sāo gihāo nīṇettā mama aggao ghāettae, taṃ seyaṃ khalu mamaṃ eyaṃ purisaṃ giṇhittae tti kaṭṭu uddhāvie, se vi ya āgāse uppaie, mae vi ya khaṃbhe āsāie, mahayā-mahayā saddeṇaṃ kolāhale kae|
tae ṇaṃ sā aggimittā bhāriyā saddālaputtaṃ samaṇovāsayaṃ evaṃ vayāsī–
no khalu kei purise tava jeṭṭhaputtaṃ sāo gihāo nīṇei, nīṇettā tava aggao ghāei, no khalu kei purise tava majjhimayaṃ puttaṃ sāo gihāo nīṇei, nīṇettā tava aggao ghāei, no khalu kei purise tava kanīyasaṃ puttaṃ sāo gihāo nīṇei, nīṇettā tava aggao ghāei, esa ṇaṃ kei purise tava uvasaggaṃ karei, esa ṇaṃ tumaṃ vidarisaṇe diṭṭhe| taṃ ṇaṃ tumaṃ iyāṇiṃ bhaggavae bhagganiyame bhaggaposahe viharasi| taṃ ṇaṃ tumaṃ piyā! eyassa ṭhāṇassa āloehi paḍikkamāhi niṃdāhi garihāhi viuṭṭāhi visohehi akaraṇayāe abbhuṭṭhāhi ahārihaṃ pāyacchittaṃ tavokammaṃ paḍivajjāhi|
tae ṇaṃ se saddālaputte samaṇovāsae aggimittāe bhāriyāe taha tti eyamaṭṭhaṃ vinaeṇaṃ paḍisuṇei, paḍisuṇettā tassa ṭhāṇassa āloei paḍikkamai niṃdai garihai viuṭṭai visohei akaraṇayāe abbhuṭṭhei ahārihaṃ pāyacchittaṃ tavokammaṃ paḍivajjai|
tae ṇaṃ se saddālaputte samaṇovāsae paḍhamaṃ uvāsagapaḍimaṃ uvasaṃpajjittā ṇaṃ viharai|
tae ṇaṃ se saddālaputte samaṇovāsae paḍhamaṃ uvāsagapaḍimaṃ ahāsuttaṃ ahākappaṃ ahāmaggaṃ ahātaccaṃ sammaṃ kāeṇaṃ phāsei pālei sohei tīrei kittei ārāhei|
tae ṇaṃ se saddālaputte samaṇovāsae doccaṃ uvāsagapaḍimaṃ, evaṃ taccaṃ, cautthaṃ, paṃcamaṃ, chaṭṭhaṃ, sattamaṃ, aṭṭhamaṃ, navamaṃ, dasamaṃ, ekkārasamaṃ uvāsagapaḍimaṃ ahāsuttaṃ ahākappaṃ ahāmaggaṃ ahātaccaṃ sammaṃ kāeṇaṃ phāsei pālei sohei tīrei kittei ārāhei|
tae ṇaṃ se saddālaputte samaṇovāsae teṇaṃ orāleṇaṃ viuleṇaṃ payatteṇaṃ paggahieṇaṃ tavokammeṇaṃ sukke lukkhe nimmaṃse aṭṭhicammāvaṇaddhe kiḍikiḍiyābhūe kise dhamaṇisaṃtae jāe|
tae ṇaṃ tassa saddālaputtassa samaṇovāsayassa annadā kadāi, puvvarattāvarattakālasamayaṃsi dhammajāgariyaṃ jāgaramāṇassa ayaṃ ajjhatthie ciṃtie patthie manogae saṃkappe samuppajjitthā–evaṃ khalu ahaṃ imeṇaṃ eyārūveṇaṃ orāleṇaṃ viuleṇaṃ payatteṇaṃ pagga hieṇaṃ tavokammeṇaṃ sukke lukkhe nimmaṃse aṭṭhicammāvaṇaddhe kiḍikiḍiyābhūe kise dhamaṇisaṃtae jāe| taṃ atthi tā me uṭṭhāṇe kamme bale vīrie purisakkāra-parakkame saddhā-dhii-saṃvege, taṃ jāvatā me atthi uṭṭhāṇe kamme bale vīrie purisakkāra-parakkame saddhā-dhii-saṃvege, jāva ya me dhammāyarie dhammovaesae samaṇe bhagavaṃ mahāvīre jine suhatthī viharai, tāvatā me seyaṃ kallaṃ pāuppabhāyāe rayaṇīe jāva uṭṭhiyammi sūre sahassarassimmi dinayare teyasā jalaṃte apacchimamāraṇaṃtiyasaṃlehaṇā-jjhūsaṇā-jjhūsiyassa bhattapāṇapaḍiyāikkhiyassa, kālaṃ aṇavakaṃkha-māṇassa viharittae– evaṃ saṃpehei, saṃpehettā kallaṃ pāuppabhāyāe rayaṇīe jāva uṭṭhiyammi sūre sahassarassimmi dinayare teyasā jalaṃte apacchimamāraṇaṃtiyasaṃlehaṇā-jjhūsaṇā-jjhūsie bhattapāna-paḍiyāikkhie kālaṃ anavakaṃkhamāṇe viharai|
tae ṇaṃ se saddālaputte samaṇovāsae bahūhiṃ sīla-vvaya-guṇa-veramaṇa-paccakkhāṇa-posahovavāsehiṃ appāṇaṃ bhāvettā vīsaṃ vāsāiṃ samaṇovāsagapariyāgaṃ pāuṇittā, ekkārasa ya uvāsagapaḍimāo sammaṃ kāeṇaṃ phāsittā, māsiyāe saṃlehaṇāe attāṇaṃ jjhūsittā, saṭṭhiṃ bhattāiṃ aṇasaṇāe chedettā, āloiya-paḍikkaṃte samāhipatte kālamāse kālaṃ kiccā sohamme kappe aruṇaccae vimāṇe devattāe uvavaṇṇe| cattāri paliovamāiṃ ṭhiī pannattā| mahāvidehe vāse sijjhihii bujjhihii muccihii savvadukkhāṇamaṃtaṃ kāhii|
evaṃ khalu jaṃbū! samaṇeṇaṃ bhagavayā mahāvīreṇaṃ uvāsagadasāṇaṃ sattamassa ajjhayaṇassa ayamaṭṭhe pannatte|